CBCUSA General Secretary a si te ding i ka ruah mi ka hawi ttha Rev. Dr. Hai Vung Lian a dihdongh riangmaang ka theih ah ka ngaih a chia tuk. Kan ikomh ning le a ka tlaihchan ning le a ka upat ning le zuun lawngte nihin (April 27) cu ka ruat.

Gentleman Hai Vung Lian hi Hana-pa ti zong ah an ti nain kei cu hawikom auh in 'Pa Vung' ka ti peng ko.

Pa Vung hi keimah nak (thla 2 hrawng) hnu ah US a phaan rua (1997 ah). A khumvoi hrawng ah 'Hai Vung zong F1 Student in Dayton ah a um ve' e tiah u Thla (atu Rev. Dr. Thlaawr Bawihrin) nih a rak ka chimh. Mi felfai a si kong le har ngai in siangin a kai kong zong a rak ka chimh. Mandalay University chuak a si rua (kei Rangoon chuak ka si) i ka hngalh cia mi a rak si lo.

Kan ihmuh cu 1999 Krismas ah a si. UIUC campus i ka um lio a si i Washongton DC ah Krismas hman ah cun ka kal. Anih Ohio in a ra ve, bus in. Kan pahnih kan va tlawn hna cun an tha a rak nuam tuk. Mah kum cu Rev. Dr. David Van Bik USA i Krismas a hman kum a si. A nunchung i Krismas a hman le phung a chim donghnak zong a si. Rollin Van Bik inn (cawk thar nawn) ah Krismas cu rak tuah a si. Thawhlawm thlacam an rak ka thiah (pa Vung tu thiah lo in). Suit kan rak ngei lo veve; nain kei cu second hand dawr ah $10 in blazer kaa cawk i mah he cun ka chuak. Pa Vung nih cun a rak ka hngar tuk (anih jacket he lawng ra kaw). Pa Vung cu khuate fa hmanh lo lo in a chuakthiam i ka rak uar tuk.

Sailo te chung he.

Christmas a dih in Capitol Hills le White House hrawng an rak kan leenpi, ngaknu pawl nih. Mah dih cun New York kal kan rak itim. David Za Thuan nih Honda Accord thar te a rak cawk. Mah cu a rak kan hlanh. Pa Siang (Siang Dun) nih a rak kan monghpiak i New York ah cun kan rak kal, tlonleen sawhsawh ah. Stanley Hram Uk te inn (apartment) ah kan rak riak.

1999 tiang lawng computer nih a thiam e, 2000 tehna a thiam lo e, vawleicungpi zeitin dah maw a si ual lai e ti i Y2K rak ttih saling a si. New York Time Square i suimilampi aa thlen le thlen lo zoh ah minung hngerhte bu rat in an ra. Khua kan khat. Kan iteet tuk ah hin kan mit tal kan tthep kho lai maw ka rak ti. Mahti cun Time Square ah cun Kumthar kan rak hngak. 1999 kum cu a dih i zei a cang lo. Computer zong nih cun 2000 a piah ko.

Kan rak vaak leen. Khuasik lio New York i ke i vah cu a nuam tuk in ka thei.

Tangkhawng khuasik ah kei cu ka zei a poi tuk lo. Ka angki leng zong kaa phoih leilei. Mah ah cun pa Vung cu khuasih a rak thei ngai (a rak derthawm hrimhrim).

A thaizing cu Statue of Liberty kan va tlawng, tilawng in.

World Trade Center an kah hlan kha a si. WTC ah cun kan rak kai. Zan ah a si.

Hai Vung, Hram Uk, Siang Dun, Ceu Hlun, Van Ling

Mah hnu cun pa Vung he hin kan idaw ngaingai. A ka tlaihchan ngaingai tiah ka ruah. A si ning a ka chimh lengmang. Ngaknu a helh zong a ka chimh. A ngaknu (Hana nu) hmanthlak hawihna khi tampi a ka kuat (a pungsan le a sam a rak ttha tuk). Pa Vung nih cun Air Show a rak ka sawm tuk. Oi khat cu u Thla he kan va kal. Apingpi ah a rak kan kalpi hrinttung.

Pa Vung hi biaknak rian a ttuan mi a si ko nain science le logic in khua a ruat deuh. Mah ca'h cun biaruah ka zuam. Amah zong nih bia ruah awk ah a ka duh. Cun thil a thei tuk, zei kong poh fiang tuk in a hngalh. Cun mi lawmhpiak a thiam tuk. Geology ka cawn hawihna hi a ka upatpiak tuk. 2018 CBCUSA Civuipi i thlah nak hla kha keimah phan mi a si i, an remh dih lecangka a ka lawmh tuk colh, Rev. Dr. Hrang Hlei he. Mahti cun mi lawmh a hngal.

Kan iton nak poh ah, mibu ton nak zong ah, kan dang in fianrial ah bia kan iruah ta tawn. Indianapolis a rat ah keimah chawnhtak lo in a tlung lo. ICBC Mino Gospel Team ka zul hna i Emmanuel CBC cu kan tlawng hna. Nang cu kan inn ah na tlung lai lo si maw a ka ti. Iai tiah ka tlung hna. Kaa tlunsual cikcek. A fale 7 ti hna kaw an rual tuk i atlun i tlun lo ding khi an si. Aho hmanh itlunter ti hna hlah u law ka ti taak hna. An inn tlun a sianh mi minung pa hnih lawng nan si e an ka ti. An biakin hmun a ka zohpi. Hmai cuan tuk bu in khua a ruat ti a lang. An thing cin mi tehna kan zoh. Thing dawh keuh cu Lai Ram ah kung 150 hrawng ka kuat e ti ka chimh. A lau bak in a lau; tuah awk na hngal tuk e a ka ti. An biakin cu lukmalak ah (amah hruainak in) an sak dih ko, biakin ttha pi. A krifabu zong cu fek lakin a bunh taak.

CBCUSA ah Board of Directors member kan si veve. Bia kan caih tti tawn. Nikhatkhat cu General Secretary a si lai i zung khat ah rian kan ttuantti te lai tiah ka rak ruah. Chimh zong ka chimh bal.

Thla thum si-in i a lumh hnu ah dam a panh. Ka va zoh ta. An inn in TV in zoh a si. A hmai zong a panh. "Ka dua, na zual ka theih ah khan pei ka ngaih a chiat tuk cu! Thla ka'n campiak lengmang i na dam hlei ti lo i ka ngol i, ka ngol hnu ah atu na dam. Si-in na um chung ah khan cauk ttial awk rak iruat law na chuah in na ttial lai" tiah ka ti. A tha a nuam ngaite i a ka chawnh leen. A aw a chuak lo. Mah cu kan caan hnudung bik a si.

CBCUSA chungtel a thi mi hi CBCUSA nih $6000 lengmang in a bul hna. Mah bul a ttial tu cu keimah ka si. Pa Vung bul cu ka ttial. Cabawm ah ka sanh. 'Maw ka kawite, nangmah bul ngaite dahmu ka ttial' ka ti.

Good people pass away;
    the godly often die before their time.
    But no one seems to care or wonder why.
No one seems to understand
    that God is protecting them from the evil to come.

(Bible)

Ceu Hlun