Graduate School i linguistics cawn kaa domhka ah kan professor nih "value" kong a chim lengmang i Tuluk nu nih, "Value na ti lengmang mi hi zei dah a si" a rak ti. Professor-nu (Mirang) nih cun a fianter ning aa ruat chom i, "Nannih nichuah lei mi cu nu le pa upat le ttihzah nan ngei. Mah khi value pa khat a si" a ti. Tuluk nu nih cun, "Ziah, nannih nan ngei lo maw?" a ti. Professor nih cun, "Ngei hlah. Kannih mah value cu kan ngei lo" a ti. Asia mi cu kan arr nawn. Professor nih cun kan mit-au cu a kan zoh i, "Biatak dahkaw ka chim. Kannih nunphung ah, nan nu le nan pa nan upat hna lai ti zong a um lo; nu le pa bia nan ngaih lai ti zong a um lo" a ti.

Nu le pa upat phung a rak ngei lo mi Mirang zong nih, nu le pa hi upat awk an si ti cu hngal pah ttung hna kaw an sia a rem dih ve lo peidek, kum khat ah ni khat tal cu nule hi upat pek awk an si e tiah an rak hrih. May zarhpi hnih nak hi si seh tiah an ti i mah ni te cu nule sunhsak ni ah an ser--kum khat ah ni khat. Kum khat ah ni 365 chung nule a upat mi rak si hna seh law Nule Ni hi an rak ser theng hnga lo dah. An rak ngeih lo ruang i ni khat te an rak ser mi deuh a si.

Kannih tu cu kan nunphung hrimhrimte nih nule cu a sunhsak zungzal hna. Kum khat ah ni khat a si lo; ni 365 chung kan upat hna, kan sunhlawih hna, kan ttihzah hna, an thih hnu tiang. Nule upat lo ni kan ngei bal lo. Cuca ah, upat pek ni hlei zong kan ngei lo. Nifatin hi nule sunhsak ni a si. Nule cu athluang le athluan in sunhlawih le upat zungzal an si. Mah nunziamawi cu Baibal i a kan cawnpiak ning he aa kiap cia.

Kum khat i ni khat te nule/pale upat ni i hman an hrih mi kan va icawn nak hin, anmah (Mirang) tu nih hin kum khat i ni 365 chung nule upat kan ngeih mi nunphung hi an icawn deuh awk a rak si.