Day 4

Bus tour kan kal. Oahu tikulh hel in chunnitlak bus in kan vaak hnek. Minung pa khat ah $100.

Hawaii hi meitlang ram a si. A lung zong meihang a khal mi lava rocks (mostly basalts) an si. Honolulu khua kam i Diamond Head tlang zong meitlang thi a si (kum 150,000 lio ah a rak puak). Tlang zong hi azum in an zum. Lungpang a tam. Hawaii lung khi Hawaii leng ah ichuahpi a si lo; an khuahrumnu Pele nih a haak. An iphorh ah cun vanchiat nih a tlunh lengmang hna, i an iphorh mi lung cu Hawaii ah an kuat tthan lengmang.

Rili hrawl in kan kal. Kan orhlei poh rili, kan kehlei poh tlang. Vawleicung khuachia vialte headquarters cu Honolulu a si i an tlang hi khuum le lungpang lawngte si kaw khuachia um nak phun rumro cu a si taktak. Sathaar thlah hna usi law an inuam tuk hnga. Ramlak ah zei saram hmanh an um lo.

An thingkung kohku kung phun cu pa bantuk in aphei in an zaam i naidem kaupi a pe phun an si. Hmunkhatka ah, "Mahka hi Jurassic Park muvi an ithlak nak kha a si" a kan ti. Hmun dang ah, "Mahka hi Karate Kid an thlak nak kha a si, Japan a si tiah an kan hlen" an kan ti. Muvi tampi hi Hawaii ah an thlak hna.

An tlang hi pungsan zong an ngei lo, fing zong an um lo. Mah na cun mi pa khat nih, "Lai Ram a lo" e a ti. A lo lo pi. Hawaii cu igneus rock ram a si; Lai Ram cu sedimentary rock ram. An ilo kho lo.

Khuate tampi kan pal. An ar a faat ning cu, an chiarkhuan ka thah hna seh law keimah lawng nih ka ei dih khawh lai. Arttau tia hmanh an ti lo. Mahtluk ar hme tete nih cun an bizi ngai ve.

Theitlai a tam nak khua kan pal. Hai pum khat ka ei ($7). A thlum ngaite. An sangphaw an hme tete. Thawt cu an thaw tuk rua ka ti. Fu ram a si nain fu an zuar ka hmu lo. [Hika ah hmanthlak pa khat.]

Chuncaw an cah cia i khua pa khat ah kan idin i kan ei. Buh nem thlum le kaikuang le tisik kaa cah. Mah ah cun $20. Coffee thaw zong rial cia in an zuar. Mahka khua cu Macadamia a tam nak a si.

Macadamia cu a tlai a thaw tuk, a man zong a faak. Lai Ram ah ciing ve usi law a kan cawm hnga ti a ruat mi aa um. Atang hmanthlak ka hnulei i thingpi khi macadamia kung cu a si.

Beach a tthat nak ah an kan dinhpi. Rili ah iliau khawh a si, nain thil thlen nak kan iken cia lo i Laimi cu kan iliau set lo. Nu pawl cu Zapan zawngttah tu an ttot. Kuhchuk kung sang pipi an um.

Beach kam ah biar aa kaih mi pa ka hmuh. Lifeguard a si. Hmaan thlakpi ka duh kong ka chim. An va chimh. A duh lo. Aa siang lo. Keimah ka va kal i, "Kanmah miphun zong hi biar a rak ikaih mi kan si. Ka ngakchiat lio tiang hi biar kaih an um rih. Ka patar zong a thih tiang biar aa kaih. Atu cu hmuh awk an um ti lo; vawleicung ah biar kaih ka hmuh khawh mi hi nangmah lawng na si cang" tiah ka va ti. Rev. Cung Bawi Hup nih Pathian kong a caihpi. "Kal kon usi" tiah Saya Cung Bawi Hup cu ka ti i kal kaa rel. Biarkaihpa nih cun, "Kal rih hlah" a ka ti tthan. Hmaan thlak na ka sawm cu sullam ngei in a si ca ah kan ithla lai, tourist sawhsawh he ithlak cu ka duh lo" a ka ti. Mah cun, a bia cu keimah lei ah a mer. Hawaii khuaram ngeitu chung a si kong, ral a tlun zong ah a do tu chung an si kong, atu zong ral a tlun ah cun doh aa thawh lai kong, a ram kilven cu a rian a si kong tehna a ka chimh. "Amerikan nih an kan laak i Amerikan nan si e an kan ti. Kan si lo; Hawaiian kan si ko" a ti.

Hmunkhatka ah lo rawn a um i, "Hika ah hin nu pawl lo an thlo. A chak tlang karlak khin vanlawng pa ruk an ra. California lei in an ra tiah an hei ruah, nitlaklei in a ra ko mi cu. Japan vanlawng an si i Pearl Harbor bom thlak ah a ra mi an si" a ti.

Dole rungteban khua kan phaan. Rungteban piah nak (demonstration) a um lai e an ti. Zeiti ko in dah a piah lai tiah kan hngah. Rungteban cu a cheu, a hlawi i a si ko, thiam cio dih mi. Kawl hmanh nih an thiam deuh lai.

Hawaii ram chuncha a tam ning cu! Chuncha pa khat kan hmuh. Kan kal i kan lonh. Adang kan hmuh tthan. Kan lonh. Adang a rak kho hoi. Chuncha ram kan si e an ti ve.

Hawaii tikulh hi ti nih a phum chin lengmang. A tikulh ning in atang ah a pil tinak a si rua. Tuhnu kum 12 ah zung 6-8 sang tiang ti a tthang lai i Hawaii ram hi a bi chin lengmang lai. A tikulh hrimhrim hi Japan lei ah aa thawn ziahmah.

Keimah hmaan kaa thlak mi nakin keimah i khuaram ka thlak mi an idawh deuh. Acung bik hmanthlak hawihna khi mawttaw chung in ka hon hmeh sawhsawh i mahtluk ttha khin a chuak ko.