2011 kum Indianapolis Lai Phunpi Ni donnak paih

2011 kum Lai Phunpi Ni donnak paih nuam ngai le sungsa ngaite in aa tuah, Indianapolis ah.
Hniarlawn Kap Tawng nih patthawng Aung Kyaw Lin le patthawng Tha Biak a tei hna i bual a co.

Hniarlawn le Halkha hi hlanlio te i aa pai tawn cia an si. Hauka sa zawh nak ah, nupi tthit ah, lungdonh ah, changden ah, rianhma lim ah. Lai Phunpi Ni i paih aa tuah tik zong ah 1980's hnu pi tiang anmah khua hnih lengmang hi aa pai mi an si. Hniarlawn le Khuahlun an ipaih chel, an ibawmh i Khuathar an paih hna chel a si. Chan a thar cun Nabual ko khi an paihbual a si. Nabual i puai a um poh ah Halkha an rong, Hniarlawn an rong, aho kawh lo in. Zuri i Nabual rawlkho an pahpiak dih hna hi a voi zeizat hang dek a si an ti. Nabual cu phun hna hlah, zai hna hlah.

Mahti i aa hawikom cia cu si hna kaw paih caan a chuah ah cun an ihlam ttheu. Indianapolis ah Halkha khuahlun tlangval aa pai kho pa sarih/riat an um i, um a har ai apaih tal ipai tuah usi tiah Hniarlawn pawl an sawm hna. Hniarlawn cu aho set an um lo; pahnih an um i paih tlak an ti lo. Halkha cu anmah le anmah an ipai. Tha Biak nih bual a co. 2008 kum ah a si. A khumvoi, 'Hniarlawn nan tlawm tuk ah Mie mi zong sawm hna u law ipai rih tuah usi' an ti hna. Hniarlawn pawl cu an itong i, 'Mie isawm a hau lo, Hniarlawn lawng he ipai ko usi' an ti. Mah bia cu Halkha chimh an hngal hna lo. Tik ah, Halkha nih tlaang paih in an rak paih hna. Hniarlawn nih midang paih itim lo in Halkha lawng cu an or hna. Halkha pawl an dih deng ah mah cu an hngalh. An iawh-ah kar ah paih a dih i 2009 kum cu Kuhchah Chia Mang fapa Siang Cung Lian nih bual a co. Hniarlawn le Halkha ipaih an tlolh cu an sia a herh tuk i 2010 kum kha an itim tthan. An ipai i Hniarlawn nih an tei hna. Cinzah Ngun Ceu Ling nih bual a co.

2010 kum ah sungsa ngai in paih bual aa ser cang i, 2011 kum hi zeitin dah aa tuah lai ti in paih lei lairel pawl an icaih. Anmah nawl in North America Paih Committee an iti i upa 16 nih khua an khaan. Metting oi li an tuah.

Ahramthok ah cun hiti hin an ti: Aa pai ding mi hi minung 32 veve in phu hnih ah--Hniarlawn Phu le Halkha Phu ah--tthen. Mahle paih ding mi cio awngbali in zuh. 32 tlongh i 32 taan; a taang mi 32 cu 16x16 in tthen. Mahti cun a dongh nak ah a tthawng bik taan te ding. Minung 6 tai hnu lawng ah bual co ding. Mah khuakhaannak cu a ttha ngaite ko nain aa pai ding mi nih an duh lo. A ruang (1) mah le mah kan itong lai i ipaih kan duh lai lo i, kan itlai sawhsawh lai, kan ikian lai i paih a nuam lai lo an ti; (2) Lai Phunpi Ni cu zaapi ta a si i Hniarlawn le Halkha theng ipaih cu aa dawhhoih lai lo. Asi kun ah cun, team 2 min hi cu Hniarlawn Team le Halkha Team ti in taang ko seh law, azuhzuh lo in ipaih si seh. Minung 20x20 in laak si seh ti a si.

Halkha lei ah cun Halkha (Khuahlun le Khuathar) 15, Thau le Salen he an dihlak 20. Hniarlawn lei ah cun Hniarlawn 13, Zephai 1, Khuabung 2, Matu 1, Beute 1, an dihlak ah 18 an si (20 si ve ding a si na'n an deuh hna). Hniarlawn Team cu pa tlangtlang. Pawng 170-200 (70-80 kg) hi minung 11 an si lai tiah rak ruah a si na'n Chuncung 2 an izuk i, 9 ah an taang. Chuncung Bawi Chum le Tluang Kip Thang cu Hniarlawn sin ttum ding in upa nih an ti i Hniarlawn sin ttum cu kan duh lo e an ti, Chuncung lungkhon cu. Bawi Chum i a chim mi belte cu, mifanau, "Kaa pai bal lo i ka tthawn lo sual ah hmualchiat ka'n phorh sual hna lai" ti a si.

Halkha Team cu Tha Biak le Khuathar Lian Thawng lawng pa ngan an si. An naule cu an hme. Asina'n paih an thiam. Halkha Team i an khaatpi cu Tha Biak, Aung Kyaw Lin, Tial Ling le Tial Uk. Hniarlawn lei khaatpi cu Kap Tawng, Tum Hmung, Ngun Ceu Ling le Ram Tling. Hniarlawn lei hi atam-u cu an tha lawng a si, tluuk le vuak an thiam lo. Tha reet zong an thiam lo.

Atu tan paih hi a nuam ngaingai. Paih kal a ttha niahmah. Hnahnok buaibai an um lo. Bia a tam mi zong an um lo. Paih dawh te in an ipai, paih keel te in. Neekngeih paih, thinhon paih, ziarngeih paih a um lo. Halkha lei kan naule nih an thiam in an leklak tuk. Mahhna hi an si cang ko, Halkha Khuahlun i paih tthawng kan ngeih mi hna. A Halkha Khuahlun taktak zong ah aho an taang ti lo. USA hmundang zong ah an um hlei ti lo. Malay zong ah an um hlei lo. Atu i hi kan misunghar an si.

Hniarlawn kan naule zong atu hi an iruan lio te, an tha aa fun lio te a si. Tlin cu an tling lo. Midang an um pah rih. Texas ah, Malay ah, Indianapolis zong ah a herh ah cun a chuak ding an um rih. Duhlo thlak te i chuah ah cun 20 zong 30 hmanh an ikhawm kho hnga (a tthawng lo he cun ti bia). Asinain mithim 13 cu tthawn an ser ah cun an tlawm lo. Zophei lei an kawile nih tha an pek tuk fawn hna, an kilhkamh tuk hna. Atu tan hi kan puai nuam a si ko lai. Khumvoi cu kan chim kho ti lo. Atu tan dawhte le nuamte i kan ipaih khawh nakhnga, kan Lai zaanglek kan sunhlawih khawh nakhnga, kan miphun lungtthawn kan pek hna nakhnga, dawhte le nuamte i ipai ding in Pu Ang Cung nih bia ttha ttha a funh hna. Tha a pek hna. "Ka naule" a ti hna i lungtho tuk in a tuah khawh hna.

Nikum an ipaih ah Halkha lei an thawh a chia. Tukum tal thawh a tthat lo ah cun Hniarlawn nih an tei khawh hna mi a si. Paih ah oi hnih tai cu tai taktak a si cang ca ah ttan taktak a hau. Atu an thazaang aa fun lio, an pa tthawng an tlin lio te i an pachiat hoi sual ah cun paih nolh zong an tha a chia kho.

Thlacam in paih bual cu an kau. Halkha lei cu an tling. Hniarlawn lei cu an tling rih lo, tuan tuk ah rak thok hna maw. Uniform Halkha lei nih anak an izuh. Dau chiat thlam an leng e tiah Hniarlawn nih an ti hna. Nikum zong anak an ting cang.

Halkha lei cu state dang in minung pa li hrawng an ra. Khuahlun Chan Hmun le Cawbuk Peter, Khuathar pathum. Adang cu Indianapolis-um lawngte an si. Hniarlawn cu Texas in pa hnih, Illionois in pa khat, Utah in pa khat, Iowa in pa hnih, New York in pa khat, Michigan in pa khat. Indianapolis-um pa nga. Khuathar Lian Thawng le Hniarlawn Tum Hmung hi atu tan aa pai mi ah a rit bik pawl an si. [Khuathar Lian Thawng cu Lai Forum i ca chia ttial an rak puh i an puh khawh lo mi kha a si.]

An itimhlamh ning: Hniarlawn Team cu khuadang i a um mi tam hna kaw paih cinhpi tu an ngei lo i fitness exercise lawng an ngei. Halkha Team cu rianttuan mi lawngte si hna kaw paih lawng an cinh i fitness exercise an ngei set lo.

Kan theih ning ah, Halkha pawl cu zarh fatin caw an that, paih an cinh e an ti. Hniarlawn pawl cu, Lai thah mi sa cu a ttuamttaam a tam tuk i sa ttuamttaam cun an tthawng lai lo e, dawr sa ttha bakte kan cawk ko lai e an ti. Tlangval tam hna kaw rawl lo dok i a chang mi an si lai i an phanh in sa khonh an hau an ti. Khual phanh ni cu, Zing Bawi nih a fale a ngalhtaak hna i sa-ttha kawl ah a vaak. Walmart ah cawmei va caw hnek kaw a rak thiang. "Cawmei Halkha nih an cawk dih" a ti, a ruahnak in. Lam aa hlat chom i caw thah nak dawr ah cawmei cu veizat a va cawk. Khual a ra ding mi atam-u hi a inn tlung ding an si i sa in a cenh hnek hna. A phaan hmasa ca'h cawmei cu umpi khat in a cuar. Zan khuahnu i a phaan ding ca'h um dang in a cuar rih. A thai chun ca torlak a chumh. A caw mei a dih cang rua a ti ah, zanriah ca'h fun ruk a taang rih. Caw mei cu ba cuar in a cuar ko. Paih ni i duhtawk ra ei awk in sabuti vei zat a chuan rih. Rawl cun a khah bak hna. A zawt bak ve.

Nikum Kap Tawng paih an hmuh hnu thla khat kha cu paih kong le Kap Tawng kong leng an caih khawh mi a um lo, Indianapolis khuapi. Malay lei ah le Aung Kyaw Lin kha a min a thang tuk ve. Mahhna pa hnih itong hna seh law aho dah aa tei hnga ti rumro an ruat. Tukum an itong lai i kan zoh hna lai ti in micheu an i-betting. Nu pawl a betting i paih a zoh ttung lo mi zong an rak um an ti. Halkha nih Aung Kyaw Lin an zumh tuk. Kap Tawng an ttih pah. Hniarlawn nih Kap Tawng an zumh tuk. Aung Kyaw Lin cu an ngamh pah cio. Zing Bawi cu aa laklawh: Kap Tawng nih bual co seh ti le a duh, Aung Kyaw Lin he Halkha ah saupi chung aa theihngal cia an si i Aung Aung sungh ding cu le a ruat kho lo.

Aung Kyaw Lin (kum 25?): Khuahlun Ram Hre a ra au i, "u Hlun, Aung Kyaw Lin khi a hmet te ko hen khi" a ti. "Awh, a phaan cang maw?" tiah ka ti. "Nan inn pawng ah pei aa chawh lengmang ko khi. Na hmuh lengmang ko lai. A tthawng taktak ko hnga maw ka ti" a ti. "Amah zoh hlah ngat. A tei mi zoh hna ngat" ka ti. Ni tlawmpal ah Aung Aung cu a kan leng. Mah hi a si e an ti. Ka von zoh le ka von chawnh cu, a mit-au, a biachim, a nem tuk. A mui nih aa dawh. "Mah tluk mi nunnem le mi duhnung hi" ka ti. Dawt awk tuk in a um. A titsa khat citcet te'n. Cakei titsa bantuk. [Judo school ah] "Bend up oi za nga a tuah khawh an in ti, a si maw?" ka ti. "Kan pu bik a thin a hun i a kan hrem caan vui khat vui hnih te khi a si. Punghman kan tuah mi cu vui 300 a si" a ti. "Hniarlawn pawl nih, khumvoi cu Aung Kyaw Lin a hong lai i a kan vuak dih te ko lai e an in ti ko khah. Tthate'n itimlaam, ekseksai zong tuante'n tuah" ka ti. A ni.

Paapi a tlai kho ding a si maw tiah keimah le keimah bia kaa chim. 'Si ko e. Dan Mang zong mah ngaw hmanh a ti lo na'n pei pa ngan ngan a hlorh ko hna cu, aho nih dah an tei i? Ruang Vai a rak tei tu Al Cut zong mi tawite te pei a si ko cu. Ngun Hmung pa Ral Cung hi pa hme te a si i a tthawng ngaingai ve i, "Paih cu pum nawl a si lo; pa ngan pipi zong ka ttih hlei hna lo" a rak ti.

Ahnu thla khat hrawng ah Aungaung cu ka hmuh tthan. A titsa a zor tuk. Mawttaw thlalangawng in ka hei auh i, "Ekseksai cu na tuah cang maw?" ka ti. "An duh lo eh, ka u. Inn hlaangtu ah na min aa tel lo e an ka ti" a ti. "Ei zong icenh pah" ka ti. "Ka thau a fawi tuk i kaa cenh ngam lo eh, ka u" a ka ti hoi. Mah hnu ah cun sizung ah a um. Ka lau. A chuah lei ah kan ihmu. Ahnupi ah, "Na damlo nih paih a'n dawn lai maw? Asilo ah naa paih ah phaan awk a um lai maw?" ka ti. "Vui khat kaa piah rih lai i mah cun a fiang lai" a ti. Mi kaa in 'CAT scan an tuah i a zawtnak a um lo an ti' e ti ka theih. Ka hna a ngam. Ka phaanpiak mi cu, a tha a um sual lai lo i minthanglo nih zaanghruum in an tei sual lai ti a si. Hniarlawnmi i an tei ah cun a poi lo; Hniarlawn le Khuathar he cun an itong tthan lengmang ko lai i, atu i an tei zong ah a chuahhnawh tthan te ko hna lai. Khuadangmi i an tei belte ah cun ipaih ti lo in an lo dep lai, chuahhnawh awk an ttha ti lai lo, anmah hma in a dai lai, i an chanchung an ichim sual lai ti ka ruat. Mi sawhsawh i tei sual awk zong ah ka siang lo.

Kap Tawng (kum 21): Bual Hei pa an ti i Hniarlawn ah hin mi nganpi, mi tthawng taktak a rak um. A kawng ruh zapar in a thuk e an ti. Bual Hei zong cu a min bang in paih a tthawng ngaingai.

Pu Khi Mang chim ning ah Senthang peng khua khat zong amah lawng dok nih a rak hlorh dih hna. Bual Hei fanu ah cun dingdawng ttha pi Sai Thlia a um i Sai Thlia nih cun Kap Tawng hi a hrin (a pa Hniang Uk). Kap Tawng hi pa si hlah seh law a nu he nan palh ko hna hnga. Kap Tawng u Duh Hnin hi a hme nain a far va ngeih ah Hniarlawn tlangval 12 a kherh hna i bual a co. Kap Tawng nau hi atu Malay ah aa pai ve i bualcopa Hoi Chum nih a tei. Kap Tawng hi Lai Ram a um lio ah a ngakchia deuh rih i bualpi ah aa pai manh lo. Nikum kha bualpi a chuah cu a si. Chuah ipalh hlah seh law nikum zong kha bual a co colh hnga. Mi nunnem te a si. Dallas ah a um i paih ruah ah vanglawng in amah lawng a hon hi a si. Nikum zong hawi he an hong cang. Paih kong ah a chim mi cu, "Aho hmanh hi ttihhu ding an si lo, nehsawh ding zong an si lo" a ti. Paih ni cu paih tanh fang in kan pawhpi i, kan kal lai ah cun, "Play like a champion" tiah bia kan cah taak.

Paih ni cu a phaan. Paih cu puai dih 5:00 pm in kan thok lai e ti a rak si. Asina'n Pu Van Ceu Uk nih paih caan um deuh seh tiah puai cu a hnawt hna i 4:30 pm hrawng in paih bual cu aa kil cang. Pastor Lal Cung Awi nih thla a cam: an ikhawnden lo nakhnga, isikvelh a um lo nakhnga. Hniarlawn in an tei hna nakhnga zong a cam menlai tiah an ruat lai nain a nupi hi Halkha Khuahlun a si i, a ngamh tuk ve lai lo. Mah dih cun Utah state i Pu Khi Mang le Pu Uk Ling nih paih bual cu an kau (an ipai).

Paih hmun kan phanh ah cun mi an rak sawp cang. Hnittial le cawngnak puan he Lai ngaknu no tete, hrukpi le tthirual he acheu. Pasal ttha ttha nih mibu an kilhkamh. Nutung zong an naupuak tete he an rak dir cio. Acheu nih an semno an ipom hna. Tar kum 80 cung zong um ve hna. No le tar, nu le pa, kan tling. Thap zeizat in dek an dir hi a si! Paih hi pa nih dahra kan duh deuh tiah ka rak ti. A rak si lo; nu ko na zual. Nu hmanh a tthawng mi cu kan uar hna si kaw, pa chinchin cu zei dah chim a hau!

Thap zeizat in dah an zoh, rel tuah u. Minung thong khat le thong hnih kar kan si lai.

Paih zoh ah hin ttanh aa khat mi hi hmunkhat ah tthut-tti ding. Pawng mi he isik sual a fawite.

Phung kan ser mi i kan ipalh cikcek mi cu acung i ka langhter khun mi hi a si: 'kheel khat veve an ithlak ah cun kheel a thla hmasa nih tei" ti mi hi. Aziah dah a tthat lo ti ah cun, pa khat i kheel khat a thlaak cang hnuhnu cu laak awk ttha lo in a beek, a chang rumro i zoh awk a um ti lo. Paih ti awk zong a tlaak ti lo. Mah bantuk cu atu tan paih ah hin a um lengmang. Faak taktak in kan ipalh. An itluk ah cun oi tam-u a la mi tei ah tla seh tiah rak khiah awk kan si.

Paih caanchung: Team paih hi a biapi cu a si lai; nain aa pai manh lo an um sual ah hmuncaan serpiak hna usi kan ti i bualco a dih in "singkhaw" ituah seh kan ti. A caan zoh in minung 8x8 si hna seh kan ti chung. Mah vialte ca ah cun suimilam 6 tluk a herh tiah kan tuak in 5:00-11:00 pm hrawng kan itinh. Bualpi paih ah hin paih voi 37 a um (Hniarlawn lei an tlin lo ca'h). Minit 9 chung lengmang ipaih si seh kan ti. Mah cu mi tam ca'h cun a za pah ko nain itlaih le thasau le lungsau tehna zong izuam a si ca ah pa tthawng ca'h cun a tawi deuhvak. Bualco nak paih taktak ah cun kheel hnih aa tei an um tiang hrimhrim caan pek ding a rak si, kan rak hngal deuh lo.

Paih tlaangtla: Hniarlawn Za Iap, Khuathar Thawng Lin, Khuathar Nawl Khar, Hniarlawn Van Uk, Dauchim Siang Herh, Zephai Hrang Tum. Ahoho dah bual-uk a ttuan lai ti cu anmah icaih hna seh kan ti. Pu Nawl Khar rian a off kho lo i a zaka ah Pu Tin Hre a lut, aa pai hnek tthan lo i. [Zephai Hrang Tum hi Cawk Uk he aa paih lio i ttheng i a kiahtaak hna mi a si, Thantlang ah.]

Paih dawh: Ruang Vai tehna chan in atu tiang paih tuanbia chung ah, Pu Hram Cem tehna zong mizei zong i a paih aa dawh bik an ti cio mi le an philh khawh lo mi cu mithi Sang Hmun a si. Sang Hmun paih cu pasal paih, ziarzar ngei lo, zia thiam ngei lo, ralchiat ngei lo, tei zong ah fiang bak, relte i tei, mah laak mi te i kheel ser, a si. Nikum Kap Tawng paih kha Sang Hmun paih bantuk nawn a si ve an ti, a hmu mi hna nih (Kap Tawng pitar le Sang Hmun pa cu tta-far). Asinain, atu tan Kap Tawng paih cu aa dawh tuk nak a um theng lo. Tha Biak he patthawng paih in an ipai; nain Tha Biak cu a tthawng ve, a rit ve i Kap Tawng nih aa harh nawn. Dawhte in a hlorh kho lo (remte cun a tei ko).

Atu tan Kap Tawng paih nakin Halkha Chan Hmun paih aa dawh deuh. Chan Hmun cu an laak hnek ah aa chit ko. A zei te a poi lo. Ee-ee se-se bak. En chom le leh chom mi tei zong a duh lo. Chan Hmun paih a ttha bik ti tluk in ka ruat. Tthawn zong a tthawng. 'Hniarlawn zong ah pa sarih hrawng a rak kan hrilh cang' an ti. A kut ihrawk hlah seh law atu tan zong ah tam nawn a thluk men hna hnga. Atu hi a u Tawk Hmung i aa paih a hmuh a si ve rua.

Atu tan i "pasal paih" an ti cio mi cu Tum Sang. Aa thlir hna i fiangko fiangko in a vuak ko hna, an thal bakte in a nenh ko hna. Tum Sang paih hi pei pasal paih taktak cu a si hi an ti cio. Tum Sang cu aa pai tuk cang mi a si. Paih bual aa ser nak poh ah a um ko ttung ah cun paih lo a duh lo mi a si. Minung 11 tehna a rak tei bal. Chan Hmun le ipai hna seh law an ikhan tuk nain a umtti mi an si i Chan Hmun nih chuahhnawh a duh lo.

Pathum Tei: Minung pa thum cio a tei mi minung 7 an um. Halkha lei in Ral Kam Ceu, Tial Uk le Aung Kyaw Lin. Hniarlawn lei in Tum Sang, Tin Mawng, Tial Hmung le Tum Hmung. Pathum nak tam a tei mi an um lo, an rak tthawng tuk cio i.

An ipaih ning ka zoh tik ah ipai hna seh law zoh an nuam bak hnga ka ti mi an um.

(1) Aung Kyaw Lin le Tial Hmung: Mahhna pahnih hi an thiam mi (kehlei thangerh) zong aa khat, an pum zong aa ngaw nawn, an tehcawl tthat zong aa khat, leiri i ralser le tluuk an thiam ning zong aa khat i, sau ipai hna seh law zoh a nuam tuk ding an si. Nai an ipaih ah cun, Tial Hmung aa ralrin hlan ah Aung Aung paih tam deuh nih cun, a ngalh colh. Khel khat. An thawh i an tehcawl taktak hnu ah cun an thiam tuk veve i chizawh seh cio an si ko; zeitin hmanh an iti kho veve lo. Caan nih a dihtaak hna. Caan sau ipai hna seh law aho dah aa tei hnga aw ti lawng ka ruat.

(2) Kap Tawng le Tum Sang: an paih a ttha tuk veve, paih an thiam tuk veve, i ipai hna seh law azoh an nuam tuk hnga. Kap Tawng nih a tei men ko hnga; nain Tum Sang nih, "Kan ngakchiat lio ah cun Kap Tawng tehna cu ka tei dih hna" a ti.

(3) Tha Biak le Tum Hmung: an pum aa ngaw, an tha aa ngaw. Paih thiam tuk lo, thiam lo tuk lo veve an si. Aa tong rua te an si.

Nikum kha Ngun Ceu Ling nih bual a co. Kap Tawng thazaang tampi aa tel.
Tukum hi Kap Tawng nih bual a co. Ngun Ceu Ling thazaang le khuakhaan aa tel ve.
Ngun Ceu Ling hi paih aa ngaih tuk nak ah a zaw i mekkalawng an ziah i a thawhka a si.
Aung Kyaw Lin nih kheel khat le caan dih in a tei. Midang zong mahti ngawt cun a tei hna.

Tum Sang le Ral Kam Ceu. An tthawng bak veve. Ral Kam Ceu cu bual a luhka hin ka zumh tuk cang.
Tum Sang tu hi cu pathum a tei hna hnu a baat hnu a si cang, atu hi.

Atu tan aa pai mi ah Tin Mawng le Tial Hmung an fit bik lai. Tial Hmung cu saram tluk nawn in a fit ko.

Tial Hmung nih raal zoh nawn in a zoh cia hna hita, cakei sa zoh in. Tial Uk he an ipaih lio.

Ka pa min sak Lai Kuung Hlun (minkeep Nawl Ceu). Vangkheen in a "tthial" lengmang hna.

Kan pa chuakthiam Van Ceu Mang (200 lbs). Kum fatin ekseksai a la i aa pai kho bal lo. Tukum a la ti lo i tukum tu aa pai.
Anih cu a tha zong fawite'n a ba lo. Paih thiam deuh seh law tam deuh a hrilh hna hnga.

Ral Kam Ceu le Tong Sang. Matu Tong Sang hi a tha a tthawng bak nain Halkha paihthiam sin ah cun...

Tial Ling hi an pa rinhchanh a si. Kap Tawng tlai tu ding i an rak ti nawn mi a si.

Bual-uk Tin Hre le Hmung Lian.
Zing Meng inchungpa Zephai pa tlangpi paih-thiam-lo a chuak i, saram tlaih in Tial Ling a tlaih i a vuak. Rak laak awk zong ttha hlah, paih thiam zong zei santlai hlah. Zephai le Hniarlawn cu paih aa chaang mi an si, Halkha lio te'n. Tial Ling a kir hin Halkha lei kan naule an tha a chia nawn. An paih chaan ding ning an rak suai mi zong a rawk dih.

Paih zan hi Zing Meng te nu-pa nih tlun-inn an kan onh i rawl an kan chuanh. Bualco an kan lawmhpiak kan ti lai.

Aung Kyaw Lin a tha a tthawn ning cu! A kuaih hna ah kual lengmang in a kuiah ko hna. A doh hna ah tung midoh cio. Ngun Ceu Ling nih, "Aung Kyaw Lin cu, hnuh khawh zong a ti lo" a ti. A zawt damka a si i a tha a um lo e an ti; mahti leng hin zeiti hlei in dah a tthawn ti lai, minung mah ngaw nih hin? Vui sa hmanh in cenh u law mah nak hin cun a tthawng hlei ti lai lo.

Ram Tling nih Aung Kyaw Lin hi adih in a dih. A il dih hnek. Pa tthawng nih cun lim bang aa iin ko i ral a serh ciammam i amah tu a nenh ko. Kheel khat le caandih in a tei. Paih a dih in Ram Tling cu a ni huahmah. AKL nih "Nangmah nih dahkaw ka tha na ka chah dih!" a ti. Zoh ko u; bual chung ah cun aa that lai an lo himu. Bual leng ah cun hawikom keel.

Khuathar fa paih bual an luh ah cun cakei dahkaw an lawh. Hniarlawn Ngun Hmung nih tha cun a tei, thiamnak cun Khuathar Zung Ceu Bik nih. Zung Ceu Bik hi cawlcangh le tlukngalh a thiam tuk. A paih zong aa dawh. Paih dawh bik laksawng pek awk belte a tlak lo nakding a um; (1) A kut hnih in mi vaang a cawi. Paih ah mah cu a um bal lo. (2) Mi hngawng a kup. Hngawng kuh a ngah lo.

Tum Hmung patar le Kap Tawng nu patar hi Hniarlawn pa tthawng chimkeem mi an rak si. Tum Hmung nu tta Ngun Peng hi Caw Uk a rak tei tu kha a si. Mah lio ah cun Caw Uk cu an tei lo nak a sau tuk cang. Atu bual-uk Za Iap nih hin Mang Chum a rak tei; nain tei ah an relpiak lo. Mang Chum tu nih cun, "Za Iap nih khan a ka tei" a ti. Za Iap cu thangerh pi-ngia-shin a si.

Khuathar Lian Thawng hi New York in a ra. Paih ni hi a tlun-inn rawl an chuang lo ti bantuk kan theih. Rawl lo dok in aa pai rua tiah kan ruah, zaangfaak in. Tum Hmung he aa pai ding bakte an si.

Halkha cu lung an ngei, tei an rial. Paih an he. Tluuk hnu i leh le keu le en an hmang. Hniarlawn cu tei an fahsak lo. Tei an rial ning a niam. Tluuk cang hnu ah mi an let in an thal ti lo. An tluuk cun an ngol ko hna. An ithal le thal, an ithal lo le laak tthan.
Halkha cu tha lawng an hmang lo; thluak an hmang. Hniarlawn cu ngian an thiam lo. An sungh tik belte ah, fiangte'n, "A ka tei" an ti. 'Cuti a si ca'h a ka tei' e, 'ka der lio a si ca'h a si' e ti tehna an chim lo.
Halkha cu paih kuat an ngia. A kuat a tthat lio te ah ral an ser. Hniarlawn cu paih kuat an ngia lo. Amah nih ka la seh ti zong in mi an rinh tuk lo. Anmah lengmang nih an laak hna.
Halkha cu tha hman an thiam. Tha chuah a herh nak te lawng ah tha an chuah. Mi tampi paih khawh nak tiang in tha reet an thiam. Biana ah, Aung Kyaw Lin hi minung 10 a paih khawh hna lai. A ba tuk lai lo. Hniarlawn cu thareet an thiam lo. Vukvek tiah an tha a dih-um nak in an cawl i mi tampi a pai kho ding tiang in an tha a sau kho lai lo.
Halkha paih cu paih taktak hlei ah en le foih tehna a um pah i mi tei nak ah a ttha. Hniarlawn cu an paih aa dawh.

Midang paih i tlaang an tlaak ning cu a hmaan dih lo hmanh ah a hmaan mi a tam bik lai. Tum Hmung le Aung Kyaw Lin paih belte hi chimrel awk a tam. Very critical a si. Tuan deuh ah Tum Hmung nih kheel khat a vuak. AKL nih a vuak ve. An tluk nolh ah AKL hi aa thal i, a paai in a tla tiah paih zoh tu nih an ti. 'A paai zong pei aa domh kha, a paai in a tla ko' ti zong ah paih tlangtla hlun Pu Tin Tawng nih a ti. Asina'n bual-uk nih mah cu kheel ah a relpiak lo. An ipaai tthan i an khupkhabu in an tla (acung i hi). AKL nih heh tiah a leh, a en. Bual-uk nih a zohsawh ko hna. AKL i a leh dih hnu tiang (4 secs) a hngah hna hnu ah firik a tum i AKL tei ah a chiah. Bual upa Van Ceu Uk khuaruah a har. "Aziah kan phungser ah leh chiat kan ti a si lo maw, khiti khin a lehter ne?" a ti. Zei chim awk ka hngal lo. Hniarlawn mi nih cun Tum Hmung tei bak ah an chiah. Bualuk hi Hniarlawn Za Iap a si i AKL a ttanh a si hnga maw ti tik ah, mi-ttanh a ngei lo ti i ruah mi a si.Halkha ral aa veng a si hnga maw ti tik ah a si lai lo ti a si. Aziah dah kan paih phung i "leh a ngah lo" ti le "a paai i a tlak ah cun tei" timi a zulh kun hnga lo ti a um. Mah phung an ser lio ah metting a kai lo i phung ser thar hi aho nih fiang in an chim lo; cun, bual chung i an rel lio ah aa manh lo lak si in a thei lo zong a si kho.

Tum Hmung tei in hei um seh law, Tum Hmung hi bual a co kho. Tha Biak lawng a taang cang i Tha Biak he cun an tha le a pum aa ngaw. Paih thiam lo tuk an si veve lo. Kheel cun an itluk men hnga; nain Tha Biak nih cun a la bal hnga lo i Tum Hmung ttheu nih a laak hnga si kaw, "a la tam deuh nih tei" kan ti ca ah Tum Hmung tei ah a cang men hnga. Bual a co hnga.

Tum Hmung i bual a co ah cun Kap Tawng paih awk an um ti hnga lo. "Singkhaw" ah aa paih a hau hnga. "Singkhaw" laksawng a laak ah cun taisawm vialte Hniarlawn nih an isawmh dih hnga. Asina'h mah taitai cu a hau theng lo. Bual te an hei co ah cun a za ko.

Video le computer he kan um ko nain khuate style in lai kan rel i video i von zoh colh le von hliah colh kan ngei kho lo. Tum Hmung nih hin Aung Kyaw Lin hi Hniarlawn ah a rak tei bal cang. Atu tan AKL nih a tei ve. Khumvoi aho dek. Tum Hmung nih a bawh ko.

Kap Tawng nih hin Aung Kyaw Lin hi ralringte in a paih. Mi hme cu vungveng ti in la sehlaw a thluk colh khawh men ko hnga nain Aung Kyaw Lin cu neek awk a ttha lo. Mi tthawng/ngan pipi zong a ngalh hna tik ah Kap Tawng zong cu a daithlang ngam ve lo.

Cun Aung Kyaw Lin le Kap Tawng an ipaih hi zoh a nuam rua tiah ruat hlah u. A nuam nemmam lo. Unau velh bantuk. Patthawng pipi i mahti i ipaih hna cu. Aung Aung paih cu tihin a si: ruahlopi in 'lak' tiah aa let lai i khelcungchuan in dahra a laak hna lai ti ah, kehlei thangerh in a ngerh colh hna lai. Lim mingerh tluk in a rang i ipheet manh ding a si lo. Anih cu a tha hram in a paar tiang ngerh nak ah a hman. A ngerh khawh hna hnu ah khattelei ke a chuah i, a ke cu a cikalh hna. Zeiti hmanh in iphoih awk a ttha lo. Mah cun an liang in a tlaih hna, an baan ah aa awk i thil bah in aa bat. Mah pah cun an vaang a cawi hna (duhsah thahlengphelh kan ti lai). Abah cun ibat kaw ngalh awk a ttha lo. Hmai i an khawh ah an ke ke khat aa tlukpi lai. Tluuk pah ah ral a ser lai. A en hna lai i a thal men ko hna lai. Kap Tawng hi mahti cun a tuah; na'n beh in an tlu. [beh = rello]

Tha Biak hi pa chuakthiampi a si. Lih Wrestling i Undertaker bantuk khi a si i bual a kilh ngaingai. Siikaan a ngei i ekseksai a tuah zungzal mi a si. A fit zungzal tiah kan ruah. Tukum hi a naule paih an cinh ah idek ve law an ti tawn i, "Kei cu kaa pai manh lai lo" a ti hna, a naule a zumh tuk hna i. Zumh awk zong cu an si khe. Asina'n khattelei an thawh a ttha ve i amah chuah a hau ve.

Tha Biak hi Kap Tawng paih ah aa ralring ngaingai. A ke hlaan le a cherhchan an hmaan tuk. Kap Tawng lengmang nih a laak. Tha Biak cu tthawng in rit tuk kaw oi khat a laak cu a chei lo i amah Kap Tawng tu a ngal. Tha Biak nih kheel khat.

Mah hnu cu oi hnih an tlu i beh veve a si. Oi khat cu Tha Biak nih ka hrilh cang tiah a ruah. A hon ilet i a zoh cu Kap Tawng aa thal lo. Tha Biak khuaruah a har. 'Aare!' a ti lai. Kap Tawng nih Tha Biak tei cu aa harh bak (amah zong nih a chim). Paih caan minit 9 le a dih deng. Caan i a dihtaak hna ah cun Tha Biak nih (khel a thlak hmasa ca ah) a tei ding a si. Hniarlawn cu an ttap dih deng cang. Nu ngakchia pawl cu thla kan cam e an ti. Bual upa pawl zong nih, "bualco aa cuh mi tal hi cu caan sau deuh rak pek hna ding kan si" ti an icaih cuahmah. An bia ka hei ihrawm lai ka ti i ka hei imer khap te ah Kap Tawng nih a von vuak. "E khih, a tei!" ka ti. Kheel hnih nak a tei a si. Relte in a tei, a nenh. Mah cu caan a dih lai sehkanh tlawmte aa duh ah a si. Kheel hnih a tei bak ah caan a dih ve.

Tha Biak zaka ah hin Aung Kyaw Lin rak um seh law bual a co hnga. Zeitin tiah, Tha Biak nih kheel a thlak hmasa sikaw mah hnu ah an ivuak ti lo ah cun amah tei si ding a si. AKL nih cun laak awk ttha lo in aa pheet hnga, a beek hnga, a perpe hnga i caan nih a dihphuat hna hnga i amah tei ah a cang ko hnga. Si hmanh seh, Tha Biak cu mahti ttukttak i bualco a duh mi a si lo; pasal paih chuah ah ciammamte'n ta kan ipaih lai i kheel tlingte le reelte in kan itei lai, zaang cuai si fam na lak ah, paih ah pei kan chuah cu' ti in paih hrimhrimte i ipaih le aa tai mual itai a duh. Mah cu pasal lungput a si. Bual a dih cun, "Aa, na ka tei" a ti i an ikup i hmaan an ithla.

Q1. "Bual co lai hi naa ruah cia pah maw?"
A1. "Kaa ruah cia pah ko. Tukum cu ekseksai zong thla hnih hrawng in kaa tuah cia."

Q2. "Aung Kyaw Lin na paih ning kha ttih paih in a paih e an in ti. A si maw?"
A2. "Kaa ralrin bia tu a si. Ttih tu cun aho hmanh ka ttih hna lo."

Q3. "Aho tei dah naa harh bik?"
A3. "Tha Biak kaa harh bik. U Hre Tin Hre tehna he zong sau pipi kan ipai ko na'n, cun Aung Kyaw Lin zong a tthawng tuk ko na'n pum hme cu cawihler awk zong ah a va fawi deuh. Tha Biak cu kaa harh nawn."

Q4. "Paih ah hin zei paih phun dah na hman bik?"
A4. "A rem ning zoh in zei paih poh ka hman ko. Na'n vangkheen hi oi tam bik ka hman rua ka ti."

Q4. "Laitlang ah na rak ipai bal maw?"
A1. "Bual pipa ah cun kaa pai bal lo. Bual hme tete ah cun kaa pai ko."

Q5. "Tha Biak i kheel khat a'n vuak ah khan, lung zor awk ngaingai na si na'n na lung a zor lo."
A6. "Ka tei ko lai ka ti i ka zei hmanh a poi lo."

Paih tlaangtla pawl cu, "khattelei i kan kal ah an kan thahhnek, khattelei i kan kal ah an kan thahhnek" e an ti.

Bualpi a dih cun mi an ttin dih i hnarcheu hrawng lawng kan taang. Singkhaw paih cu azoh zong a nuam ti lo. Keimah hmanh tthatthi ka zoh lo; rian ngei ka si ca'h ka rian ka hei tuah pah, ka hei zoh pah i a si. Kap Tawng le Tha Biak cu singkhaw ah an ipai ti lo.

Singkhaw final ah Aung Kyaw Lin le Tial Thang aa pai ding an si nain Tial Thang nih a kianh. Ule kianh cu zoh a dawh tuk, a fim tuk tiah kan ti cio. Halkha Khuahlun hi Khuathar he nakin Hniarlawn he an ikom deuh i, Khuathar he idawt ding zong kan duh mi a si. Hniarlawn le Halkha paih a um ruang i Khuahlun le Khuathar an ikomh deuh nak a si ah cun thil ttha a si ding a si.

Asinain, Tial Thang nih hin kianh lo in pai ko seh law, Aung Kyaw Lin nih a tei tthiam tthiam men ko hnga i laksawng a laak ah hmaihngal chin in a laak hnga. Atu cu kianh chom laksawng laak ah a cang deuh ai.

Dallas zong ah kianh chom in bualco laksawng an la. Khuathar pa nih a kianh ve an ti.

Paih Committee meeting lio ah Pu Za Iap nih, "Aa kian mi maw, aa dinhdorh mi maw, an um ah cun laksawng pek lo si seh; sung le har i kan iser mi laksawng mahti men in an laak ding a si lai lo" tiah a rak kan ti ko nain a bia zei ah kan rak rel lo.

Aung Kyaw Lin farle cu an idawh i an idawh i! A mit a chin mi hawihna hi aa dawh ngaite mi a si. Hmet cu an hme tete.
Pu Sang Hram hi paih tthawng hlun a si i, a naule pawng ah va kal i ruahnak zong va pek pah hna awk a si nain nupi dawh cu an pawng um a hau lengmang i zei ti awk a ttha lo.

Halkha lei kan naule tha a pe tu pawl. Mi a chawn mi khi New York i a ra mi Khuathar Tawk Cem a si; hna a hnawh ning cu! Ka hnulei in a dir i, bual upa hi a kan chek, Tial Uk i Tial Hmung a tei kha tei a si lo e a ti. "Keimah nawl a si lo, bual-uk nawl a si. Bualuk i 'A tei; a ti ah cun 'A tei' tiah henpei ka thanh a hauh cu" ka ti. Mifanau, thil hmaan seh ti a duh bi a si.

Ka ngamh ko hna: Kap Tawng si seh, Aung Kyaw Lin si seh, ka ttih hna lo, tikik kholh ah cun. Nan duh le kan zuamter u. Khuasik sih pit ah, tikik kih pit in kan ikholh lai, tisor kan isurhter lai. Ho dah sau bik aa ciah kho ti kan izuam lai. Kan luh lai i kan umtu, kan chuahlei i kan umtu, a kan therh le therh lo, kan celh le celh lo, nan kan zoh lai. Annih cu kholhnak ah thlaan chung luh in an lut lai. Kei cu inn chung luh in ka lut lai. Kholh dih in tikik dak kan ding rih lai, an ngamh rih ah cun. Ka singkhaw hna. A ngamh mi nih ka click hna seh. Kholh tlaangtla thim cia hna u. Kik celh hi tthawn ah an chiah ttheu i tthawn cio cio zei dah. -- (Tawnga le Aungaung lawmhpi nak ah)