2014 USA PAIH

Ceu Hlun

bual

Tukum paih kha cu kaa ngaih ngai. Pa tthawng an tlin hlei ah, video replay a um cang lai i bual zong daite in an uk cang lai e ti nih a ka ngaihter bik. Tlin tu cu a tling lo. Hniarlawn cah dih hna law an ka ti i iai tiah ka cah hna. Khual in minung 22 poh, lai in 16 hrawng ka orh hna. Asina’n lam hlaat an hong kho tuk lo. A phanh zan tu cu hmuhsung cu si kaw an inuam tuk hna. An um kho lo i an itlai. Paih an ichim. Ka khap hna. Tuan ah it ulaw tiah ka ihtaak hna i ka ih hnu zong ah kung e keng e an ti lengmang ko. Zing ka thawh ah pakhat a hnar ka theih. ‘Elaw, a fit lo’ ka ti. Ka Tum Sang a si, a paih a ttha taktak mi, ‘singkhaw’ ca i ka thim mi.

A Background
Pu Ang Cung he kan ichawnh ah Khuahlun mithar an um pah maw tiah ka hal i, “Um hlah. Tukum cu Khuathar maw Hniarlawn ti a si ko” a ka ti. A si kun ah tiah Khuathar cu ka von dah hna tik ah, Aung Thein, Tial Cung Thang, Zung Ceu Bik le Rung Ceu Bik ka thim hna (ka ttial cia ko kha).

singkhawhalkhalei

Hniarlawn lei in Aung Thein pai tu ding ah Kap Tawng ka hei ti. Rung Ceu Bik hi Tum Sang he a umtti cia an si i, bual a co zong ah khan Tum Sang a lau an ti. A paih a hngalh lai tiah Tum Sang ka thim. Tial Cung Thang hi Tin Mawng nih a tei bal cang i a ngamh lai, cun Rung Ceu Bik zong oi hnih a tei cang mi a si i a ngamh lai ka ti i Tin Mawng ka thim. Cu lo ah kan pa rinhchanh Mang Cung Lian ka thim. Rung Ceu Bik cu a ra lo i Dar Kulh a chuak. Khuahlun ah Aung Kyaw Lin, Tial Ling, Tial Uk le Ram Nuam ka thim hna (kha). AKL aa pai lo i Tawk Cem a chuak. Khua dang ah Rung Lian lawng ka thim.

singkhawhniarlawnlei

Aung Thein cu huham ngei tuk kaw ka ttihpiak nawn hna. Hniarlawn paih cu mi cawithlir rumro a si i Aung Thein (215 lbs) cu an cawi kho lai lo i an pai kho lai lo ti Pu Ang Cung ka chimh ah, “Kap Tawng cu a tthawng tuk i rumro cawi cun pei a cawi lengmang ko hna cu, an duh na lo lo in” a ka ti. Mah lai ah cun Hoi Chum, kuh khawh hmanh a ti lo mi, Siang Cung nih a tei ko e ti a si. Cuti a si ah Aung Thein zong an tei khawh men ko ti ka ruat thar. Aung Thein cu aho hmanh nih an tei bal lo e ti an thanh ah pakhat nih Siang Ceu nih a tei bal ko e a rak ti. A tthawn saling ah Siang Ceu nih a rak tei a si ah cun Kap Tawng nih a tei men lai ti ka ruat. Siang Ceu le Kap Tawng cu an nule ulenau an si i an tthawng veve ko na’n Kap Tawng tthawn caih a tong deuh tuk. Cun eidin tthat le exercise ngeih deuh zong cu a si. Mah hlei ah Aung Thein hi a fit men lai lo ka ti. A hmaanthlak an taar khan zei dawhdang ah ka zoh ti lo. Cuca’h Kap Tawng nih Aung Thein a tei lai ti hi 80% ka zumh cang, ka lungthli te’n.

atkt

An ipai i ka ruah ning a hmaan bak. Kap Tawng nih aa thlir duak i a vuak ko. An tho. Aa thlir duak i thalko a vuak hoi. Laak tlak lo ah a chiah. Pu Ang Cung bia kha ka ti. Aung Thein a fit lai lo e ka rak ti zong cu ka hmaan. Aung Thein nih cun aa pai mi midang an fit ning hmu kaw, “Mahti hin ipaih ding a rak si eh” tiah a chim taak an ti. Mah bia cu ka duh ngaite. [Aung Thein a tei kha bualco tluk in ka sunh i ka cawngnak puan ka her leen, video a um ka philh i. Video ah ka langhter sawh hlah u.]

Tam Tei
Thang Cung Ling nih minung pa sarih a tei hna. Tam bik tei a si. Zatlang paih hi, Lai paih phung ah, ngakchia in thawk i upa deuh chin lengmang ah kai a si. Atu tan cu ngakchia in kan thawk ko nain upa tuk nih an chuahhnawh colh hna. Ngakchia dang chuah nak caan an phih, paih cawng hna seh kan ti lio ah. Vaal no sin i upa pipi chuah zeitin dek an ning tal a zah lo! Hihnu cu hmetngan le kum zoh in bual upa nih control pah hna seh law a ttha hnga.

Zuri
Zu mawn bu puai chuah cu nuam kaw, amawng le ari an um pah rua. Vaak cio ko hna seh ti lo in heh tiah an tlaih hna, zei tthahnem lo ah. Zuri le mihrut hi zei ngaingai an sual lo ah cun tlaih theng an hau rua lo ka ti, kei cu.

Safety
Aa pai mi ca ah insurance $200,000 man an laak rua, paih committee nih. An smart tuk ka ti. Tuhnu ah cun aa khawng mi an um sual ah tiah first aid service zong kan damhpiak kho hna seh law kan duh hnga. Laimi zong ah sibawi he nurse he hmehthiam he an um pah ko. Anmah si lawng cohlan si seh, private si le vick tehna hman onh lo si seh, zakkeh zong onh lo si seh, drug test tuah khawh nak facility zong ngei kho te usi, mah cu a ttha hnga.

Bualco Ning kha
Uk Ling nih mi pa hnih a tei hnu ah Uk Ling cu Ram Nuam nih a chuahhnawh. An ipai i an ivua kho lo. An caan a dih. Paih Committee nih tei kong an caih. Mah kar ah cun paih chuah khawh caan a dih. Mahhna pahnih nih bual co ding a si cang. Dual Championship le pek an duh hna lo. Paih committee i kaa tel ve lio ah, bual to pa kha a chuahhnawh tu nih a va tei lo ah cun, bual to pa cu teitu si seh tiah Pu Thawng Lin nih biatung a rak dirh i mahti cun phung kan rak ser.  Mah ning ah cun Uk Ling cu tei tu si ding a si hnga. Asinain mah phung cu an hmang ti rua lo.  Paih committee nih cun an caih i an rau pah i paih caan a dih hnek. Minit 3 an chap hna. Rel setsai lo in Ram Nuam nih a vuak i bual a co. Aa la tam deuh in tei rak khiak hna seh law, Ram Nuam laak a tam deuh hei si seh law, Ram Nuam nih minung pa khat hmanh tei lo, aho hmanh khel thlak lo in bual a co hnga. Mah cu ningzak a si hnga. Atu cu khel khat in minung pa khat a tei i bual a co tik ah zoh a rem tuk cang. Minit 3 an chap hna kha khuakhaan an thiam tuk ka ti. Cun, zatlang paih cu 8:00 pm ah ngol a si lai ca ah 7:51 pm hnu in aho hmanh paih chuah khawh a si ti lo ti i an rak thanh mi bia an zulh. Uar an um bak.

Ka Duh Tuk Mi
Boxing tehna ah khin aa raal mi hna cu dinh caan ah khatlei kil veve ah an tthut-ter hna khi mu.  Uk Ling le Ram Nuam cu an kong an caih hna lio ah cun bual lai ah an tthu i bia an iruah aisawh, ni pah in. Ipai cang u law an ti hna ah le an tho duak i tet maw chet ti in an ipai ko ttung. Sports spirit cu mah cu! Ka duh kho tuk. Ka uar kho tuk.

ukling

Paih Dawh Bik
Paih dawh bik laksawng Uk Ling an pek. Ka lung a tling. Angaite ah cun paih dawh ‘bik’ ti awk zong a si lo; paih dawh a um chun a si deuh. Paih dawh dang a um lo. Uk Ling cu lekmalak a laak hna i, aa thlir hna i fiangko fiangko in a ttaang tang ah a thal ko hna. An faak sual lai tiah a tlaih pah rih hna. Hlanlio paih ah cun ak dih lak le hrut dih lak ivuak khawh khi tthawn ah an rak rel i an rak uar. Atu kan naule cu mi fah ding an duh lo. An thinlung a ttha. Uk Ling cu nih bu te lengmang in aa pai ko, mi ni phun a si i. Ram Nuam i a vuak ah hin, kei ka hmuh khawh tawk ah, a ttawk zong, a keng zong, a pai zong, vawlei a tawng lo. A sir in a it. Midang si usi law tei a si lo e tiah kan buai bak hnga. Anih cu a buai lo; a ni ko.

Aung Kyaw Lin
Aung Thein he ipai tuah hna seh ka ti cu inka cong a rak ttuan i, ‘Ziah naa pai lai lo maw?’ ka ti i, pai hlah e a ka ti. Tuanpi ah khan AKL cu ka tthawng ti lo e a ti i aa pai hnek lo e ti ka theih i, a um kho taktak te lai lo tiah ka rak ti na’n atu cu a hmaan. A keng a fah le aa pai kho ti ding a si lo kong a ka chimh. Ka zaang a faak ngaite. Hniarlawn pawl sin ka chim i zum hlah law an ka ti. Tukum ah patthawng vialte paih ingiat ingiat i khumvoi ah ipaih te dawh zong a si—“mit sivorh” a ton ding lo ah cun. :)

Kap Tawng
kptawngTutan Kap Tawng cu a titsa a ttha tuk. Aung Thein he an ipaih ah cun cakei tthawn in a tthawng. Asina’n Tial Cung Thang sin ah cun, “lat a ei mi a lo”, Za Uk Thang bia cun. Aziah dah a sii hnga ti kan ruah tik ah a bia nih a thluk tiah kan ruah. Tial Cung Thang he an ipaih lai i bia an hal ah, boxer Paqiou bia icawn in, “Kan tuanbia kan remh nak caan a si lai e” a ti. Mah bia cu bongmal a sawm mi bia a si lo. Lai phung ning cun toidorte’n bia chim ding a si. Miphun dang phung aa laak i a chim tik ah khua hna a tla lo tiah kan ruah.
An tuanbia tu cu an remh taktak. Nikum Tial Cung Thang i a tei kha cu, paih tlangtla nih tei ah a chiah i a si, tei ah kan relh set lo. Tutan i a tei mi tu hi tei ah kan relh. Amah zong nih “a ka tei” a ti cang. Muikhum awk zong a ttha cang. Tuupi-uk pawpi bantuk i ruah mi kha atu cu paih tthawng bik "chang" ah aa chuah cang. A chuang a tlanh tthan a hau. A paih a ttha bik tu cu amah ningning a si ko. Anih cu sangpipi in a hler hna. Adang cu isual le ihlonh le ifoih ttukttak an si.

Mang Cung Lian
Atu tan “singkhaw” ah cun Mang Cung Lian le Kap Tawng final an kai lai i, Kap Tawng saduhthah ning in Mang Cung nih thiamchuang a laak te men lai tiah ka rak ruah. Mah ca’h cun atutan ah hin hmai fonter ka rak duh. Kan inn ah an pawng kan thlai hna i a ruahning nakin a zor tuk i mahte cun a lung a zor. “Duhtawk in pei an ka cawi khawh cang lai cu!” a ti. Asina'n tai har bik a si rih.

Mang Cung le Kap Tawng final ah an itong te men lai tiah ka rak ruah. Mah zong cu a hmaan hrulh. Kan ruahning leng in Tial Cung Thang a tthawng i a tei veve hna i a si.

Tial Cung Thang
Atutan ah hin Tial Cung Thang nih kan pa tthawng tthawng a kherh hna. Kap Tawng, Mang Cung, Rung Lian, le Tial Uk. Ka lawmhpi bak. A kut tlaih ah saupi ka hngah i, "You earned it!" ka va ti. Har tuk i aa zuam hnu ah laksawng a hmuh hi a si. A paih mi ah Rung Lian he an ipaih lio zoh a nuam bik in ka thei. Harh cun Mang Cung aa harh bik rua ka ti. Tial Cung Thang cu a kehlei tha in mi a tei bik. Rung Lian he an ipaih ah amah nih a laak deuh i kehlei khelcungchuan le kehlei thatuk a hmang. A paih a thianghlim lo belte. Mang Cung phei a tlaih, Kap Tawng tha a phelh. Rung Lian tha a banh. Mi pakhat chim ning ah, Tial Cung Thang hi paih phun thum a thiam i Kap Tawng he an ipaih ah khan phun khat hmanh a hmang lo e, wrestling ‘kuat’ lawngte’n a tei e a ti. A video zoh lo ah cun zumh awk le zumh lo awk ka hngal kho lo. Nain mi phei a banh le Mang Cung Lian ttaang tang i a luh hnek ruah tik ah, hmaan dawh zong a lo pah. Cun, Rung Lian he bual kam i an hong thawhka ah a chuih [an video 2:39 zawn ah khin]. Paih ah chuih a um awk a si lo. Cun a liang a faak na lo pi orhlei liang ah a pa nih vick a thuh. Sports phung hngal mino nih an hngalh i an caak leen; zoh chia in [hika hi click hmanh u]. Nikum Aung Kyaw Lin he an ipaih ah mahti cun vick cu ciapko in an thuh i AKL cu a khut ciammam i a mit a au kho lo an ti. Tei zong a tei kha. Cun, Kap Tawng he an ipaih lai ah a va chuak ta. ‘Ziah paih lai ah zei dah a va ti hnek!’ tiah lunghring in ka zoh. Tthawnsi an din le din lo chek nak ah hmailei ah cun drug test tehna kan tuah a hau te men lai ti zong ka ruat ta manh. Ahnu ah mi nih an kan chimh i, ‘atu le atu pei a chuah kha, nan hmu lo maw, nan lee lo tuk’ an kan ti. Paih thabaat lio ah cun zun zong chuah tuk awk a si lo. Hihnu cu bual leng i an chuah tik ah security nih zoh an hau te kho men. Cun Pathian aa bochan mi nih si ibochan ding a si lo.

Mang Chum tthawn in ta
Paih i kei ka uar bik cu Mang Chum a si. Mang Chum cu paih a upat i, kan theih ning ah, paih lai ah aa cenh. Ciammam in paih a chuak. Aa paih ah heh tiah a ttang, agressively. Zaang zong in a ttang. Mar zong in a ttang. Phung ningte in aa pai. Paih phung pakhat hmanh a buar ka hngal lo. A tha bangh lio i an chuahhnawh zong ah a bangh bu in a tlaih ko hna. Mi zong a la lengmang. Zia thiam in a um lo; ti idinter, ikhawnter, ibuaiter, taisawmi iserhter tehna a hmang lo. Bual tlangtla nawl zong a ngai. Dingte le hmaante in le phung ning te in le thianghlimte in a tthawng. Mah cu atu kan naule zong nih icawn hna seh law ka duh. Thang ttha te i tthawn le minthan hi kan uar ding a si.

Rung Lian Ceu le Tial Cung Thang paih
rltcTha hriim veve ah an itong. Kan ingaih tuk cio. Pawpi seh cio an si ko. Zaangttha veve cu an tetmawchet an ipai. Tial Cung Thang nih a raal deuh. Keh lei tha i en, orhlei kut i merh, le thatuk in a laak bik. Tial Cung Thang hi a kehlei aa bochan in ka hmu. Khelcungchuan ngaingai a si lo; chuan deuh lo i en a si. Khel-en an ti rua ka ti. A vuak mi hna hi a kehlei tha lengmang in a vuak hna. A pasal-cawlcangh tuk i uar a um bak. Aa dawh bak. Mi cawihler a ngei tuk lo. Rung Lian zong cu a paih a ttha tuk. A tha zong a ttha, a mar zong a ttha. Aa khingkhang bakte an si. Atutan cu Tial Cung nih a tei. Tuhnu an ipaih zoh a nuam tthan lai. [Atu hmanthlak i khi TCT nih RLC phei a hei banh lio a si.]

Mic Au
Dallas ah cun paih tlangtla i tei le tei lo a khiah hlan in microphone tlaitu nih a tei e ti in a rak au lengmang i mah cu paih tlangtla nih a zulh lengmang e an ti. Aziah dek an va bengh hrulh lo! Indianapolis ah cun mahti i rak au khanh a um lo (kan ilawm). Rak au khanh hna seh law an velh men hna hnga (an chim). Patthawng itlaih lio i thawngthanh le aukhuan belte cu a um i hna nan kan hnawh e tiah ka sik hna. Hna phih nak tissue an ka pek i ka kaa an ka phih bak (ha ha). Hihnu an aukhuan tuk rih ah cun atang i hna hi kan coh cang hna lai: awthan le ttawt le Rangoon hmuh bal lo le filhhnomh le ngalkawi le cawttek ngeih le hruh nawn le ludur-ngan le samker tehna. :)

Marking System
Zaanglek dang ah marking system an hman bantuk in paih zong ah khel lawng zoh lo in marking system kan hman ah a ttha te men lai. Oi tam deuh aa la mi ti zong atu kan hman cang i a ttha. Hngawng cung tongh le tai tang tongh tehna fault pek ding. Lu i doh tehna zong. Cun beek tuk le perpeet tuk zong khap ding. Mark zuh asilo ah chuah tiang hmanh in dan tat ding, tbt. Boxing ah khin ral kuttum pil taak khi refree nih a huat tuk khi mu. Mah bantuk khin laak awk ttha lo i aa phet mi zong ti ding an si.

Tluang Za Kherh le Ram Nuam Sang
Tukum cu Tluang Za Kherh nih bual hnih a co, Amarillo le Dallas ah. Ram Nuam Sang nih bual khat, Indianapolis ah. Tluang Za Kherh hi Hniarlawn lak paih thiam bik a si. A ka chimh ning ah, Ram Nuam nih paih ka chim sawh law tiah a chawnh lengmang i ‘kuat’ khat a chimh. Mah kuat khat cun nikum CND ah khan minung pa hra a tthuat hna. ‘Na chimh mi a si ah cun bual i nan iton tik ah a’n kianh a hau lai cu’ tiah ka ti i, ‘A ka kianh lo zong ah ka ttih theng lo. Ka chimh mi lawng a thiam” a ti. Paih tthawn nak min an sak i thla thla khat chung ah bual bual hnih a co. “Na min na tlinh cang” ka ti. Mi hme a si i sau cu a nguh lai lo. Amarillo ah hin pahnih a tei hna i aho hmanh an chuak ti lo i bual a co cu a si. Dallas ah cun, “pahnihnak ka von tei dih bak ah paih caan a dih, a chuak ding cu an tampi rih na’n” a ti.

Khel Hnih Tling A Hau E!
Bual co nak le zuamcawh final tal ah hin cun khel hnih tling an ivuak a hauh awk a si. Paih tei cu khel hnih vuak khi a si i mah kan zulh nak a um kun lo ah Lai phung le Lai paih e kan ti ngam kun lai maw? Dallas ah cun bual co nak cu a minit khiah lo in khel hnih an itei tiang ipaih si seh tiah an khiah e an ti. An smart bak ka ti. Khel khat zong i tei kan khiah ah cun, aa vua hmasasa nih tei ti kan rak ti sual mi palhnak kha a taang rih. Cun khel khat vuak cia mi ca ah lung a der tuk cang cuh—aa chang lai i ka tei kho ti lai lo ti in. Taisawm remh nak le zei huaha lo hmanh ah caan voi can kan hman ttung, pa tthawng vial heh tiah kan hnawt ttung hna.

Minit thum bual to ah bual co ti hi
Atutan paih phung 3-nak ah, "Minutes (3) tiang i an chuah hnawh lo asi ahcun paihbual i a ṭhumi kha tei pek i bual co ter ding" ti a um. Mah cu ataktak ah a si kho lo eh. Nai Za Uk Thang bual a to chung khat minit thum a tling pat tiah paih donghter awk a ttha lo, khua a tuan tuk rih. Paih zoh duh ah pei tangka liam le caan pek in kan rat cu! Cuca’h bual to chung hi minit 3 si lo in minit 5 or 7 siter ah a ttha hnga. Minit thum cu za a long lo.

zukthangbualto

Aleng mi ithlak kong ah
Tei le tei lo kong ah cun aleng mi ithlak a um tuk rua lo; nain adang ah bual upa pawl ngiat le chek a tam. An zumh hna lo ca’h a si. An mawh lo nak a um lai. Za Uk Thang bualto chung minit 3 a tlin cang ttung tiah an va ti hna tik ah phun thum in an rak leh hna. Pu Siang Herh leh nak, “Kan philh sual, kan ngaithiam u” ti an cohlan. Tum Sang le Aung Thein aa tong ding i an izuh ko mi Tial Uk he tu an tonter hna, tbt., zan i bia an leh hna mi ning in an tuah lo tbt, ‘singkhaw’ chuak ding thlen khawh a si ti i an caih ko mi upa pakhat nih a si lo e tiah amah nawl in a rak ti hna tbt a um pah ca ah an zumh hna lo hi a si. An cell phone in caan an rak zoh cio i cu tik ah caan zoh hlah u law kanmah nih kan zoh ko e an ti hna. 'Nanmah cu kan in zum hna lo i pei kan in chek hna fam cu' an ti hna tluk nawn a si ko. Zumh lo cu a faak bak.

bualupa

Paih Tlangtla
Thahdeng lengmang an si ko, zaangfaak hna in. Pu Za Iap hawihna cu Hniarlawn lila nih, a kan hloh e an ti i an thahdeng, a theihlokar ah. 2011 lio khan an ti cang. Angaite ti ah cun a mit a rang ngaingai mi a si. Pu Tin Hre zong, Pu Siang Cung zong nih a lai zan in an ichim kanh ko i palh cu a um lengmang ding a si ko. Tei a si lo ka ti mi tei i an khiah mi belte a um pah (atutan lawng si lo in). Pu Tin Tawng he kan izoh i, “tei a si lo a” kan ti pah ttheu, mi theih lo in. An pai, an keng, an ttawk, an khel thleem, azei hmanh ttuang tongh lo in tei an khiah pah ti ruah in ka ruat. Pa tthawng ipaih ah cun mah kong hi a biapi tuk. Video zoh colh hmasa hmanh a ttha mi a si, a biapit nak zawn ah cun. Cun paih a zoh mi nih kan hngalh awk cu: lu le ke hi tei le tei lo nak ah rel a si lo. A lu in a tla e, a ke in a tla e tiin tei khiah khawh a si lo. Siang le taw kar lawng khel ser nak ah do an tla. Lu le ke an itel lo.
Hniarlawn pawl nih, paih tlangtla ah Pu Hram Cem kan cahpiak hna seh law mah lawng ah cun paih thatho a si cang lai e an ti. Kei nih Pu Hram Cem a hau lo, Dallas Ni Peng cah ah a za ka ti hna.

ceuvansiang
Zuri ah ka rel hlah u; ka rawl a ttaam tuk cang i a si, ka mit-au a tthawn lo hi (a niam bik hi ka si). Dingdawng cawk awk um lo, ka thin! :)

Zumh Awk A Har
Bual ki ki thum ah bual upa an chiah hna, bualuk biakhiah a bawm tu ah. Aho dah tam deuh aa la ti zong an hal hna. Cu tik ah 'anih nih tam deuh a laak' an hei ti. Kei ka zuum set hna lo. "Asi ah, oi zeizat dah a laak, anih nih tah?" tiah hal hna seh law an chim kho hnga dekmaw. An ruahdamh pi le ttanh lung zong khin an chim rua ka ti ko. An chim mi a hmaan a langhter tu evidence zei hmanh an ngei lo. Kei si ning law, catlap le cafung ka hmanh hna hnga i, CK i oi khat a laak ah oi khat tick, ML i a laak ah tick ve, ka tuahter hna hnga. Hal caan a cut ah hmurka i hal lo in an catlap te tu ka laak hnga i an mark ka fonh hnga. Angaite ah cun "cuzat" ti cu majority laak a hauh awk a si lo. Pakhat i 'cuzat' a ti mi cu a hmaan ding a si. Adang he an ikhah lo ah cun rinh awk an tlak lo ti a lang cang.

Ttangkop
Atu mi hi ttaangkop paih athiam in an thiam lo. An ithlah lengmang. Tial Cung Thang i Mang Cung Lian a tei kha ttaang kop ti ttung in a taisawm in a tlaih i paih tlangtla nih a zohsawh ko hna ca’h a si e an ti. Ataktak ah cun Mang Cung zong nih a tlaih ve ko (video ah zoh te hmanh u). Ttangkop ti ah cun atung veve in an dir ding a si; an kun ding a si lo. Naihte’n an dir i ngaknu kuh in kuh, kutsih (sumpom cia) in um, ‘khah’ ti bak khin tung phawi in an iphawi ding a si. Mah ah cun itlolh khawh a si lo, pakhat chingchang nih tei a si. Atu mi nih sumpom tehna thiam hna hlah kaw ttaangkop cu an ttih tuk i, an perpe cia i mah nak ah cun an itlolh lengmang. Paih tlangtla nih tunter ding, naihte’n (ngaknu reh in) kuhter ding, an ke le an ke dong khat leng hlat ter lo ding a si.

Aziah dah Hniarlawn an sungh?
-An iseihchiah tuk i over-confidence in an sung.hlupa
-Mi tthawn cio ning ruat lo in mi an namchan tuk.
-Kap Tawng khuaruah le biachim khua hna a tla lo (tuanbia remh laikong a chim mi kha)
-An dau a pok lo hrimhrim. Aceuh le adeuh ah an sung lengmang. Paih tanttim ah an dau a chia ti ka hngalh cang—zei uallo ah pei anmah lei sungh a sii lengmang cu!
-Kap Tawng fapa (holhthiamka) a nu nih, na pa le na pate teinak an hmuh nakhnga thla cam law tiah a ti i, an sungh nakhnga tu a cam lengmang e an ti. A nu cu a lung a dong cia cang, paih hlan in. [Hmanthlak hi Hniarlawn pawl sungh dawh an si cang hnu i an mithmai a si. Muichiat hramthok cu lawmh lo! :)

"An Aung Thein kan tei i kan Kap Tawng an tei ve" an ti lai.

Tin Tawng le Thangkeuh kha
An i-challenge e ka rak ti kha an ttul ai. Thangkeuh nih tithlum dur 15 a cawk i an rianttuan hawi a phawt dih hna i, an hal cu, ka pa Tawng ka nawlnak e a ti hna e an ti. Midang sin ah paih cu aa pai. Za Uk Thang nih, “Kawlpa kha ziah aa paih ve, ka pu?” a ka ti—Kawl cawleng mong a lo tuk khe.

Paih A Nuam Maw
Tukum paih cu, a hmun zong a rem, a zoh tu zong kan tam, pa tthawng tlin zong cu a si i a nuam hin ko, "team paih" cu. Zatlang paih tu cu a nuam theng lo. DVD chuah awk tlak a um tuk rua lo ka ti. Zatlang paih kha baan nganngan le pa tlangtlang tuan tuk ah an chuak. Mahhna sin ah cun mi hme tete hawihna an ra chuak ve. Paih thiamlo tha ttha sawhsawh an paih zoh awk um hlah. Aho poh aa pai ding mi nih cun paih hi cawng zinpan cio tuah hna seh.

ramnuam bualco

Bualco Ram Nuam Sang le Tial Uk

Mi an chantthat lio le an idawh nak hmanthlak ka taar ah aho nih an ka "thank you" bal lo i, tutan cu taar kaa tim ti lo i paih ni hi khemra hrimhrim kaa ken lo. Hmanhseh pa Ceu (Ngun Ceu Ling, 2010 bualco) nih, aziah dah maw kan patthawng bualco hmanthlak na taar lai lo e tiah awlok a ka chawnh. Hmanthlak a khawmh i namchan in ka von taar. Thiamchuang he an ithlak mi bualco hmanthlak khi aho ta a si ka hngal lo, an ka kuat i ka hman ko, an sian le sian lo hngalh lo in. Cun cunglei bik i khi cmsp ta a si rua nain keimah nawl in ka hman. Mah pakhat te laak ruang i an ka ti ah cun, pasal--an fa ka soi lai.

 

http://robawm.com/ceuhlun/40/20090421202228(1)%20copy.jpg

Fitness a tuah lo i paih zong aa pai ve lo mi