Kumthar Lawmhnak!

Kum kan chuak i Bawipa kan thangṭhat.

Zeidang hlan ah, thluachuah von rel ta usi.


Hniarlawn

Zeizong vialte hi anmahle an caan te a serpiak cio hna; cun minung kan lungthin chungah  hmailei thil hngalh duhnak a chiah; asinain Pathian  tuahmi tling te i hngalh khawhnak cu a kan pe lo. Cucaah minung i a ha bik a tuah khawhmi cu a nun rih lio i ilawmh le a ha bik a timi a tuah khawh chung i tuah hi a si ko. Kan dihlak in ei usi law ding usi law kan uan man hi i nuamhpi usi. Cu cu Pathian laksawng a si. Pathian i a tuahmi paoh cu zungzal in an hmun ti ka hngalh; zei hmanh chap khawh an si lo i zei hmanh zuh khawh zong an si lo; minung nih a hmai ah ihnak a ngeih nakhnga Pathian nih mahti cun a tuah. A um liomi hi a um cang mi an si dih ko; a um dingmi hi hlanah a rak um diam ding cangmi an si; Pathian nih a um ciami thil a um hanter lengmang hna.


Jenny & Lal Biak Hnem

Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang.

Nannih hmun kip kaa kip i a um mi vialte hna, Pathian nih thil ha a'n chimh cang hna. A'n hal hna mi cu dingte i thiti le zangfahnak ngeih le nan Pathian hmai i toidorte i khua sak kha a si.

Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin thluachuahnak a si lai i nan hnu i a rung um ding tefa tampi kong a si lai. Nan ka hal i ka sinah thla nan cam ahcun nan bia ka'n ngaihpiak hna lai. Nan ka kawl tikah nan ka hmuh lai; nan lung dihlak in nan ka kawl tikah nan ka hmuh lai, tiah Bawipa nih a ti. Cun nannih cu vanhat kan pek han hna lai i miphun vialte sin le hmun kip i ka'n hawl hna nak hmun khan kan pumh han hna lai i salcannak chung i kan kalter hna nak hmun khan nan rak ithawh nak nan ram ah khan kan kirpi han hna lai, tiah Bawipa nih a ti. (Phungchimtu 3:11-15; 2 Korin 5:17; Mikah 6:8; Jeremiah 29:11-14)


Hniarlawn

Mi acheu nih hin tukum hi ka vanhat kum maw a si lai, ka vanchiat kum dah ti an ruat heu. Krifami ca ah cun vanchiat e vantthat e ti hi a um theng lo. Pathian nih kan ca ah khua a khaan cia dih ko. Pathian khuakhaanning tu cu kan ruahning bantuk theng in a si lai lo; mah cu theihthiam ding a si. Bawipa nih, "Vawlei nak i van a san deuh ngaingai bantuk in a dawtnak cu Amah a ttih mi ca ah cun a ngan ve" a ti i "Na zulh awk hnga lam kha ka'n hmuhsak lai. Ka'n cawnpiak lai i lungthin ka'n cheuh lai" a kan ti. [Salm 103:11-12; Salm 32:8]

Cuca ah thaizing ca i lungre thei leen lo in nihin lawng ka nung cang lai ti in nung hna usi, voi khat nun ah ni khat lengmang. Thaizing kong cu thaizing nih a chuahpi te ko lai. Baibal nih, "Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo" a kan ti Mt 6:34 ah. Hla zong nih hiti hin a kan ti.

Thaizing kong zei hmanh ka hngal lo,
Nikhat ca lawng in ka nung...
Si hmanh seh, hmailei caan a tlai tu cu ka hngalh.


Blue Ridge Quartet
a bia hika ah

 

THLUACHUAH REL HLA


C. Luri

Maw Bawipa, lawmhnak bia ka chim,
Thluachuah malsawm phunkip le,
Bawi Zisuh na ka pek ca ah,
Khamhnak sung cu ka hmu ve.

Na sin ah lawmhnak bia ka chim,
Ei le din fenh-aih vialte,
Nitlang ruahsur le thli thianghlim,
Thluachuah malsawm phunkip he.

Na ser mi awthawng ngaih nuam le,
Rong mawi phunphun ka hmuh mi,
Minung thilser aphun zakip,
Thluachuah malsawm phun kip he.

Ka ngaihchiat i a ka hneem tu,
U le nau dawtu hawikom,
Kal sual nak in a ka kil tu,
Krifabu na ka pek fawn.

Thih ngaihchiat nak ka ton lio i,
A ka hnemtu hawikom le,
Ka ngaihchiat a ka chawng tu ah,
Dawtu na ka serpiak i.

Maw Bawipa, lawmhnak bia ka chim,
Ruahchannak lawmh awk tlak mi,
Zeizong remh tthan nak caan sunglawi,
Thluachuah malsawm phunkip he.

[A hla ka ngaih lo lio ah, Dallas i ka tlun pah vanlawng cung ah, ka leh i a hmaan pah ko hnga lo dekmaw.]

 

Slideshow


Na Duh Vial Ithim

Kum thar ah cun;
• Chungkhat le hawikom sin caan hmang deuh
• Kuak iphiat
• Biabal ni khat caang khat tal rel
• Nuamhnak tuah deuh
• Leiba cham dih
• Thil thar cawng law thiam
• Uah hum
• Mi bawm
• Computer tongh isum deuh
• Rian ha deuh kawl
• Fit deuh
• An caan te ah thil tuah hna
• Zu ngol/thlah deuh
• Zarh hnih oi khat inlei chawn
• Nupi hi
• Sem rel
• Na soulmate kawl
• Na inn amh deuh
• Hmaan oi nga ithla
• Kaa khatkhat tlawng
• Na leen bal lo mi inn 5 ah leng
• Ca rel deuh
• Khaini ngol
• Mi kom deuh
• Caan hman thiam
• Ngaknut hngal
• Khonh la sawhsawh
• Saaal thoh deuh
• Duhsah deuh in mawaw mong
• Ih isum deuh

 

Kumthar lawmhnak le thluachuah nan dihlak cung ah um ko seh.

Baibal Caang Zuh Awk