AHO DAH SUNHLAWIH DING?

Ceu Hlun

Nule le pale upat ding hi Baibal bia a si; nain an sunhlawih nak tuah ding cu Baibal nih a kan fial lo. Mah na cun atu ah Nule Ni cu zarhpini ah tuah lengmang a si. Sunhlawih ngaingai zong a si ca ah biakin tampi ah cun mah zarhpini hi cu "nule biak ni" tluk nawn ah aa chuah. "Mah cu a si awk a si maw" ti le, "zarhpini Pathian biak hi nule sunhlawih nih a laan awk a si maw" ti hi Pathian fale nih ruah a hau cang.

Bawipa Zisuh nih hin vailam cung i a cah lai tiang a nu cu a zawn ruah. Sihmanhsehlaw, a zawn a ruah dah ti lo ah, nu tlaihchan tuk in a um lo, a nunlio ah. Voi khat cu, biakin chung ah sau tuk bia aa ruah cang i an va auh. "Na unaule le na nu nih an in hngah ko" an ti. Zisuh nih cun a thawh hna i, "Ka u le ka nau le ka nule cu ka bia a ngai mi hi an si ko" a ti. Baibal khoika hmanh ah Zisuh i a nu sunhlawih a tuah nak a um lo.

Tuchung hrawng krifa biakin i Nule Ni kan sunhlawih ning zoh tik ah, Nule Ni cu krifa puai phun khat, puai biapi, hei si seh law mah ko cu a bang. Kan sunhsak taktak. Bawipa thawh kan thangtthat ni nak sunglawi deuh hmanh in kan tuah. Biakin acheu ah cun Nule Ni i caanhmangtu ah hin patung lawngte thiah an si i nule cu sunhsak khawhchung in an sunhsak hna. An nupile sunhsak ni zong a lo. Acheu biakin ah cun caan vialte nule kut ah chiah dih a si, anmah sunhlawih nak ah. Anmah zong nih cun an nule dawtnak le nu i a fa a dawtning ko chimrel ve a si. Hlasa nih nule dawtnak le nule sunhsak nak hla ngawt an sa. Pumh pumpaluk cuanh ah Pathian biak pumh nakin nule biak pumh a lo deuh; can zong ah a cang deuh.

Biakin i kan ipumh cu minung le minung ipehtlaih nak ah a si lo; minung le Pathian ipehtlaih nak ah a si. Minung le minung isunhlawih, ipapek, ituavuanh, ithangtthat, le ibiak duh ah a si lo; cungnungbik Pathian biak le thangtthat le sunhlawih ah a si. "To God Be The Glory" tiah hla ah kan sak i, sunparnak vialte Pathian nih co dih seh kan ti. Pen nak nawl le, thangtthatnak le upatnak cu azungzal Amah nih co seh ti in thla kan cam. Mah cu Pathian biak cu a si; biakin kan phanh hnawhchan cu.

Pathian co hnga sunparnak le thangtthatnak cu minung coh ding a si lo. Minung kan coh hna ah cun siasal biak (idolatry) phun khat ah a cang ding a si. Idolatry cu pathian dang biak lawng a si lo; biapi bik i Pathian chiah lo khi a si. Pumh chung ah Pathian biapi bik i kan chiah lo i, zeidang tu kan biapitter ah cun mah cu siasal biak ah a cang. Na nu le na pa na upat hna lai ti hi Pathian nawlbia hlun bik pa khat a si bu ah mah nak i a hlun chin rih mi nawlbia cu, "Pathian dang naa serh lai lo" ti hi a si. Pumh chung zong ah Pathian pakhatnak i chiah lo i minung le minung isunhlawih tu pakhatnak i kan chiah ah cun Pathian lawmh nak a si lai lo. Kan Pathian cu nahchuah a ngei mi Pathian a si.

Biakin i Nule Ni le Pale Ni kan tuah tik zong ah Pathian biak a dawn ding tiang tiang i tuah hi cu ruah deuh a cu cang. Pathian biak tuah hmasa in, Pathian biak aa lim hnu (second program) tu ah nule sunhlawih nak cu adang in tuah usi law a ttha hnga.

4/27/08.