LianUkonTho

"Thlaithartho" ti mi hi, Laimi tradition asi lo. Krifa chan hnu ah siangbawi te nih American Thanks Giving an tuah mi hi Laimi Krifa nih kan i cawn mi asi. An khan kum hmanh hi kei mah tang ruk tang sarih kan cawn lio Baibal Conference in an khan dahrah ti awk in a um ko. Dicky pa le Dicky nu te nih ttha te in an kan chimh khawh men ko lai. An mah nih American Thanks Giving kan hrawm uh an va ti lo asi hmanh ah an mah tuah mi a thei mi Krifa upa hna nih an kan lak pi mi asi ko lai.

Krifa chan hnu a chuak mi caah kan ttial asi ah cun:

Laimi Tradition cu "Tho" ti long asi. Asi na in "Thlaithartho" ti in nan auh zong hi nan mawh lo tthiam.Laimi Haka lei phung ve ah hin, Mithi an thih hnu mithi khua an thlarau a kal hlan hi minungkhua ah an um chung cu "Mithih an ngai ti mi mithi ngeih" ti mi a um. Cu mithi an ngeih chung cu kan nu le hi an hmai long langh ter in, Muslim nupawl bantuk khin puan lu an i khuh zung zal. Cu puan lu khuh in mithi an ngeih kum khat chung Tho camtuak a phanh hlan chung , zinglei deihlan lokal hlan le zan lei tlun hnu mui deuh tik nifate mithi ngai in lang lo in puan an i khuh i, an ttap ta leng mang. Ttah ti zong ah khin ttah hla lawh i mithi an ngeih ning khi ttahhla in an chim khi asi ti awk zong khin a um.

Cu cu mithi rawl hun awk cinthlak mi rawlttuan a zat lai can ah hin mithi rawl hunh awk tling in kan ngei cang lai ti tik ah nikum Tho in a kumkhat a tlin nak rawlttuancan a phak tik ah Tho cu kumfatin te a mah khuacan te ah Laithla in an rel i, an tuah. Tlangfacang zun khi a za ngai rih lo na in a bai deuh mi khi Mithi rawlhunh awk le Thochung ei awk ah an va zun khi kaa thei bal fawn.

Khuachng le khua pawng kam vial te aan thenh dih. Thlan le lung donh hauka an thlawh dih. Cu kum chung i, mithi a ngei mi chung khar nih mithi khua ah a kal hnga mi thlah nak an tuah. Zu an dap sa zong an that ko rua i, thitlawng khuavang sin in mithi nih a vun kuat hna an ti mi mithi hla phuah khi mithi hlasak ning aw a um i cu aw cun khuang he tiah hla an sa.Changvut le banhla hi sunsak mi ei din in an ruah caah dah asi lai, fu ti te hna, inn cin mi thei hai dang zong mi thi rawl an hunh i zapi an dangh hna. Chnangvut i an den mi hi thlaici phun khat a hong a nal ruang suk den a har ngai mi a um i, Dardin tuan bia i, Acih har seh tiah Dardin kha an den ter an ti mi si nih khin adawh. Amin ka vun philh i asi. Arang anal i aa dawh ngai. Cu cu changvut den awk le zuhui sak awk ah an cin mi asi.

Cu tho can ah mithi khua lei a kal hnga mi an vun don hna an ti i, kum dang i mithi a ngei mi vial te nih an chung khat mi thi minung khua ah an ra ve lai tiah cu Tho can ah cun akhuapi te inn kip ah mithi rawl hunh dih asi. Rawl thaw deuh mehhang chuan asi i, a cheu khua ah cun cingla Pu le lei nih an nu zuar pawl philh lo nak ah rawl va cawih cio asi.

Rawl hun ti cu kan ei mi rawl khi ttuang ah maw khua zei ka maw hmun khat khat ah tling te in ei awk i a thaw ti mi poah khi hmun khat te ah an chiah an deih hna khi asi. A za cang an khim cang lai ti can ah khin an fim hna i, rawl kel in ei tthan an si ko.

Athai zing a nihnih nak dah asi rua Lungdonh ah thing ttial hram ah khin fu te hna banhla te hna khi an va phum. Cu Tho an reh ter cun cu adih chawm mi kum chung i mi thi a ngai mi vial te puan lu an hun dih i, mithi ngeih kha mithi khua an kal cang tiah an i ngol hna. Rawl zong an hun ti hna lo.Tho a reh cangka cun thingttial hram i an phum mi banhla le fu te hna cu ngakchia nih kan phawh i ei zong arak si ko.

Hi hi Zophai tlang lei tuah ning kan hmet lio ta kaa cin ken mi asi i, tling te in ka cing kho dihve ti lo. Kan mah hi kan khua ah ahnu bik Krifa a lut pawl kan si caah hi ka ttial mi hi ka met lio ka hmuh ka tawn mi kaa cin ken rih mi zat long ka ttial khi asi.

Asi na in khual ah siang inn ka kai pah cang. Sianginnkhar ah ngakchia an tlin ve lio ah tuah ttha asi an ti cio caah October siang in khar he an kan tawnh piak i, cu cu Chin Affairs Council nih October thla alai maw , thla adet fate can ah dik, Laimi nih Holiday ah i ngeih ding in Khuado ti hin phungtling te in Holiday ah cozah nih an rak ser. Haka lei nih Tho ti asi, Zophaitlang lei nih cun "Nanglaicheih" ti iasi i, khua pawng kam lungdawnh hau kaa thenh le thlawh ti sullam keng seh law he a dawh ngai.

Zei caah tiah Haka lei zapi in mithi lung donh kann donh piak hna lai ti ah cun, Khua luh lai khua hauka i, a bu in rian maw, ram riah nakkal ah maw an i thawh i mi an ipumh, an i hun ttheu nak khua hauka, le khual lam tha ba mi i dinh nak aa rem nak hnga hmun ah khin lungdonhcu donh phung deuh ah ruah asi. Aruah nak cu, mi nih cat lo in an hman an i dinh nak lai i, lung an donh piak mi mithi min hi anih lung donh ti in miza mi zalam mi nih theih peng hna seh, mithi a min tlau hlah seh, um zung zal seh ti khi an duh nak asi. Cu bantuk cun a lo ram lung donh um nak hrim zong cu anih lungdonh ti in, mikip nih kawh piak asi ttheu ko. Hi ka zon ah hin mirang he kan ruah ning aa khah ngai nak a um. Atu Washington DC i Park an ti mi Ma Pherso Square te Furragatt Square te ti vial te khi khua chung i mi i dinh nak hmun an ser mi khi Mc Pherson Lungdonh, Furagutt lung donh an donh piak mi hna cu asi ve ko.

Cu caah mi i din duh awk in a hmun um zungzal seh ti ruah zong ah mith philh lo nak ah lungdonh hauka thenh can khuathenh can cu rak tuah dawh an si. Kum vui dih can rawl ttuan a zat can bawh in an um caah Thlaithar tho ti awk zong cu asi na in, Tho ti tu hi kan hman mi tradition min asi i, Thlaithar tho ti ah cun American Thanks Giving cu kan Missionary pawl philh ve lo nak ah Krifa chuah hnu in kan hrawm ve hna k\khi asi ko. Tho le Thlaithar Tho cu cu ruang an i dang ngai. Hi Tho cu A Ngunpa nih kan ttial piak seh law an nih khua zong hi hnupi tiang Krifa a lut lo mi an si ve i, a tling kho men ko lai.

Cu bantuk in, a hnu pi tiang Lailei biaknak a zul mi ah kan mah lei ah, Khuabung, Hriphi, Salen, Thantlang , Phaikhua, Cawngthia bik hi keimah theih mi ah an si. Haka khuachung hi Krifa ah a lut lo mi sau lak an um ve ko na in, cozah lei phung nih hin tampi a chilh ve deuh hna i, khuate lei tluk in chunh tah, le conlam, hibantuk khuacang khuacawng "khuacawnghkhuacang " ti mi festival hi cu tluk pi in khuate lei ah an tuah lo ngi in theih nak a um. Cun khual Hringtlang le Mi-e lei Rinpi, Rinte, Haiphai, Chuncung ti hi saupi tiang Lailei biak nak a zul mi an si.

Abik in a hnu pi tiang Lailei biak nak a zul bik mi cu Senthang tlang lei bik hi an si i, an mah ah hin Lailei nunphung dikcak hi a hnu pi tiang an hman nak asi.

Cu caah hi a cung lei kan vun ttial mi khua hrawng atu lio kum 50 tthi nih cun ttha te in an theih khawh ngai rih ko.

Hi Tho hi Tiddim lei nih Khuado tiah an ngeih ve i aruah nak cu kan i khat cio ko hna. Independence hnu cangka Lairam uk nak i Wankyi a ttuan mi hi Pu Vum Thu Maung hi Chin Affairs Minister cu asuii, Pu ManTung Nung hi Parliamentary Secretary an rak si. An pa hnih hin Laiphung in a um mi ve ve an si caah Laimi khuacawng khuacang ti mi Kut pawl cu sung lawi ngai in aruat mi an si caah Tho - Khuado cu October thla ah cun siseh, cun Kumci ti mi hi April May ah siseh , cun chin National Day hi si seh, cu vuithum cu Laimi min te in holiday kan ngei.

Asi na in ahnu in a hung ttuan mi hna hi hi bantuk lei hi biapi in an ruah lo caah dah asi lai, kan hmang setsai hna lo i, 'kumci' holiday hna cu ulh lo ngawt in kan um ko rua dah.Chin National Day le Khuado zong hi khuapi chung umm mi pawl nih hin a phung men in ulh bantuk asi i, hi kan festival pawlhi ttha te in tuah ding ruah tthan awk a herh ngai mi asi. Dam te in, Lnk.