Day 5

Hawaii ka siang lo i last minute tiang Honolulu ah caan ka hmang. Beer kaa hunh i khuamuih le thlavang ka zoh ta.

Hawaii kei ca i a nuamh nak cu:

-An miphun hi ka duh tuk hna

-Anthropologically, culturally, historically kanmah bantuk an si ve

-A music ka duh tuk (an laam he)

-Hawaii cu mi tluantlam nak a si

-Laimi sin ka um ah an ka hmuhcia ning lengmang in hmuh ka si. Ka label aa thleng ti lo. A ka hngal bal lo mi sin ka phanh ah mi nih an ka neek maw, an ka upat maw, an ka heem maw, zeitin dah an ka zoh, ka image zei dah a lawh ti kaa hngalh. A nuam in ka thei.

Zan 10pm deng ah Hawaii cu "Aloha" ka ti i kaa thawh riangmang.

"Aloha 'oe, aloha 'oe
E ke onaona noho i ka lipo
One fond embrace
A ho'i a'e au
Until we meet again"

Pacific Rilipi cung in suimilam 3 tluk kan zuang. Zing nichuak ah Los Angeles ka phaan. Indianapolis lanh hlan ah suimilam 5 caan ka ngei. Khua chung ah vaak ta ning ka ti. City Bus kaa cit ($9.50 lawng ka dih).

Downtown zingka ah zei hmanh a um lo. Hollywood ah kal leh la'ng ka ti. Metro (vawleitang tlanglawng) kaa cit. North Hollywood ah ka lan sual. Ka kir tthan. Rail station ah si seh, khuachung si seh, santlailo an tam. Kanmah nak zual deuh hi an rak um cio.Homeless a nung menmen mi, lungrawk, riangvai tampi ka hmuh hna. Khuapi chung ah cun aphung a si ko.

Hollywood i Universal Studio zawn ah cun ka ttum. "Ka ttum" ti cu tlanglawng in ka chuak i a si. Vawleitangpi in hleihlak in vawleicung ah hon chuah a si. Ka hong chuah nak zong cu a kiing. Homeless lawng an tho rih. Universal Studio kal nak ah lamcung hlei zawh a si. Kaibawm chung ah mi khaansangpi a rong lut ve. A au, a kiau. Ka ttih pah. A lungthin a dam lo mi a si. A thil cu leng in a nam i aa vah pi. Ka ngaih a chia pah.

Hlei cung ah cun ngaknu ka hei hmuh. Bus stop ah a rak tthu. Ka va phaan ve. Ka hmuh lecangka in ka zohcho tuk colh. Hollywood muvi ah aa tel ve ding a si men lai' ka ti. 'Hollywood i muvi aa thla ding nih a ke in Hollywood ah a kal lai lo' ka ti tthan. Security-nu he kan ichawn. Bus cu a rau pah rih lai e, hngak rih law a ka ti. Leng no pawng te ah cun ka tthu, lawng ko na ah tiah. A ka zoh. A mitfang aa dawh ning cu! Ka kehlei a zoh rua tiah ka ti. A ka zoh ttualmaal tthan. Keimah pei a ka zoh ko hi ka ti i ka chawnh. A face mask a ka phoihpiak i panhte'n a ka chawnh. 'Naa dawh tuk' e ka ti. Aa nuam tuk. Cu vial ah cun ka kut a tak a phaan cang. Kuh zong kuaih zong a al lo. Hnamh hmanh ah a hmai a chia rua hnga lo ka ti; a make up ralrinpiak lo ahcun.

A kong ka hal. Japan mi, college sophomore te a si (kum 20). USA a phanh nak ni khat. Ni 7 a caam hnek. Kan von ikom colh. Zei ka hal poh te ah aa theihngal cia chimhte'n a ka chimh. A phone number ka hal zong ah, ralrin le zei ngei lo in Japan a phone zong, US a phone zong a ka chimh. An ram ah mi tthalo ralrin awk an tlawm lai ning ka ruat. Ka hngar. (US ah ngaknu nih phone number tlangval raan pek a si lo). 'Japan phung ah ngaknu hi taktongh a si maw' tiah ka hal. A nih pah in, "Si cu a si lo, nain you can..." a ka ti. Nawl pek in ka um. Kan tthut-tti ko bu cun text message kan ikua (tuchan ngaite!).

Kei cu kaa ralring nawn. Ka rim le ka daw he ka si. Kaa kholh lo nak suimilam 30+. Mah chung ah cun chunitlak bus in ka vaak. Zan ah ka ke in ka vaak rih. Hotel check out tuah hnu ah a si i ikholh nak a um ti lo. Kaa hngelh bu in vanlawng in ka ttum cu a si fawn i kaa panh lo ning le ka buar ning. Cekcek kaa khai cia i aa ning leh. Ka naih ngam set lo. Anih nih le bia a ka chimh hnek ah kan bel aa tawng deng in a ka naih. Zeitite'n dah a ka ngamh manh hnga, ngaihchiate'n, ka ti. Bus ah kan kai. Aa duh mi um te in kan um.

Hollywood kan phaan. Kan ichok. Hmaan kan ithla (hmanthlak chung i ka ttawt ning cu!). Anih a hawile he thil ti ding an ngei. Kei zong airport ah ileh ka hau. 'Kha, va kal cang; na hawile an in hngak cang lai' ka ti. Kan itthen. Ka vaak luala. Hmaan kaa thla. Tlawmpal ah, 'Lasi hnu i keimahpi lawng hmaan kaa thlak' tiah ka ngol.

Uber (taxi) hnu nawn ah a ra. "What is your flight time?" a ka ti. "Eleven forty-three" ka ti. Na hnut ttung lai' a ka ti i arannak in a mongh. "Duhsah khaan mong ko. An in tlaih sual lai" ka ti. Mah na cun aa nam. Ka flight ka tanh lo zong ah next flight ah ka zuang te ko lai tiah kei ka zei a poi lo. Ka flight time an rak thawn ilawng bual ka phanh ah zuan a cu bakte a si. Hnangam kaa miak.

Vanlawng cung ah wine kaa cah lai i kan hmanthlak ka zoh leen lai ka ti. Kaa tim. Kaa cah (free a si). Ka phone kau nalak ah a battery a dih i a thi. Ka tleu. Flight attendant minak ngaknu nih zu phun cu leng in a rak nam hna i, ‘a duh mi nan um maw’ a ti. Aho nih an hlam set lo. A ka zoh i, “Heh, na duh ko khah” a ka ti. Khua nuam ruat bu in Indianapolis mui chupchap ah ka phaan.

A thaizing ah kan hmanthlak cu ka zoh. Vei cu ka ngai pah, ka uai pah. Text message oi khat/hnih kan ikua. Mah vial kha za cang ko seh, co rua lo pi, ka ti. Upat hnu i leng zuun ngaih awk te ka ngeih cu khua thilpek bantuk.

Atang i hla hi ka lung ah a chuak:

Audio: http://robawm.com/Mizohla/Van/track2.mp3

TLEITIRAH TLEITIRI
Phuah: PS Chawngthu
Sak: Vanlalruati

Kan intawhna lam kawiah,
Lungrualna dai kawnah;
Enchim loh Thadangi zun,
Aw, thinlaia’n a cham.

Tleitirah Tleitiri,
Zalengah Lengdawni;
Kei ka tan lungrun Ngaihzuali,
Run lum thaiah ka ti.

A heh lah chul zozam iang,
A ttawn sam ttha sei hniang;
A sakhmelah iang zo awm maw
A tangnem vur ang var.

Chimloh tha bung dawntuai,
I zunah val ka uai;
Relthang dawn lo nemrang puan maw,
Nemrang puan min zawn rawh .

A zun a zamin a cham,
Thinlai lung lai a kham;
Hraitin chawiah hual ang che,
Hual rawh Khuanu ka tan.

Annem ttha Thanghniangi,
Tawh chang ni her leh rawh;
Biahthu hrui ang thlun zai rel i,
Khua tlai i dawn lo em ni?