PATHIAN A HNGAL MI NU
Phungthluk 31:10-31

1750 kum hrawng ah khan mi nunthianghlim nutar pa khat a rak um. A hngal mi poh nih "Mama Newton" tiah an auh dih. Inpa ngakchia nih anmah hringtu nu zoh in an zoh cio. A sam a raang dih i a kut ah baannaal aa khih. A bel in mitthli a luang lengmang. Zing fatin le zan fatin an run replo chung kaahrilh hram ah thla a cam lengmang, a fapa John ca ah.

John cu thinchiat in an inn in a chuak i a lo mi a si. Tilawng ah a lut i rili cung ah mi lawng a va zaap. Pathian nemmam a ruat lo. A nun a sual i a pa nih a hlawt. A hrokhrol cu aho poh nih an hngalh dih. Mah na te cun a nu nih cun a um hmun in thla cu a rak cam piak lengmang, ngol lo in. Pathian i a huhphenh nakhnga, a thlarau a khamh nakhnga, thla cu a cam piak thluangthluan ko. A zumh mi pa hnih a um: (1) Thlacam hmual a zumh bak. (2) 'Ka fapa hi aa thleng te ko lai' ti zong a zumh bak.

Pathian nih a thlacam cu a ngaih lengmang i nikhat ni ah cun a leh. John thinlung ah cun khuaruahhar rian a ttuan i John cu a lung aa thleng. Zuripa John cu tilawng phungchim John Newton ah aa chuah. Kum 54 a ti ah Amazing Grace ti hla hi a phan. Atu tiang vawleicung ah sak a dai lo. Pathian nih John Newton cu a hman i Thawngttha a thei bal lo mi tampi nih thawngttha an theih i an lung aa thleng. Thomas Scott zong aa thleng mi lak ah cun aa tel i, a phungchim in si seh a cattail in si seh, minung tampi Zisuh sin ah a ratpi ve hna. Pakhat cu William Cowper a si--Immanuel Thihri Chung In Thisen Tiva A Luang ti hla, mitampi Kalvari mipaampa sin a hruai tu hla, a phan tu kha. Mah vialte hi aho thawng in dah ti ah cun kaahrilh hram i ngol lo i thla a cam mi tar nu thawng in a si.

Abraham Lincoln nih, "Pa liangngan hnulei ah hin nu liangngan an rak um lengmang eh" a rak ti. Vawleicung raltuk tthawng Napoleon zong nih, "Feren ram ah hin nule liangngan um hna seh law, fapa liangngan an chuak ve ko lai" a rak ti ve. Rudyard Kipling nih cun, "Tlang sang bik parbehlek ah khin ka thlai hna sehlaw, a dawt nak i a ka zul tu ding cu ka nu a si" a ti. Vawleicung evangelist liangngan D.L. Moody nih cun, "Ka chuahcanh mi vialte hi ka nu ruang lawngte ah an si" a ti.

A nu lung an phun lio 1908 kum May 10 ni ah Anna Jarvis nih dawt awk a ttha ti lo mi a nu a dawt rih nak langhternak ah tthutpi i a chuak mi vialte pangpar bor khat cio--a nu i a rak duh bik mi pangpar--a pek hna. A hnu kum tlawmpal ah nule sunhlawih nak tuah cu mi lung ah a rong chuak i 1914 May 9 ni ah USA rambawi bik Pu Woodrow Wilson nih May zarh hnih nak zarhpini cu Nule Ni ah hman si seh tiah nawl a chuah.

Ka nu ka bat mi zat dawtnak ka bat mi aho ka hngal hna lo. Mah hmanh ah cun Pathian a thei mi nu ka ngeih hi zeizong vialte nak in kaa lawm bik. Zo hmanh u, atu kan chan ah hin Pathian a ttih mi nu hmuh awk hi an har ngaingai cang. Nu cu an tampi ko. Nu ttha zong an tampi ko. Nu lianngan zong an tampi ko. Si ko hmanh seh law, Pathian a ttih mi nu cu nu ttha le nu liangngan cung ah a cuang.

Rev. Steve Wagers