Laimi nih zu a din zia kan thiam nak hnga ca ah zei tin ko dah kan tuah lai?

Zu hi Lai mi nih adin zia kan thiam nak hnga nan ruah nak rak chuah pi cio tuah u tiah, Rung cin Group khan ka rak taar ii ruah nak bia tak te a chuah pi mi nancung ah lung lawmh awk ngai2 a si. Zu rit ruang ah Laimi buainak harnak a tam tuk kan tawn tik ah, kan lung a nuam cio lo. Buai nak a chuah ter tu pa hrim2 zong ahnu ah cun a nuam ve hrim2 lo ti cu za pi theih cia mi a si ko. A si ah zei tin dah kan tuah kun lai. A khamh cu a fawi lai lo na in pakhat khat cu kan tuah hnek kan ruah hnek ah a ttha lai ti ka hmuh mi pakhat te cu vun chim ka duh.

A hlan lio ah Hakha ah capo thiam mi pa pakhat nih a rak chim bal mi cu,” RCM pawl nih zu an chuan, ABM pawl nih an din, Piang thar pawl nih an rii “ a rak ti. A hman dih lem lo na in, a lo ngai mi aphuah ii nih a chuak ngai, zu buai in kan buai ti duh nak kha a langh ter khawh.

1980 hrawng ah khan Hakha ii Zu nih akan buai pi tuk ca ah Party,Council nih, “Yephio sitsin zay”(White water Operation ti a si lai cu) an rak tuah, Party Unit ah top secret metting tuah ii zan khat te ah Hakha khua sang kip ii zu an chuan nak le an zuar mi pauh tleih ding ah group an rak khuai, Mah ah cun tavuan an rak ka pek bal ve, minung pathum group khat kan rak si, dawr thar cherry lam pawng vial te khi chek dih ding ah an rak kan ti. Mah lio ii kan hruaitu pa cu Kawl Palek Senthum pa a si ii Zu a maung cia mi a si bu in Zu cu a rak kan kawl pi. Pakhat hmanh kan tlai kho hna lo.

Zu a chuang, a zuar tu pakhat “ Z.C.P”nih a rak ka chimh bal mi cu, “ Zu an khamh lei pauh hi a ttha, Zu man kan kai ter ii kan miak deuh ,” a rak ti. Zu a ding pah mi tlang val no K.S.M nih a ka chimh mi cu “Phakanh ah cun Zu a rii mi pauh cu Mi-no-bu pawl nih thing tan ah an ke an hrenh chih hna ii an cawl kho bak lo, keimah zong minute panga an ka hrenh chih bal, zu rit an khawmh khawh ngai ko, Malaysia ah Zu dawr pakhat ah ka hawi le pawl he Zu cu kan ding ii kan mawng pah cang ii kan cawk tthan lai kan ti na in a zuar tu pa Tuluk pa nih a kan pe duh ti lo, nan ni za cang caw ti hlah uh a kan ti “ a ti.

Cu ca ah cun vawlei cung ah hin, Hakha ii Palek Sethum Pa bantuk minungpawl, Z.C.P bantuk minung pawl, Phakanh minobu bantuk minung pawl, Malaysia Zu zuar tu Tuluk pa  bantuk minung pawl, a ding tu  tlangvalno K.S.M bantuk minung pawl, le Zu a rimi he ipehtleih ruang ii aa nuam lo mi, mizapi, tiah minung a phun phun in kan um. A chim a ttial a thiam pa nih cun chim le ttial se law, Zu din a tthat nak si se, Zudin a tthat lo nak zong si se a tam pi a chim khawh ko lai, tam tuk zong an chim an tuah cio cang. Mah le ruah nak cio hi a biapi ko na in Zu rit ii a buai mi kong ah hin cun a ho hmanh a nuam mi, a hna a tla mi an um lai lo tiah ka zumh. Cu ca ah cun Zu a rii mipa khi hmailei a rim nak ca ah zei tin dah kan tuah lai.

Zei ruang ah dah Zu kan rit? Zu rit ii buai a hmang deuh mi chung ah a tam deuh cu mino an si lai. Ca a thiam deuh lo mi a ruah nak le a nun nak a niam deuh mi an si lai. A mah le amah a lung a tei kho lo mi an si lai. Pawngkam hawi kawm fawrh fial nak, hnek chih nak ruang zong ah a si ko lai. Mi pakhat kha Zu ding hlah ti khamh le Zu ri hlah ti khamh cu a fawi mi a si lem lo. A si na in khamh khawh ii zuam cu aherh mi tak2 a si leng ah, za pi duh mi zong a si ko.. Mah ti khamh kan ni zuam kan ni sum cuah mah lio bu khan pakhat chim ka duh mi cu Zu a ri mi pa kha hmai lei a rit ngam deuh lo nak le zu rit ruang ah a buai khawh lo nak ca ah zapi nih ibawm uh si law a nem nak te in vum hrem tuah u si ti hi a si. “ ZU A RII MI PA/NU KHA A RII LO MI LAIMI PAUH NIH HRIAL U SI “( Zu a mawn le a rit lio can ah) ti hi a si ( Ex-communicate  or Shun ). Zu a rii mi pa kan hmuh kan tawn ah cun, Uico a lu ii ek aneh mi tluk khin zoh u si law, Nang cu minung na si nak na thlau, saram bantuk na si ca ah kan mah he um le pehtleih, biak chawnh awk na tlak lo ti bantuk te khin vunzoh ii biakchawnh lo te in aho pauh nih hrial dih u si law a zu rit nak kha nuamh nak in ahmang kho lai lo ii ningzah nak le mithmaibit nak a in lai ca ah a zu rit mi kha zeihmanh san atlai lai lo ii hmailei ah cun rii lak in a ding ngam ti lai lo. A ho pauh nih kan hrail kan kal tak dih bia zong in kan chawnh lo ah cun a buai zong a buai kho lai lo a nuamh zong a nuam kho lai lo tiah ka ruah. Bianabia ah, minung pathum pali zu kan din tti zong ah, kan ni tinh mi cu rit lo ding kha a si lai, din ding kha rikhiah cia (Limit) ngeih cia ding a si lai ii kan rit ah cun, rii lak a ding pa kha cu, a ho pauh nih kannin chawn  lai lo kan nin hrial lai, kan nin chuah tak lai fawh hih ti kha theih ter cio cia ding ii zeitluk hawi kawm unau si zong ah a tuah zong tuah tak tak a herh lai (hmai lei a zia remh nak ah kan dawt ca ah zapi, kawi kawm nih kan chimh hrin mi a si kha kan langh ter nak a si lai).

Zu a rii mi le a rii lo mi hi zei tin dah  kan thlei dan lai ii a ri kan khiah lai? Zu a ding, zu amawng, zu a rii, ti mi hi an ni dang cio lai. Zu a rit zong ah daite in a um ii a it ziar ah cun a ho hmanh hna a hnawh lo ca ah zu a rit mi kha a pawi mi a si lem lai lo.Zu a ding na in a din kan theih  lo ah cun a pawi fawn lo. Zu a mawng timi zawn ah hin, zei tin pauh a si ah, mah pa hi zu a ding tiah a bia chim in maw a umtu hawi her in maw kan theih khawh ah cun zu a mawng mi a si ko ii a pungsan ahman lo ca ah, a luan deuh in a ding ti khawh a si ii a ho pauh nih kan vun hrial ve a si ah cun a lung a tuai ko lai hmailei ah a ralring deuhko lai tiah ka ruah.

Cu ca ah cun a chim le a rel cu a phun2 in kan pastor pawl le hruai tu pawl nih a tam tuk an chim an nizuam dih cang ii kan nirel deuh ti nak um lo in kan mah ning leng mang kan si rih ca ah, ruah nak theih lo in mah ti tal hin “ EX-COMMUNICATE or SHUN “ tuah hi hmang tuah u si law  atlawmpal tal san a tlai hnga maw tiah ka ruah mi a si. Zei tin dek nan ruah cio.
Nan Hawikawm,
R.H.Ceu
Kuala Lumpur
19th January 2002