CHIN EVANGEL CENTENARY
HAKHA, CHIN STATE
APRIL 3, 1999, SATURDAY MAIN SERVICE
10:00 AM - 1 PM


Speaker: Rev. Dr. Stephen Hre Kio
 


Texts:
1. Salm 33:12. "An Pathian ah BAWIPA a simi miphun cu lunglawmmi miphun an si. BAWIPA nih a mi ah a thimmi hna cu lunglawmmi an si."
2. Jeremiah 29:11. "Keimah lawng nih nan ca i kaa tinhmi cu ka hngalh. Cu kaa tinhmi cu nan hatnak a si i nan rawhnak a si lo; nan hmailei cu ruahchannak in a khatmi a si," tiah BAWIPA nih a ti.
3. I Piter 2:20-21. "Palhnak nan tuahmi ruangah nan in awk a simi tuknak nan huah ahcun cucu thanghat awk tlak a si maw? Asinain a hmaanmi nan tuah ruangah hremnak nan in ahcun Pathian nih thluachuahnak an pek hna lai. Cu bantuk mi si awkah cun Pathian nih an kawh hna cu a si."


Thlacamnak: A kan dawtu le kan dawt vemi Bawipa kan Pathian, nihin atu caanah hin na Thiang Thlarau in run kan umpi ko. Kan sinah thli bantukin ra law kan sualnak kan chemhlo piak ko. Ti bantukin ra la kan thurhnomhnak kan tlengfai ko. Mei bantuk zongin ra law a thlithup i kan sualnak le kan lung chung a thuhnak bik hmun i kan i kenmi sualnak zong run kaang dih ko. Na mi thiang kan si khawhnak hnga. Na bia thiang cu nangmah nih run phuang ko. Kan Bawipa Jesuh Khrih min in kan in hal kan Pa Pathian, Amen.


Bia cherhchan (theme):
Adam cu dai ziar in a um, biatak aw cu a thang.
(The silence of Adam, and the voices of truth)


HRAMTHAWHNAK:
Nihin hi Laimi kan i lawmh ni a si, zeitintiah kan zumhnak kum 100 a tlin ni a si. Nihin hi Laimi hla kan sak ni a si, zeitintiah Thawnghabia nih kum 100 a kan umpi cang. Nihin hi Laimi lunglawm in kan laam ni a si, zeitintiah misifak, mihrut phun kan rak si nain, kum 100 chung Pathian nih a kan thlauthlak lo, ti a fian ni a si. Cucaah Laimi hna i lawm u. Nan thinlung dihlak in i lawm u. Fakpi in hla sa u. Nan chung i a ummi vialte he Bawipa cu thanghat u. Nan fimnak le nan thiamnak he Bawipa cu thanghat u. Nan i dawhnak le nan hawnnak he thanghat u. Nan ngeihchiah le nan sui le nan ngun he thanghat u. Nan laam dawhdawh hna he Bawipa cu thanghat u. Nan khuang le nan daar, nan guitar le nan sumsel he Bawipa cu thanghat u. Zeitintiah Bawipa nih, muihnak chungin ceunakah a kan phanh ter cang, hruhnak chungin fimnak hmunah a kan hruai cang, hnipuan chumcheu lawng hruk miphun in hnipuan tlamtling te i aa hrukmi phunah a kan tuah cang, saram bantuk dir hmun in minung dir hmunah a kan chiah cang. Lutan duh ah lu a kawlmi phun in minung thinlung duhah Bawipa caah lung a kawlmi miphun ah a kan ser cang. Baibal Cathiang zong kan ngeih cang caah vawlei cung miphun lakah relcih kan si cang. Satan ram a simi kan Lairam hi Bawipa ram si awkah aa mer cang. I dohnak ram in i dawtnak ramah kan i mer cang. Cucaah Laimi hna i lawm tuah u, i lawm u tiah ka chim han. Nihin ni thawk hin kan Ram cu Bawipa ram si cang seh. Cuti lawng cun kan Ram hi ram nuam a si lai. Salm 33:12 chung i a ummi hi ruat tuah u: "An Pathian ah Bawipa a simi miphun cu mi thluachuak an si" a ti. Nihin ni thawk hin kan Ram cu Bawipa ram si cang seh, tiah kan phuan caah: Kan Lairamah hin i tukvelhnak um ti hlah seh, Kan Lairamah hin pakhat le pakhat, phun khat le phun khat i huatnak umti hlah seh Kan Lairamah hin a thiang lomi leeng ti hlah seh. Jesuh lawng hi Bawi si cang seh. (Centenary Theme). Kan Pathian min le kan Bawipa Jesuh Khrih min lawng leeng cang seh. Kan Ramah hin dawtnak le ngaithiamnak lawng leeng cang seh. Kan Ram cu daihnak le hnangamnak ram si cang seh. Jesuh Khrih lawng hi kan biakmi si cang seh. Aa dawh lomi cu kan Lairam hin hlonh si cang seh, Mirum hna nih an hlawmthil Bawipa ca i an siannak ram sisehlaw, Misifak hna kha aamhaal loin zohkhenh an tonnak ramah si cang seh. Nutar patar, mahte aa zohkhenh kho lomi hna kha, tlamtling tein zohkhenh mi an sinak ram si cang seh. Ngakah kingro, mi nauta hna kha upat le zohcho an tonnak ram si cang seh. Kan tlaang hna an saan bantukin Pathian kan dawtnak le pakhat le pakhat kan i dawtnak cu saang sehlaw, kan horkuang hna a thuh bantukin Pathian kan zumhnak le zumh tlak kan si-nak cu thuk ve cang seh. Cuti a si ahcun kan Ram cu Bawipa ram taktak a si lai, Kan Bawipa Jesuh Khrih muihmel cu kan ramah a cuang lai. Cucaah ka dawtmi Laimi Khrihfa u le nau hna, i lawm tuah u. Kum 100 Jubilee kan phan cang, i lawm cio ka tuah u. Pathian cu kan i lawmhnak chungah hin thanghat in um ko seh. Amen.

Kum 1949 kum April 3, kum 500 Jubilee ah Hakha khuaah hin tipilnak ka rak in. Kan dihlak tipi a ingmi cu 373 kan rak si. Nikhat tipil a ingmi ahcun a tam bik a si rua. Cu lio i tipil a rak ing vemi hihin ah hin pa zeizat dik nan um ve! Culio Jubilee caanah cun Thlantlang Farrawn nih hlaremh an rak sak i: "Jubilee caan kan phan cang, kannih rual u cheu khat vialte cu, Kan chan ai liim riang mang cang," an rak ti. Atu i rual u pawl nih nihinah hin hi hla hi sak ve kan si. Zeitintiah kannih zong kan chan ai liim riangmang ve cang. Nihin i kum 50 le a cung pawl hi cu hmailei kum 50 kan nung leem ti lai lo.

Hmailei kum 100 chung zeitindah kan kal lai, ti ruah hi a biapi tuk hringhran. Hi kongah hin rual u vialte ai-awh in kaan cah duhmi hna cu hitiin a si:

A. DAL KHATNAK:
Mifim nih: Hnulei thuk deuh i a zoh khomi nih hmailei hi tlamtling deuh in an hmuh tawn, an ti. Kan Laimi lakah cathiammi hna nih an ial ningah cun, Laimi hi Laitlang ah hin AD 1040 hrawngin um kan rak thawk cang, ti a si. Cucu Kawl siangpahrang Anawrahta nih Pagan Uknak (dynastry) a rak thawk ka hrawng hin Laitlangah um kan rak thawk cang, tinak a si. Atu-ah Lairamah hin Laimi hi minung 400,000 hrawng kan um. Cun Mizo ram leiah Laimi 100,000 hrawng cu an va kal. Cun Laitlang in Kawlrawn ah a um chuk hanmi an tam ngaingai i, Rangoon hmanah Laimi ting khat (100,000) hrawng kan um, ti a si. Cucaah Laimi hi kan dihlak in Nuai Khat (one million) dengmang um dawh kan si. Laimi chungah hin khua cheukhatah cun zakhat ah zakhat Khrihfa kan si, Hmun tampi ah (Thlanglei Laitlangah) cun zakhatah 35 hrawng (35%) Khrihfa an si. Buaktlak in kan tuat tikah Laimi hi zakhatah 70-75 hrawng (70-75%) Khrihfa kan si.

Atu-ah hin ZBC (Zomi Baptist Convention) tangah Bible sianginn 6 a um. Cun Laimi nih thokmi le hruaimi Bible sianginn hi Rangoon lawngah 18 a um. Laimi hi Bu tampi ah kan i hen i a hmanung bik ka theihmi cu Bu 60 an um ti a si. Bu hizat kan tuahmi hi a dihlak in Nitlak lei ram in a ra i kan pom mi an si. Bia kan i hal awk a hau mi cu: Bu hizat kan tuah hi Midang nakin Thawnghabia phuan kan duh caah maw a si? Asiloah pawcawmnak caah kan kawl khawh bikmi rian a si caah dah a si? Hi biahalnak a phi hi cu nanmah cio nih rak ruat u law ka duhmi a si. Atu-ah cun Laimi nih Cozah department kipah rianuantu kan um cang. Vuanthok le cung upa an dihlak 127 kan um. Cathiamnak leiah Ph.D., le Th.D., degrees a hmutu hi 14, kan um. Biaknak leiah D. Min., ti bantuk doctorate hmutu hna hi 30 hrawng kan um. Atu-ah Laimi siangngakcia hi a minung cun kan tampi ve ko cang:
    Kum 1901 ah Laimi siangngakchia 7 an ram um, (pa lawnglawng an rak si.)
    Kum 1920 ah Laimi siangngakchia 160 an rak um. (Nu 15 an i tel.)
    Kum 1962 ah Laimi siangngakchia 32,820 an rak um. (Nu 6706 an si.)
    Kum 1998 ah Laimi siangngakchia 89,526 an um. (Nu 42,229) an si.)

Laimi minung nuai khat dengmang, siangngakchia 90,000 dengmang hna hi, hmailei kum 100 zeitindah kan umhut ning a si lai? Zeitindah lam kan kal lai? Zeital i zohchum awk, i tlaih awk a um lo maw? Hi kong hi rual u hna nih kan in cah duh bikmi cu a si.

Kan Baibal nih, "Keimah lawng nih nan ca i kaa timhmi cu ka hngalh. Cu kaa timhmi cu nan hatnak a si i nan rawhnak a si lo; nan hmailei cu ruahchannak in a khat, tiah Bawipa nih a ti." (Jer 29:11). Pathian he kan kal i lawngah kan ca i aa tinhmi cu kan hngalh lai. Chim hau lo a si nain: Pathian he aa hlaatmi hna nih aa tinhmi cu an hngal kho lai lo.

Pathian miphun kan si, aa ti pengmi Israel mi hna, Pathian nih kan ca i aa tinhmi kan theih, a timi Israel mi hna vun zoh ta hmanh u: Pathian miphun kan si, an tinak hi an miphun ziaza in a lang tawn. Israel mi/Judah mi hna nih Israel mi ka si, Judah mi ka si, tihi an philh bal lo. Israel mi, Judah mi ka si, tihi an i zahpi bal lo, Israel mi, Judah mi a si lomi cu an hi an va tawn hna lo. Mi phun dang an hit an vaat hna ahcun an phun in an dawi tawn hna. Pathian minung an sinak kha cuticun an langter. An miphun an hloh ter siang lo, an miphun an tunmer zungzal. An holh zong a thih lai an siang lo i, a herh ahcun an nunnak tiang an pek. An holh a nunnak hnga le a hannak hnga an thilchaw an pek siang. Khrihfabu hi Israel miphun thar kan si, tihi chim han haumi a si. Zeitintiah Khrihfa hi Pathian thimmi kan si, ti cu nizan ah kan theih cang. Hiti kan ti tikah kan ruah awk a haumi cu: Kan Khrihfa zumhnak hi Pathial i pom lomi thil dang he kan cawhchih maw ti a si. Cutikah kan ruah awk cu: Kan Khrihfa Zumhnak hi tiva thiang bantuk si sehlaw, tiva dang i tinawi nih a nawiter lo awk kha i ralrin ngaingai a hau. Tiva ti thiang a luangmi tinawi he cawhchih i nawiter lo awk kha i ralring tuah u. Ti thiang le ti nawi kan cawh tikah tinawi nih a tei heu kha philh hlah u. Ti thiang hrai khat le ti nawi hrai khat na cawh ahcun ti nawi ah a cang lai, ti kha philh hlah u. Baibal ca nih, "Bawipa cabuai le khuachia cabuai zong nan hman kep kho hna lai lo," a ti. Nan hman kep ahcun thluachuah nan tong lai lo i, aa lawm lomi nan si lai. Thlarau thazaang nan ngei lai lo i, Satan i fawite teimi nan si lai. Cucu a si ahcun Bawipa cu nan Pathian a si kho lai lo i, a ram chungah saupi nan um kho lai lo, tinak a si. Bianabia: Tlauhmun ah caw pakhat ka hmuh i safee tamtuk nih a seh caah a der tuk i zeihmanh ah hman awk a ha lo; ei awk zongah a hami a si lo. Cubantukin Pathian minung le Pathian minung a si lomi, Pathian hrai le khuachia hrai, Pathian cabuai le khuachia cabuai, Thlarau mi le khuachia minung kan cawhchih lengmang ahcun, Thlarau thazaang ngei lo in kan der ngaingai lai i, Pathian hman awk ha kan si lo lengah, kan thlarau tiang a thi kho. Laitlang ti thiang, Khrihfa Zumnak ti thiang hi nawi ter hlah u.

B. DAL HNIHNAK:
Adam bang dai ziar i um hi sual a si. Phung kan chim tikah "Adam sual ruangah..." tihi voi tampi kan chim tawn. Adam a sualnak thawngin mi vialte kan sual dih, kan ti. Cucu Baibal chim ningte a si ko. Kan palh lo. Paul nih Rom cakuat a ialmi chungah tampi kan hmuh ko. (Rom 5:12-21) Adam sual loin rak um sehlaw... kan ti tikah Adam sual loin rak um sehlaw, kei zong kan sual hnga lo, ti khi kan chim duh. Asinain vun zoh thuk deuh tuah u sih: Ahodah a sual hmasa? Adam maw Evi? A sual hmasatu cu Adam a si lo, Evi a si. Pathian nih "Ei hlah" a timi kha Evi nih a ei i a sual hmasa. Adam cu Evi i pekmi lawng pei a ei ko cu! Zeicaah Adam kan mawhchiat? Evi tu mawhchiat awk a si lo maw? Aho pauh nih Adam kan mawhchiat zungzal, amah nih i theih sehlaw a ngeih a chia hnga hmanh maw! Nan ka mawhchiatnak a luan tuk, a kan ti meen hnga. Zeicaah dah Evi sual ruangah kan ti lo? Zeicah kan ti ahcun: Adam cu innchungkhar lu a si i lu a si nain daiziar in a rak um, Rulpi nih Evi sual a forh lengmang lioah! Lu a si nain daiziar in a rak um kha sual a si. Evi nih "Ei ve" tiah thingthei a pek tik zongah daiziar in a rak i lak hoi; aa lak lawng si loin daitein a rak ei hoi. Sual a si, ti theih nain daiziar i rak um hi sual a si. Kan Baibal chungah daiziar i a ummi hna zoh tuah hna u sih:

(1) Solomon: Siangpahrang Solomon a min a chiatnak bik pakhat cu "Khuazing dang leiah a lung aa mer"nak hi a si. Zeicahdah a lung cutiin aa mer? Nupi 700 a ngeih caah! Zeitindah nupi 700 cu a tawlrel khawh ka thei lo; pakhat hmanh kan i harh sikaw! A dang cu vun chim lo an hmursensi nupi 700 ca cawk hrimhrim a fawi lai lo. "A hramthok tein nu pakhat le pakhat i um awk a si," tiah Jesuh nih a ti. Hihi Solomon nih a rak thei lo maw? A theih lo zong a si kho. Pathian bia a rak chaangtu profet hna an um lo maw? Ziah an chim lo? Profet an rak um ko; Solomon hmaiah cun daiziar in an rak um cio ko. Hohmanh nih zeihmanh an rak chim ngam lo. Cutiin siangpahrang Solomon cu nupi 700 a ngeih caah a thinlung aa mer i, Khuazing dang leiah thinlung a ngeih caah a ram ukmi cu amah a thih tikah aa hen.
(2) Judah Siangpahrang Manasseh: Manasseh nih Judah ram cu kum 55 chung a uk. Ram uktu siangpahrang lakah a sau bik pawl a uktu a si. Anih zong nih khuachia biaknak biakheng hna tampi a donh, a fapa lila hmanh kha raithawinak ah a pek hna. Pathian a thei lomi siangpahrang hna nakin a zual deuh, sual leiah cun. Zeicaah dik Pathian nih hi tluk misual hi kum 55 tiang ram a uk ter? ti cu ka thei lo. Atu kan chan zongah hin misual uktu pawl hi kum tampi ram an uk heu. Cutluk in a sual ko nain a chan lio i profet aho hmanh nih an chim lo; daiziar in an um ko; "Faale raithawinak i pek hi sual a si," ati ngamtu an um lo. Aho hmanh nih an ti ngam lo! Daite i um kha an vun himnak a rak si!
(3) Bawi Jesuh thah awk i taza an cuai tikah: Judah hruaitu hna nih sual an puh tikah, aho tal Bawi Jesuh a tanh ngamtu an um lo maw? "Rom Siangpahrang Sizar sinah ngunkhuai pe hlah u, a ti," tiah sual an puh. "Keimah hi Judah siangpahrang cu ka si, a ti," tiah an puh rih. Hiti in fiangte i a chimnak khuazei hmanh ah a um lo. Bia an phuahcop caah a si. Asinain ahohmanh nih biahmaan an chim ngam lo. Judah mi zumhnak lei hruaitu hna nih Biatak a simi Jesuh cu an tanh lo; Amah a zultu hna zong nih an tanh lo: Daiziar in an um lawng a si lo; an zaamtak dih! Pathian biakinn ah thla a cam lengmangtu vialte zong nih an daiziar dih ko. "Bawipa nih hatnak le dinnak (a taza mi) a duh" ti an rel ko (Salm 33:12). Asinain Pilat hmai le Herod hmai ahcun an daiziar cio ko.Jesuh tanhtu a ngeih lo caah le Amah an hrawh caah, an daihziar caah, Judah mi hna cu kum 1900 chung miphun vaivuan ah an cang. Hitler kut lawng hmanh in million 6 (6,000,000) an thi. Nihin zongah hin Adam cu a daiziar heu ko. Pumpak kan nunnak ah siseh, kan innchung khar ah siseh, Kan Khrihfabu le kan Ram chung zongah siseh, daiziar in kan um heu ko, a sual mi a si ti kan theih ko zongah! Cucu Adam kan lawh heu zungzal nak cu a si. Bianabia: Hitler chanah, Germany ramah, Hitler palik pawl (SS pawl) nih mi an tlaih hna. A hmasabik ah nulenu-palepa sualnak tuahtu (homosexual) an tlaih hna. Asinain hohmanh an au lo, Khrihfa zong nih zeihmanh an tuah lo, daiziar in an um. Kannih homosexual kan si lo, homosexual cu kan huat hna, an ti. A changtu ah Komunist an tlaih hna, Khrihfa zong nih an bawm hna lo, kannih Komunist kan si lo, Komunist cu kan huat hna, an ti. Cuhnu-ah Judah mi an tlaih hna i an thah hna. Khrihfa nih an au piak hna lo, an bawm fawn hna lo. Kannih Judah mi kan si lo an ti hiamhiam. A hmanung bikah "kanmah tlaih awkah an ra" - Khrihfa hna an kan tlaih. "Cutikah ahohmanh a autu an um ti lo, tlaih an si dih cang." Khrihfa hna nih a hramthok tein midang caah au loin daiziar in an rak um caah, anmah an tlaih hna tikah a auto hohmanh an um ti lo. Aho pauh daiziar in an um dih cang. Cucaah Hitler chan sualnak cu a mui a chia bikmi sualnak a si.


C. DAL THUMNAK: Biatak aw cu ring seh.
Biatak timi hi dinnak in a lang tawn. Biatak um ahcun dinnak nih a zulh tawn.
(1) Bianabia: Abraham le BAWIPA bia an ruah kha ruat hmanh u (Gen 18:25). An biatlangpi an i ruahmi cu Sodom le Gomorrah kong a si. Sodom le Gomorrah cu dinnak a um lonak khua an si. Abraham nih dinnak a tlaihchanmi kha BAWIPA nih a theih piak: "Vawlei cung dihlak biaceihtu Dingthlu Lairel nih nih dingtein pei a ceih ko lai cu," tiah a ti. A taza mi, a dingmi, a hmaanmi kan chim tik pauh ah biatakah kan dir i, biatak aw cu a thang.

(2) Joseph: Egypt ralbawipa nupi nih Joseph a tlaihhrem hnek tikah Joseph nih: "Cu bantuk thil sual cu zeitindah ka tuah khawh lai i, Pathian cungah sual in ka um khawh lai," a ti (Gen 39:9). Biatak aw cu an daihter hnek, Joseph thongah an thlak. Asinain an daihter cawk lo, a ka an phit kho lo. Thong chung zongah cun mi nih a dinnak kha an rak hmuh thiamthiam. Biatak cu thuh khawh le phih khawh a rak si lo.

(3) Profet Nathan: Siangpahrang David nih Uriah nupi a fir tikah profet Nathan cu daiziar in a um lo. A nunnak ca zongah phan awk a um. A riantuan - Pathian bia phuannak - khan David nih a kham khawh. Thong zongah a thlak khawh, a thihnak lam zong a sial khawh ko. Asinain Nathan nih ih loin David sinah a kal. Bianabia a va chim: Mirum pakhat nih tuu tampi a ngeih, Sifak pa nih cun pakhatte a ngeih. Asinain mirum pa nih misifak pa ngeih chunte cu a lak i a thah, a ti. Cucu David nih a theih tikah, "Mirumpa cu thi seh," a ti. Cutikah Nathan nih, "Cupa cu nangmah hi na si," a va ti. Nathan hi Israel miphun nuntertu pakhat a si.David nih a sualnak man cu a in: Uriah nupi a chuh caah David fapa a thi. Cu lengah David nupi hna kha midang nih a mithmuh ah an sualpi hna.

(4) Esther: Siangpahrang bawinu Esther nih a nunnak pek awkah aa tiim. A va cu Persia siangpahrang Ahasuerus a si i, nawl ngei tukmi a si caah a nupi hmanh nih siangpahrang amah nawl loin an tong kho lo. Esther ca-uk chung i kan rel bantuk in Esther cu daitein a um kho lo. Zeitintiah a miphun Judah mi kha thah dih awkin khuakhangtu an um. Cucu a vapa siangpahrang Ahasuerus nih a thei lo. Thih le thih tiah a va siangpahrang Ahasuerus cu a ton. A pu (Esther pu) Mordecai bia hi ruat hmanh u: "Hi bantuk caan i daite in na um ko ahcun Judah mi caah cun himnak le  luatnak cu hmun dang le kaa dangin a chuak hiam hiam ko lai... Hi bantuk caan caah hin dah kaw pennak chung i
na phak hi a hei si ko hnga cu." a ti (Est 4:14). Pathian nih Esther bia cu a hman i Judah mi thah dih si loin an luat.  Esther daiziar in a um lo caah a miphun khamhtu ah a cang.

(5) Jesuh Khrih: Jesuh hi a daihziar caan nak in biatak a chimnak aw a ring deuh. A daihziarnak caan cu: Messiah a si ning an theih sual, a hmaan in an thei lo, ti a zumh tikah "Hi kong hi va chim hlah u" a ti theu. Cudah ti lo ahcun Jesuh hi biatak a dirpi ngai mi a si. Judah mi hruaitu hna a soisel hna tikah hin a bia a fak ngai tawn. Cuti a fah lo ahcun an sualnak a chah tuk cang i a hlan kho hna hnga lo. Farasi mi a tinak hna pakhat cu: "Khua kan hmu nan ti caah nan sualnak cu a taang rih, Khua kan hmu lo ti ulaw nan sualnak hi ngaithiam a si hnga," a ti. A chim duhmi cu: Mi sual kan si, ti i thei ulaw nan sualnak hi ngaithiam a si hnga. Atu cu sualnak kan ngei lo, nan ti caah nan sualnak ngaihthiam a si lo, ti hi a si. Thlarau nih a hruai mi hna lawng nih midang thlarau kong hi an theih khawh. Daiziar i Jesuh a um lonak hi mi sualnak kha fiang tukin a hmuh caah a si. Fiangtein a chim hi mi sual caah ceunak a si. An caah a nuam lo nain an damnak a si.

Biatak aw a rin tikah, bia hmaan kan hmuh khawh i kan khamhnak a si. Mi nih a aw phih an duh nain an phit kho tawn lo. Zeicahtiah biatak cu Pathian ta a si: Jesuh Khrih a si. "Keimah hi lam le BIATAK le nunnak ka si" a ti (Johan 14:16). Hi bantuk biatak aw a rin, a than tikah hin hatnak le dinnak, a taza mi hi fiang deuh in kan hmuh tawn. Hi bantuk biatak aw hi kan ziaza kan i zohnak tahfung a si. Hi bantuk biatak aw hi kan i zohchunh awk kan aalaan a si. Zeitintiah Biatak cu Jesuh Khrih a si caah Biatak an phuannakah cun Jesuh Khrih an phuan a si ve. Cucaah atu chan kan ram nih hin biatak cu a herh ngaingai ko. Biatak aw hi a ring lo deuh lengmang rua tiah ka ruah. Cu aw a phittu an tam chin lengmang caah a si hnga maw? Khrihfa nih biatak kan chim lo ahcun a ho dah a chim kun lai? Khrihfa nih dinnak tahfung kan langhter lo ahcun aho nih dah an langhter kun lai? Khrihfa nih a taza mi aalaan kan taar lo ahcun aho nih dah an taar kun lai? Biatak nih Jesuh Khrih a langhter a si ahcun Khrihfa lawng hi biatak a phuang khotu cu kan si. Biatak aw cu ring chin ko seh.

C. DAL LI-NAK: Ralrin awk a herh.
Kan chan hi chan chia a si caah i ralrin awk tam ngaingai a um:
(1) Cheukhat nih biatak kan phuan an ti i, anmah BU hmai hatnak lawng an phuan.
(2) Cheukhat nih "Baptist cu an thi" ti zau in biatak phuan an i tiim.
(3) Cheukhat nih "kan BU ah ra law tangka tam deuh kan in pek lai," tiah an i, cucu biatak kan phuan an ti ve.
(4) Cheukhat nih, "Nan Baibal Sianginn hi a min thleng ulaw tangka tam deuh in kan in bomh hna lai," an ti i biatak phuang taktak an i lawhter.
(5) Cheukhat nih "Bu dang mi minung cuzat na lak khawh ahcun laksawng cu zat kan in pek lai," an ti i cucu biatak tuamnak ah an hman. Hi bantuk cu zum hna hlah u, zeitintiah an biatak cu a deuh a si caah anmah bia lila in an foih te ko lai.
(6) Cheukhat nih "AD 2000 ah Jesuh Khrih a um lai," tiah aamahkhaan in an phuan. Hi bantuk biatak phuannak hi AD 150 hrawngin a rak thok cang i, nihin tiang a um. Kum 1975 ah Pastor Nung Kam zong nih Jesuh a um lai, a rak ti. Kum 1992 ah Korea Pastor pakhat nih Jesuh a um lai, a ti. A Khrihfabu nih rawl ul-in Jesuh cu an hngah- thla khat chung! Fapawi nu cheu khat nih an fa an thah, kan rit tuk lai lakcho ka si tikah, an ti. Cu Pastor pa cu thla thum hnu-ah palik nih an tlaih i thongah an thlak. Hi bantuk hi zum hna hlah u, voi tamtuk an palh cang i an palh rih ko lai. Sihmanhselaw Jesuh cu nihin zongah a ra kho, tiah i tiim cia u. Cun tuhnu kum 1000 zong a rau rih kho, tiah hmailei ca cu damh kanh in rak tuattan cia u.

CCOC kongah tlawmte chim chih ka duh: Tukum hi CCOC program dih kum a si. Cun CCOC tuzan in a dih cang, tiah ZBC Upa nih April 1, zan i an chim tikah, CCOC a rak kal cia mi ngaknu tlangval tampi nan ah kha ka hmuh. Khati i nan ah kha ka ngeih a chia ngai nain khat lei kamah cun kaa lawm: Pathian caah uan mi ngol lai nan sian lo caah a si, ti ka hmuh. ZBC nih nan uan awk cu an in ruah piak ko hna lai, tiah ka zumh. Cun CCOC nih harnak tampi nan ton mi ka theih ko; Nizan ah ka tonmi CCOC palai pakhat nih a kut zaphei ruh a kiak mi kha a ka zohter, lung in an cheh caah a kut a kiak i amah a nun hmanh khuaruahhar a si. Hiti i harnak nan ton tikah nan khuaruahhar hlah u. Harnak nan ton hi nanmah lawng a si lo. Vawlei khuazakip ah a si. Atu lioah hin: Indonesia zongah Khrihfa hremnak an tong, Khrihfa 120 tluk an thi cang: Kan hnulei March thla ah khan Columbia Ram ah siangbawi 6 an thah hna. Sudan Ram ah Khrihfa an hremnak hna i kum 12 tluk a si cang. A dong hlei lo. Tuluk Ram ah Khrihfa thongah an thlak lengmang ko hna. Za zeizat set dah ti kan theih khawh lo lawng a si. Khrihfa nih hiti hremnak kan ton hi, kan kawlmi a si lo; kan par i a ra phanmi a si. Kan kawlmi a si lo nain kan hrialmi zong a si ve lo. Pathian remruah cia a si. I Piter 2:20-21, i kan relmi kha ruah hmanh u: A hmaanmi nan tuah ruang i hremnak nan in ahcun Pathian nih thluachuahnak an pek hna lai, ti a si kha.Biatak a si mi Jesuh kong phuan hi a man a fak ko. Fawitein phuan a si khawhnak ram hi vawlei cungah an tam lem lo. AD 150 ah Smyrna khua ah Bishop Polycarb a rak um i, Jesuh cu chiat serh ko, cucu kan in thlah ko lai an ti. Polycarb nih, "Kum 85 chung ka biak cang i a ka hleng bal lo" a ti caah mei in an khangh i lampi mei vannak ah an hman. Khrih zultu Paul zong nih rel cawk lo hremnak a rak in ve: Voi 5, Judah mi nih an ka tuk, voi khat tukah voi 39 tuknak ka in, Voi 3, Rom mi nih an ka tuk, Voi 1, lungchehnak ka in, Voi 3, ti parah ka lawng a rawk, Voi tampi zanah it lo in le rawl am tihal le hnipuan ngei loin ka um, ati. Paul nih a rak in cang bantuk in kum 1900 renglo chung Khrihfa mi nih an in. Thahnak zong an in: Martaar thisen cu Khrihfa hannak thlaici, an ti tawn. Khrihfa mi nih Biatak a simi Khrih caah harnak an in, i an in khawh ko. Hiti an in khawhnak cu Jesuh Khrih an ngeih caah a si: Biadang in: Hiti an in khawhnak cu Jesuh Khrih nih a ngeih hna caah a si. Jesuh Khrih kha an thazaang a si. Paul nih, "Thazaang a ka petu Khrih thawngin Zeizong vialte ka tuah khawh," a ti (Filipi 4:13).

Philh hlah u: Jesuh nih "Vawlei ka tei dih cang," a ti. Cun, "Van le vawlei ah nawl ngeih vialte kha pek ka si cang," a ti fawn. Van le vawlei tuanbia a donghnak bia a ial laitu cu minung an si lo, Jesuh Khrih a si i, thihnak teitu Bawipa si cang.

BIADONGHNAK:
Tiva thiang bang a thiang mi kan Zumhnak hi nawiter hlah u. Adam bang daiziar in nan um lai maw? Biatak aw dah nan than ter lai? Biatak aw rinternak nih Israel miphun a khamh tawn hna. Biatak hi nan phuan ahcun a man a fak tawn. Sihmanhselaw cuti a tuarmi hna nih cun Pathian thluachuahnak an co tawn. "Cu bantuk mi si awkah cun Pathian nih an kawh hna cu a si." Philh hlah u: Jesuh Khrih nih van le vawlei hi a tei dih cang. Pathian cu thanghat in um ko seh. Kan Lairam Pathian ah Bawipa cu si cang ko seh. Thlacamnak: Hi kan chimmi bia hi Pathian nih a min thannak caah hman a duh ahcun hmang hram ko seh, Amen.
===============================================================
Hakha ZBC Chin Evangel Centenary ah minung 30,000 ringlo an ra i, a tambik cu Hakha holh a hmangmi an si cah Hakha holh in a chim i, Rev. James Tial Dum nih Kawl holh in a leh.
 


A taar tu bia: Amah i a ttial ning ah cun biatlang dang cu catlang dang ah a chiah hna i mah cu atu ah kan peh hna. Cuca ah punctuation aa mah lo mi a um lai i amah palh si lo in kanmah a taar tu ruang ah a si lai. Amah ttial mi i "Ps" a ti mi belte "Salm" tiah kan thlen, hngalh fawi deuh seh tiah.