AZIAH DAH NULE NI KAN TI?

Ceu Hlun

Mother's Day hi Laimi zong nih kan tuah lengmang ve cang ca ah Lai min sak ve a hau. Sak zong phun hnih thum sak a si cang. Acheu nih Hringtu Nu Ni an ti. Acheu nih Hringtu Nule Ni an ti. Acheu nih Sunghno Nu Ni an ti. Asinain Nule Ni ti hi a za ko i aa tlaak bik tiah kan ruah.

Hringtu Nu ni kan ti duh lo nak cu: hi ni i upat kan pek mi hi a kan hring taktak tu lawng an si lo ca ah a si. A kan hring tu lo zong hi kan nule an si kho ve. Fa-ei a cawm mi hna, ngakttah cawmtu ngei lo aa cawm mi hna, mi fa aa cawm mi hna, mi fa a caw i aa cawm mi hna zong khi nule an si ve. Anmah hrin taktak si hna hlah hmanh seh law, nu taktak fadawt in an dawt hna i, nu taktak fazoh in an zoh hna. Cutluk i nu taktak dirhmun i a dir ko mi cu an hring tu an si lo ruang ah nang cu a nu na si lo e tiah kan ti kho hrimhrim hna lo. Kan ti ngam nemmam hna lai lo. Lai khua pa khat ah, pasator le a nupi cu fa an ngei kho lo. Fa le an duh tuk ve. I, nu-pa kharkhuah khuah khat nih an fater a bawhte lio in an tthenh hna, laksawng ah. Pasatorte nuva cu an ilawm tuk. Nau cu an icawm i mahhrin fa zoh te in an izohkhenh. Rocotu ding ah an ser (a co taktak). Nau zong nih cun mah nu le pa taktak ah aa serh hna (a hringtu zong ah a rel hna). Mi zong nih mah an fa min cun 'Anih nu', 'Anih pa' tiah auh an si, khua mi nih. Cu tik ah, pasator pa inchungnu cu mah an fate nih cun, amah a hring taktak tu hmanh va si hlah seh law, mah nule upat i upat lo in a um khawh lai? Nule Ni a chuah tik ah zeitin dah a sunhsak lo khawh lai? Nule Ni kan tuah i nule kong kan ruah tik ah, hringtu nu lawnglawng ruah ding a si lo.

Hi kong ah Mirang le nichuahlei mi hi kan ikhat lo. Kannih i 'ka nu' kan ti mi cu a kan hringtu nu (biological mother) zong a si kho, upatnak nu (social mother) zong an si kho. Kan nu u/naule si hna seh, kan nu phunkhat nu si hna seh, kan pale u/nau nupile si hna seh, 'ka nu' tiah kan auh hna. Cun zatlang i kan ton mi misingpi zong kan nule tthi hrawng an si ah cun, fahring an si le si lo hlat theng lo in, 'ka nu' tiah kan auh ko hna. Mitam kan thinlung zong ah, fa an hrin le hrin lo ruat lo in kumkhua i a upa mi nu cu kan nule ah kan ruah deuh hna. Nule sunhsak i sunhsak awk zong ah, kum no tuk fahringka nak cun kan rel deuh hna. Hi kan nunphung hin ruah a hau. Mirang nunphung le ruahning lawng in ruah awk a si lo.

Sunghno Nu Ni ti zong hi bia thlum a si i aa dawh ko nain, sunghno cu nule lawng an si lo. Farle zong sunghno, dawtmi (kan miduh) zong sunghno, fale zong sunghno an si ve. 'Sunghno' hi nule ca theng i hman ding biafang a si lo. Cuca ah, Valentine's Day tu Sunghno Ni tiah kan ti khi a si.

Laimi i nule sunhsaknak kan tuah tik ah, nu pa khat te/cio sunhsak phun in kan tuah lo. Kanmah nule lawng sunh lo in nule dang zong kan sunh dih hna. Kan sunh mi cu mitam an si. Cuca ah plural form hman hau a si.

Mah vialte ruah cikcek tik ah aa khan bik mi cu Nule Ni ti hi a si. 'Nule Ni' ti cu tawi zong a tawi, fian zong a fiang. Dawh zong aa dawh. Kan holh he aa tlaak. Kan nunphung he zong aa kiap.