Robert Browning hi cattial tawn a si i, nunnak hi thil hme te a si ti zong a rak ttial. Asinain cu thil hmete cu nunnak tluk a si kho. Nunnak thap hnih tluk zong a si kho ko. Ka hngalhhngalh! Zeitin tiah kumhmasa ah khan ka kawi Scott Reasoner he Denver khua ah thil fate a si ttung i vawlei a thleng kho mi kan ton--mitam i aruah awk hmanh an hngalh lo mi.

Mah lio cu Denver hrawng i khua a tthat lio te a si. Van a thiang dih. Vanrang a kiang dih. Khua leng i hawttol ah rawl kan ei lai kan ti i miphor mawttaw icit lo in kan ke in dal hra lonh ah kan kal. Mah hawttol cu zawlduan i a um mi tuallai ah an sak. Tual kam ah zei le zei tete khi dek an thlai hna, zohdawhte'n.

Cabuai kulh cun kan tthu ko. Ni a hong lin hiahmah i a kan emh chin lengmang. Cabuai zong a lin. Thli le a hraang lo. Kan pawng thil cu zei hmanh an caang lo, an thlai mi tete zong cu. Dawrhngak pawl lawng a caang mi an si. Zeidang cu daidep in an um dih.

Rawl kan ei dih cun a pawng dawrpi ah cun kan hong kal. Dawr kan luh lai ah nu-fa hawl kh`at dawr i an ra chuah khi kan ton hna. A fate cu kutkhat in aa hruaih i, a kut khat in a khaat ca cu a rel pah, kalpah in. A khaat ca rel mi ah cun maw a lung a bunh tuk zeidek, miphor mawttaw amah lei i a rat hmanh zoh a hngal lo. Scott a lau vial ah cun mawttaw nih cun a suk deng cang hna.

Scott ka au lai a ti vial ah khin thli te a hong hrang i, minu i aa put mi ca cu a choih ko, a hnulei ah. Awh tiah a tlaih hnek i a tlai manh lo i ca cu vawlei ah a tla. Aa let i a hei char. A fate zong cu aa nok dih. A char dih i aa mer vial ah cun mawttaw cu a lan cang. An nu-fa in an him. Mawttaw nih a kan rial deng ti hmanh minu nih cun a hei hngal ttung lo.

Mah ni cu thil pa hnih nih ka lung a ka tuai. Pakhatnak ah: khuazei in dah mah thli kha a ra hraan? Rawl kan ei chung vialte zei thli chem khat hmanh a hraan ttung lo. Mah hnu zong ah a hraan ttung lo. Zei thli nih dah mah caku kha a choih ual hnga ka ti.

Apahnihnak ah: ka hawipa Scott kha au manh seh law, minu nih khan kanmah a kan zoh hnga i mawttaw zoh lo in a kal hnga i a rial ko hna hnga. A au manh hlan ah thli a hraan cu a si. Thli nih cun caku cu hmun him lei ah a choih i minu he a fate he an hmm cu a si. Thli cu mawttaw ruang i a ra chom mi a si fawn lo. Khattelei tu in a rat cu a si. Ka ruah lengmang tik ah, cu thli cu Pathian thaw a si hrimhrim lai ti ka fiang. Cu kong tu ah cun ka khuaruah a har hin lo. Ka khuaruah a harh tu cu, cu minu i a hngalh lo cu a si.

Kan kirlei ah cun, kan hngalh lo kar i Pathian i a kan kilven ning hi ka ruat i ka lung a pem ruangmang. Thih le nun kar hi zei ual lo te a rak si ko; thil hmete. Kan nunchung ah hin khuaruahhar Pathian thilti hi kan mithmuh lo in thlizil he kan nun ah a hraang lengmang ko.

Attial tu: Hngalh lo