HOLH DANG A UM MAW?

Ceu Hlun

Vancung i a um mi vanmi hi an ichawn ve hnga maw, holh an ngei hnga maw, zei bantuk holh in dah an holh hnga, kanmah he kan ichawn kho te hnga maw? Pathian hi tah zei holh in dah a holh hnga? Zei holh in dah chawnh ding a si hnga?

Hiti ruah ah cun vancungkhua i a um mi hna hi anmah holh te ngeih dawh, an ichawnh ah kannih minung nih theih lo ding dawh in ruah a fawi. Sihmanhseh, cu ruahning cu hmaan dawh a si lo. Aziah tiah, anmah holh te an ngeih ah cun an hman nak a um hnga. Atu cu an hman kan thei bal lo, Baibal i a langh tawk ah. Pathian si seh, vanmi si hna seh, an hman mi holh cu kan thiam cio mi minung holh hi a si ve ko.

Zoh hmanh usi:
(1) Pathian amah le amah aa chawnh ah minung holh in aa chawn. Holh dang te a ngeih ah cun amah le amah tal cu mah a holh te cun ichawnh awk a si; nain minung holh in aa chawn.
(2) Pathian le Sehtan an ichawnh ah minung holh in an ichawn. Sehtan cu vanmitlaw a si. Pathian he tuankong saupi a ngei mi a si. Holh dang te ngeih awk an si nain ngeih dawh an si lo.
(3) Pathian le minung an ichawnh le bia an ileh ah minung holh te in an ichawn. Adam, Abraham, Moses, tehna Pathian nih minung holh in a chawnh hna. Anmah zong nih.
(4) Bawi Zisuh i Pa Pathian a chawnh ah minung holh te in a chawnh. Mahhna pa-fa hi vancungkhua ah khuahlaan in an um cang i an rak ichawnh tawn nak holh a um awk a si; hmanhseh, minung holh in Zisuh nih a pa a chawnh. Anmah private holh a um lo i a si lai dah.
(5) Vancungmi i minung an chawnh hna ah minung holh in an chawnh hna. Minung theih awk in minung holh an hman tiah nan ti men lai nain minung chawnh nak lo zong ah minung holh an hman ko.
(6) Vancungmi X’mas zan i hla an sak ah an hlabia cu minung holh a si.
(7) Vancungkhua i vancung mibu an au/holh ah minung holh in an au/holh (mah tu hi cu Johan mang a si).

Khuachia, khuavang, lasi, tehna zong minung holh lawngte in an holh, rul le khacer hmanh. Holh dang i an ichawnh kan thei bal lo. Mah cu zoh tik ah, van le vawlei le khuazongza ah hin minung holh lawnglawng hi holh um dawh a si. Minung holh lo holh a um kan thei lo.

Paul nih, “Vanmi holh hmanh hei thiam ko ning law” a ti i mah khi cu thil si kho lo chim nak i kan hman mi phun (tlang tthial kho hmanh hei si ning law… ti bantuk) khi a si. Cun, vanmi holh a um rua tiah zaapi nih an ruah tiah a ruah zong a si kho. Vanmi holh hi um dawh a si lo. Mirang nih angelic language ti an hman ko nain an chim mi set langhternak khoika hmanh ah kan hmu lo. An ruahnak a si men lai. Thlarau zong—Pathian thlarau a si ah, Khuachia thlarau a si ah, minung thlarau a si ah, zei thlarau an si ah—holh dang hlei an ngeih kan hngal lo. Minung holh an hmang dih ko. Minung holh a si lo mi cu awchuah (utterance) sawhsawh ("awnh") an si lai. Theih awk a um lai lo.

Acung i ka chim mi bia langhernak ah Baibal i a lang vial zoh usi law:

PATHIAN HOLH:
Minung a ser hlan, minung holh ti awk a um hlan, bakte i Pathian holh a lang mi cu amah le amah aa chawnh nak a si i: “Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai” ti a si.

Fa Pathian i Pa Pathian a chawnh nak holh:
Fa Pathian (Zisuh) cu Gethsemani duum Olive thing tang ah amah lawng a kal i a pa a va chawn ta. Zeitin dah a chawnh ti ah cun, a saupi i: “Ka Pa, a caan a cu cang. Na Fapa nih sunparnak kan pek ve nakhnga, na Fapa cu sunparnak ka pe ko. 2Na ka pekmi vialte hna cu zungzal nunnak ka pek hna nakhnga mi vialte cung i nawl ngeihnak cu na ka pek cang. 3Cun Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si. 4Vawlei cungah na sunparnak cu ka langhter cang; na ka fialmi rian cu ka lim cang. 5Cucaah Ka Pa, vawlei ser hlan i nangmah sin i ka rak ngeihmi sunparnak kha, atu ah hin na hmaika ah sunparnak ka pe tuah” a ti (Johan 17). Pathian ichawnh nak a si nain minung holh te in ichawnh a si ko. (Pa Pathian i Fapa Zisuh a chawnh bel kan hngal lo.)

Bawi Zisuh chan minung sin i Pathian dairek in a holh ah zei dah a chim ti ah cun, “Amah hi ka dawtmi ka Fapa a si, Amah cungah hin ka lung a tling” a ti (Mt 3:14). Mah bia cu Zisuh Tipil iin lio le tlang cung i muihmai thlen a si lio ah aa chim. Pathian holh bakte a si tiah kan zumh.

SEHTAN HOLH:
Job kong ah Pathian le Sehtan an ichawn, vancung ah. Sehtan i Pathian sin a chim mi cu: “Job nih hin Pathian cu a lak in maw a ṭih? Amah le a inn le a ngeihmi vialte cu hau in na kulh hna lo maw? Nangmah nih a kut rianṭuannak cu thluachuah na pek i ram chungah hin a ngeihmi thil cu an karh. Sihmanhsehlaw atu cu na kut hei chuah law a ngeihmi thil vialte khi tawng tuah ngat, na hmai hrimhrim ah an vawlhpamh ko lai” ti a si (Job 1:9-11). Sehtan cu Pathian nih hiti hin a chawnh: “Zohhmanh, a ngeihmi vialte cu nangmah kut chungah an um; amah taktak belte na kut cun tawng hlah” tiah (Job 1:12). Mah cu vancung i an ichawnh nak a si. Vawleicung zong ah Sehtan cu Fa Pathian he an ichawn: “Nangmah cu Pathian Fapa na si ahcun, hi lung hi changreu ah canter hna ngat” tiah Khuachia (Sehtan si dawh) nih a ti (Mt. 4:3). Bawi Zisuh nih Pathian bia in a leh. A holh cu minung holh a si.

Sehtan cu, Lucifer ti zong ah an ti i, mizei dah a si ti ah cun vanmi pa khat a si. Vanmi vialte nakin fim deuh le idawh deuh in a hlawmh mi “vanmitlaw” a si. Cuca’h Sehtan holh cu vanmi holh a si tiah kan ti khawh.

MINUNG SIN PATHIAN HOLH: Pathian nih minung sin ah direct in bia a chim nak a tampi. Hmun hnihthum in zoh usi law:
Adam sin: “Dum chung i a ummi thingkung vialte hi an thei na ei dih ko hna lai, 17sihmanhsehlaw a ṭha le a ṭhalo hngalhnak pe khotu thingkung a tlai hi cu na ei lai lo. Cu thingthei cu na ei hrimhrim lai lo. Na ei ahcun, na ei ni hrimhrim ah na thi lai” a ti. Mah cu Eve a um hlan, vawleicung ah minung pa khat lawng a um lio i Pathian i a chawnh nak bia a si. Eve a um hnu ah, Adam sin “Khuazei ah dah na um?” a ti (Gen 3:9), “Aho nih dah taklawng na si cu a’n chimh?” tiah a hal. “Ei hlah tiah kan timi thei kha na ei dahra?”a ti. Eve sin: “Zeicahdah hihi na tuah?” (Gen 2:15) tiah a ti i bia tampi a chap. A holh a thleng lo.
Abraham Sin: Pathian nih, “Kei cu Lianngan Bik Pathian ka si. Na nun chung vialte ka nawl ka ngai law soi awk zeihmanh um loin um. 2Nangmah sinah biakamnak ka ser lai i tefa tampi kan pek lai” a ti (Gen 17:1). An ichawnh hmasat bik a si i, Abraham nih cun, “Ishmael cu ka huhphenhpiak law nungdam tein ka zohkhenhpiak ko tiah kan nawl” a ti (Gen 17:18).
Moses sin: Pathian nih “Ra naih deuh ti hlah. Na kedan kha i phoih, na dirnak hmun kha hmun thiang a si. 6Kei cu na pa i a Pathian, Abraham Pathian, Isak Pathian, Jakob Pathian kha ka si.” (Ex 3:5)

VANCUNGMI HOLH:
Balam sin: “Zohhmanh, na tuahnak cu ka hmaiah a ṭha lomi a si caah nangmah kha donh awkah ka ra chuak. Laa nih khan a ka hmuh i voi thum tiang hin ka hmaiah a pial. Ka hmai in rak pial hlah seh law, amah thah loin nangmah kha ka rak in thah cang hnga.” (Number 22:33)
 Mary sin: “Mary, na thinphang hlah. Zeicahtiah Pathian nih nangmah cu vel a’n ngeih. Nau na pawi lai i fapa na hrin lai i a min ah Jesuh na sak lai. Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawiṭhutdan kha Pathian nih amah cu a pek i Jakob tefa hna siangpahrang zungzal in a si lai, a pennak cu zeitikhmanh ah a dong lai lo” (Luka 1:30-33).
Tukhaal sin: “Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sinah lunglawmhnak a tlunter lai. Tu zan hrimhrim ah hin David khua chungah nan Khamhtu kha a chuak cang — Khrih Bawipa cu! Cun hihi nan ca i hmelchunhnak cu a si lai: ngakchiate pakhat kha puan in an zual i caw rawl einak kuang chung i an thlim kha nan va hmuh lai.” (Luka 2:10-12)
Vanmi hlabia: “A sang bik van ah khin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh.” (Luka 2:14) Mah hi minung an chimh/chawnh hna nak bia a si lo. An holh sawhsawh nak  a si.
Thlaan veh nutung pawl sin: “Zeicahdah a nungmi cu a thimi lakah nan kawl? 6Hika ah a um lo, a tho cang. ‘Mi Fapa cu misual mi hna kut ah chanh a si lai i vailam ah an khenhchih lai i ni thum ni ah nunnak ah a tho ṭhan lai,’ tiah Galilee i a um lioah a rak in chimhmi hna kha philh hlah ngat u.” (Luka 24:5-7)
Zisuh thlah tu pawl sin: “Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir ṭhan lai.” (Lamkal 1:10)
Johan sin: “Mah hihi ṭial tuah: Tuufa nupi ṭhitnak puai i sawmmi hna cu milunglawm an va si dah!” a ti. Cun vancungmi nih cun, “Hi bia hi Pathian bia ngaingai an si” a ti. (Biathlam 19:9)
Vancungkhua Vanmibu Holh: “Bawipa, Lianngan Bik, kan Pathian cu Siangpahrang a si caah, thangṭhat ko u! I lawm u si law i nuam u sih; a lianngannak cu thangṭhat u sih! Zeicahtiah Tuufa nupi ṭhit caan cu a phan cang i a ṭhit laimi ngaknu cu aa tim cang. Aa thuamhnak dingah, puan hmang ṭhia a thiang i a cer in a cermi kha pek a si cang.” (Biathlam 19:6-8)

Komh dih i zoh ah, vanmi holh hlei a um lo, Pathian holh hlei a um lo. Minung holh in an holh dih ko. Pathian chawnh nak holh hlei zong a um lo. Paul i 'vanmi holh' a ti mi le 'holhtheihlo i holh cu Pathian chawnh a si' e a ti mi khi cu bialo pi an sii a lang.

2020/5/2