Zeidang ah krifabu
kan hman tuk. Miphun lungthin aa hlerhlauh hnu in, miphun rian ttuan
nak ah krifabu ttheu kan hman i, krifa hmuitinh taktak asi mi le krifa
bu a um hnawhchan le Zisuh i a kan duhpiak mi hi kan tlolh sual lai ti
phaan awk tlaak in a um cang. Krifabu chung i, Pathian he ipehtlaihnak rian
asi lo mi zeidang rian kan kemh tuk ahcun, thlarau ca i a tthahnem mi, lung
hnangamnak asi mi le Kri sunparnak alanghter mi thil kan tlolh deuh lai.
Krifabu cu tlaang rian le miphun rian ttuan nak ah hman tuk awk a si lo.
Zeidang rian cu kaadang in ttuan ve awk a si ko.
|
Ka pa hi hriamhrei arial mi a si i copkor te zong khi a rak ngei. Copkor cu thing khuar nak tehna i hman mi lai hreitlung fa te, dong can te, a si. Zei poh saih nak ah hman a si lo. Hlanlio Lai inn ttialttamh nak i hman mi a si. Hreitlungbunh i an bunh zawn, tuhmui bunh i an bunh zawn. Hreitlung kan ti fam nih, cang in haar tuk kaw thinghram zong a taih, lung zong a taih, i vawlei cawh nak ah kan rak duh tuk. Ka pa umlokar ah kan rak laak tawn i hnawl dih lak in vawlei kan rak tthuatnak. Ka pa i a hmuh vial ah cun taat hau cikcek a si cang; ceer nolh hau hmanh. Atu kan krifabu zong hi
ka pa copkor bantuk cu a si cang; zei dang ah kan hman tuk. Rianthiang
ttuan nak a si mi cu miphun rian le ram rian ttuan nak ah kan hman lengmang
i, Pathian le minung ipehtlaihnak nakin minung le minung ipehtlaihnak
ah aa hmang deuh rua ti awk zong in a um hnek cang. Mahtining i khua kan
sak rih ah hin cun kan krifabu hi vawlei rim a nam chin lengmang ko lai.
Mi nih Pathian bia ruah lo in, thlarau hnuk din lo in, miphun rian le tthancho
rian lawng an ruat lai i kan krifabu cu miphun khuasak lei tthancho
nak bu ah aa chuah te lai; van lam kan panh lai lo.
Mah bantuk nawn hi naite
ah khan Zenkung LBC kum 10 tlin ca-lungphun mekazin ah ka ttial cang.
Mah ka ttial mi ah cun, atu lio kan biaknaklei hruaitule cheukhat nih
hin e, khamhnak cu thlarau ca lawng si lo in thinlung ca le pumsa ca zong
a si e ti in pumsa lei siarem nak rian tu ah (fawi deuh kaw) an zuang
dih colh i e, thlarau rian ngaingai an kan chei piak ta lo e ti zong
ka telh. Rian ah cun cozah tluk hmanh in tthawng usi law kan thlarau
le Pathian thlarau aa fonh ttung lo le hnangam taktak kan ngeih ttung
lo ah cun krifa sii cu rianthlau le caanheu men a si ko lai e ti zong
ka ti. Mah cu ka hmuhning te a si.
Krifabu phunkip cawlcanghning
cu ka hngal dih lo nain, Tiipil Bu kan cawlcanghning a tlaangvuak pi ka
hmuh khawh tawk ka zoh tik ah, tthanchonak rian le nunphung rian a lut
chin lengmang. Rian kimkip ah krifabu kan hman. Kan thuam kilkawi nak
a si ah, tlaangrél cauk chuah nak a si ah, pupa bia le hla kilkawi
nak a si ah, nunphung dawtnak thinlung ituh nak a si ah, krifabu ttheu
cu kan hman. tthutdan icuh nak zong ah pakhongkhal nih an hman pah. Khual
hmaizah deuh kan ngeih zawn i papeek kan duh tik hna ah pulpit ttheu kan
pek hna. Ramdo va thlauh tiang hmanh ah krifabu ttheu cu hman a si. Zei tal
tuah kan duh ah krifabu hman mit kan au.
Ahlei in, phunramrian a
ngiar mi nih hin an tinh rian hmakalter an duh tik ah, mibu ngei hna hlah
kaw, krifabu ttheu cu hman an duh. An zaang a raam. Krifabu min in cawl
usi law kan tinh kan tlinh lai ti an ruat. Thil ttha a sii ko ca ah krifabu
cu thil ttha ah cun kan hman awk a si ko ti zong in an ruat lai. Krifa cu
vawlei cite kan si i kan pawngkam vawlei cu krifa nih kan thum-al ter awk
a si ti zong an ti lai. Vawlei ceu nak kan si i mi thinlung zong krifa nih
kan ceuter awk a si ti zong an ti lai. Krifabu ningpi i kan cawl lo ah cun
a si kho lai lo ti zong ah an ti lai. Zei an chim hmanh ah, Kri thlarau
i hrin nolh lo mi (piantharnak a ngei lo mi), Kri he kaa tong e ti i tehte
khaan awk huaha a ngei lo mi i an bia cu, mifim bia hmanh si ko seh law,
krifabu kalphung kong ah hin cun, um-e ti colh dih awk a si lai lo. Kan
thlarau him nak bia a si maw si lo ti hi ruah hmasa a hau lai. Tukhaal
nih mah cu an ngiat thiam i an iralrin a hau. An turuun an kan kil a hau.
Cu lo ah cun phunrian cenghngia nih a kan thur dih lai. Kan thlarau khuazei
van hri a sih lai lo.
Atu kan ram khua umtuning
zoh tik zong ah, mah cu kan iralrin ngaingai a hau rua ka ti. Krifabu
i miphun rian le ram rian a cemchih ah cun cozah mit a kem lai i, krifa
hi an kan ai-haat chin lengmang ko lai. Ton zong kan ton cang ko. (Miphun
rian a si lo nain) A herh lo ah vailam tung kan phun. Buai kan ruai.
An kan reep chin. Kan vailam tung phun cu, zei tthathnemnak ngei ttung
lo in, krifa ral a ruai tu ah a cang. Krifabu cu ral kan serh awk a si
lo.
Cun, Baibal i a kan fial
lo mi hrimhrim kan tuah tuk. Langhternak ah, zarhpini kan hman ning
hi zoh hmanh usi. Kum khat ah zarhpini hi voi 52 hrawng a um i mah chung
ah cun, ZBC Sunday, ZBWF Sunday, Mother’s Day, World Children Sunday,
Father’s Day, Judson Sunday, Bible Sunday, Leprosy Sunday, World Communion
Sunday, Cu Sunday, Kha Sunday ti in Zarhpini cu sawkzaa ah kan saam i Pathian
Sunday a tlawm tuk cang. Mah tehna cu tuah lo zong i a poi lo mi an si—rian
hlei le rian hlei. Tuah lengmang ah cun, cubantuk tuah khawh ding cu a
tor ko i tuah khawh ah cun tuah awk lawngpi an si ko hnga. Biana ah, Music
Sunday, Laura Sunday, CACC Sunday, AIDS Sunday, MBC Sunday, Wildlife Sunday,
Youth Sunday, Blessing Sunday, Farle Ni, Sunday School Sunday, Orphan Sunday,
Tukhaal Ni ti tehna zong. Si leen ko hmanh seh law, ttuk le ttak kan tuah
tuk ah cun a biapi deuh mi kan tlolh khawh. Hi bantuk Sundays kan tuah
tik ah, biana ah Leprocy Sunday va si seh law, thinghmui mi kong chim a
si ttheu. Zarh dang ah, ZBC kong, zarh dang hoi ah nu kong ti bantuk, hngalh
lo zong i a poi lo mi, chim le chimlo aa tluk nawn mi, chim a si ttheu
i krifa nun a cawm taktak mi thawngtthabia chim nak caan aa zuuk. Baibal
thawhkhehnak kong tehna cu thlarau rawl ah kan irinh kho lai lo. Rawl replo
he cun tukforh raal kan do kho lai lo. Cu naksa cun, pulpit i akimkip chim
lo in, krifa nun acawm mi bia tu hi heh tiah kan tuh hna seh, pasatorte
zong nih kum khat ca ti bantuk in parawkrem iserh hna seh, zei dang cawh
tuk lo in Pathian bia bakbak cu kan chim hna seh law a ttha hnga. Mah cu
Rev. James Sangawi bia a si. Deirel Cazual te zong ah, Baptist kan pulpit
ah mi tam tuk nih phung an chim i Baptist bu nih kan doctrine kan tlai kho
ti lo e ti in bia a thok i, mah kong i a saduhthah cu a rak ttial. Cu kong
cu amah ka rinh lai.
Miphun rian i krifabu kan
hman ah cun, kan miphun rian ca ah cun bawmtu ngaingai a si ko lai
nain, thlarau lei cun sunghralh hmanh a si lai. Aziah tiah cubantuk
kan kemh tuk ah cun kan pawngkam thil tu ah kan izel lai i, kan tinh
van lei zoh kan hngal ti lai lo. Hi ca ka ttial tiang i ka mithmuh tawk
le hmundang krifabu thawng ka hlat tawk zong ah, khuazakip Lai krifabu
hi kan fil (kan secular) chin lengmang. Kan chimrel mi le kan tinh mi
ah vawlei thil a tam chin lengmang. Pulpit hmanh ah Pathian hla sa setsai
lo in ram hla dok, zatlaang hla (luhmuhzi hla) dok kan sa chin lengmang.
Phung kan chim ah miphun kong. Pumh zong puai a lo an ti.
Krifabu min lengmang i minung
rian kan ttuan ah hin, a rian a tam mi le a re a thei bik cu pasatorte
an si. Rianhlei kan khinh hna a si. Angaite ti ah cun, pasator rian
cu krifa mi thlarau hnuk dinh le turuun krifa zumhnak fehter rian ttuan
si bik dawh in misawhsawh kan mitthlam nih cun a suai i, miphun rian hi
cu annih ttuanvo ah kan chiah piak lem hna lo. Asina in, nunphung rian
zong, caholh rian zong, fimnak rian zong, krifabu min i ttuan a si tik
ah cun, pasator cu zeiti awl hmanh in an iawl kho lo. Anmah kut ttheu ah
rian aa khing. Zumtu nun cawm rian hlei ah, anmah rian kel lo pi, thiam
zong an thiam theng lo mi, kan ttuanter lengmang hna i, annih ca ah zaanghlei
rian a si. An tukhaal rian zong an chei rua lo ka ti; krifa raan kan nun
zoh ah aa hngal ko. Mah cu, rian hlei kan khinh tuk hna ruang ah a si tiah
ka ti ko lai. Zeidang ah kan hman tuk hna.
Cu ruang ah a si; pasator
nih an kan uk e ti bia a um zong hi. Zei kan tuah te tal ah [chimporh
bia fawh] krifabu min lengmang in tuah a si ttung, krifabu chung ah
cun pasatorte cu kaar awk an ttha fawn ttung lo. Krifabu min lengmang
i rian kan ttuan ah cun pasator te cu kan lu le kan pu an si thluangthluan
ko lai. Kan duh mi tuah kan duh zawn hmanh ah anmah i an lu an suk lo ahcun
misawhsawh nih zei kan tuah kho lai lo. Tlaang herhpang kong kan caih lai
ti zong krifabu min i kan tuah ahcun pasatorte ttheu chiarmen an si lai
i anmah ttheu nih an kan uk ko lai. Cun atu kan pasatorte hi atam cu kan
pavekvak le nuvekvak an si. Miphun adaw mi zong an si cio. Pasator an si
hlan i an ngeih mi vision hi nunphung tthohdirh tehna, minung zalon nak
tehna, nunzalonnak tehna a rak si kho i, mah cu krifabu chung i an iluhpi
tik ah, krifabu min in, asiloah, krifabu chung ah tuah a hau cang. Krifabu
nih a riankel lawng ttuan awk a ttha ti lo. Miphun rian le tthancho rian
ah aa phar a hau cang. Miphun thlarau nunnak nak i (<nak in) miphun
tthanchonak a ruat deuh mi, an um a si chinchap ah cun anmah duh ning i
krifabu aa hruai tik ah krifabu cu vawlei lei tu ah a tthawng i thlaraulei
cu a tlolh deuh ko.
Hiti i ti tik ah, miphun
zawn ka ruah lo a si lo. Kan miphun kongkau cu lungngeina nih ruah lo
awk a ttha lo mi a si. Si ko hmanh seh law, kan miphun tthancho nak nakin
kan miphun thlarau nun nak a biapi deuh, krifa mit ah cun. Minung ttemttawn
nak i luat nak in Sehtan ttemttawnnak i luat a biapi deuh. Khuasak siarem
nak in nun hnangam a biapi deuh. Miphun ka daw aa ti mi i a miphun thlarau
an dawt lo ahcun dawt taktak a tling deuh lai lo. Kan thlarau a him nakding
ah cun, vawlei thil i kan lung kan chiah lo hi a biapi. Krifabu chung ah
vawlei thil a luh tuk lo zong a biapi. Mi thlarau an dawt lo ah cun biaknak
rian an ttuan len zong ah tinh ngei lo bantuk ah an cang kho. ttihzah awk
zong a um lai lo. Cuca ah, biaknaklei hruaitule nih cun, chan phanh nak
le tthancho nak khua nak in, mi thlarau lam hruai rian tu ruat in khua khang
deuh hna seh law a ttha hnga. Biaknak le riandang hi kemh lo awk le hromh
lo awk a ttha lo e ti a si i, cu tu cu kan al kho hna lai lo, nain, a si
khawh chung tal cun cawh tuk lo ah a ttha ko hnga.
Atawinak i chim ah cun,
kan miphun nunphung, caholh, biahla le thuamthil kilkawi nak khua aruat
mi nih si seh, nunzalonnak le nu zalonnak tehna aruat mi nih si seh, nuhrinvo
angiar mi nih si seh, ramtin sin i kan miphun langhter ve aduh mi nih
si seh, mahle tinh rian cio ttuan duh tik ah krifabu hi hman itim tuk
hlah usi law a ttha rua lai ka ti. Cu bantuk miphun rian cu, krifabu theng
i ttuan lo in, a ttuan nak hmunhma dang te ser i cuka cun ttuan ah a ttha
hnga. Cu lo cun, ka pa copkor vawlei cawh nak i kan rak hman i a ngolh
dih bantuk a si ko lai. Atu hmanh ah kan krifabu hi taat hau ceer hau
a si leh manh cang rua ka ti. §
|