Pa Aa Duh Lioah An Tlaih

1 [Jesuh tu cu Oliv tlang ah a kai. 2 A thaituan zingkate ah khin temple ah a hung chuak :than i mi vialte nih an fuh; cun a :thu i a cawnpiak hna. 3 Cu lioah cun phung cawnpiaktu le Farasi nih pa aa duh lioah an tlaihmi nu an rak chuahpi. Minu cu a laiah an dirter i, 4 Jesuh cu, "Cawnpiaktu, mah minu hi pa aa duh liote ah kan tlaih. 5 Phung ah khan Moses nih mah bantuk cu lung i cheh awkin nawl a kan pek. Hi nu kong ah hin zeitindah na ti ve?" an ti. 6 Cu bia an hal cu sual phawt awkin hneksak an delnak a si. Jesuh cu a kun i a kutdong in vawlei ah ca a :tial. 7 An hal chih len ko caah cun a dir i, "Nanmah lak i sualnak a ngei lomi nih chep hmasa tuah u," a ti. 8 A kun :than i a kutdong in vawlei ah khan a :tial :than. 9 Cu bia an theih tikah an dihlakin pakhat hnu pakhat, upa a hmasa deuh ah, an i zukphiak. A dir komi nu he cun Jesuh cu amah lawngin an kaltak. 10 Jesuh nih a lu a hun tun i, "Minu, khuazei ah dah an si dih? Aho hmanh nih sual an in phaw kun lo maw?" a ti. 11 Minu nih, "Bawipa, aho hmanh nih sual an ka phaw lo," tiah a leh. Jesuh nih, "Kei zong nih sual kan phaw lo; va kal law va sual :than ti hlah," a ti.

Jesuh Cu Vawlei Ceunak A Si

12 Jesuh nih, "Keimah hi vawlei ceunak cu ka si; keimah a ka zulmi paoh cu muihnak ah a tlongleng lai lo, sihmanhsehlaw a ceumi nunnak a ngeih lai," tiah a chimh :than hna. 13 Cuca ah Farasi hna nih, "Nangmah le nangmah na kong na chim i na chimmi zong a hman lo," an ti. 14 Jesuh nih, "Keimah le keimah ka kong ka chim hmanhah ka chimmi cu a hman, zeitin tiah khuazei in dah ka rat ti le khuazei ah dah ka kal lai ti kha ka hngalh. Sihmanhsehlaw khuazei in dah ka rat i khuazei ah dah ka kal lai ti kha nan hngal lo. 15 Nannih cu thisa phung in bia nan caih, kei cu aho hmanh bia ka caih hna lo. 16 Bia ka caih a si hmanhah ka caihmi cu a hman, zeitin tiah keimah lawng nih ka caih lo i a ka thlahtu he kan caih. 17 Nan phung ah biatheitu pahnih an bia aa khah ahcun a hman tiah aa :tial. 18 Keimah le keimah ka kong ka chim i a ka thlahtu Pa zong nih ka kong a ka chimpiak ve," a ti hna. 19 Cuca ah, "Khuazeiahdah na Pa cu a um?" an ti. Jesuh nih, "Keimah zong nan ka hngal lo, ka Pa zong nan hngal fawn lo; keimah ka hngal u law cu ka Pa zong nan hngalh ko hnga," a ti hna. 20 Hi bia hi temple i a cawnpiak hna ah khan thawhlawm chiahnak hmun ah a chim mi a si; asinain aho hmanh nih an tlai lo, a caan a phanh deuh rih lo caah a si.

21"Lodiam in ka kal lai, nan ka kawl lai i nan sualnak chungah nan thi lai. Keimah ka kalnak dingah cun nan ra kho lo," a ti hna. 22 Judah mi nih cun, "Ka kal lainak ah cun nan kal kho lai lo, a ti hi amah le amah maw aa thah hnek?" an ti. 23 A thawh hna i, "Nannih cu tanglei mi nan si, kei cu cunglei mi ka si; nannih cu hi vawlei ta nan si, kei cu vawlei ta ka si lo. 24 Nan sualnak chungah nan thi lai kan ti hna; zeitin tiah amah cu keimah hi ka si ti nan zumh lo ahcun nan sualnak chungah nan thi ko lai," a ti hna. 25 Annih nih, "Aho hen, na si?" an ti. Jesuh nih, "A hramthawk tein kan chimh ko cang hna. 26 Nan kong hi chim le caih awk tampi ka ngei rih, sihmanhsehlaw keimah a ka thlahtu cu a hman i amah sinin ka theihmi cu vawlei ah hin ka thanh chin," a ti hna. 27 Pa kong a chimh hna kha an hngal thiam lo. 28 Cuca ah Jesuh nih, "Mi Fapa cu nan tar tikah Keimah cu Keimah a simi ka si ti nan hngalh lai i keimah nawl in zei hmanh ka tuah lo, sihmanhsehlaw Pa nih a ka cawnpiak ningin ka chim. 29 Cun a ka thlahtu cu keimah he a um i keimah lawngin a ka kaltak bal lo, zeitin tiah amah lungtongmi lawng ka tuah zungzal," a ti hna. 30 Cuti a chim cun mi tampi nih an zumh.

Biatak Nih An Luatter Hna Lai

31 Cun amah a zum cangmi Judah mi sinah cun Jesuh nih, "Ka bia ah nan hmunh ahcun a ka zultu taktak nan si; 32 Cun biatak cu nan hngalh lai i cu biatak nih cun an luatter hna lai," a ti hna. 33 Annih nih, "Kannih cu Abraham hrinsor kan si i aho sal hmanh kan rak si bal lo. Zeitindah, 'Luatter nan si lai' na ti hi a si?"tiah an leh.

34 Jesuh nih a thawh hna i, "Biatakte kan chimh hna, sualnak a tuahmi kip cu sualnak sal a si. 35 Sal cu inn hlum zungzal ding a si lo; fapa tu cu a hlum zungzal ko lai. 36 Cuca ah Fapa nih an luatter hna ahcun nan luat taktak ko lai. 37 Abraham hrinsor nan si hi ka hngalh ko; asinain thah nan ka zalh, zeitin tiah ka bia cu nan chungah hmun a ngei lo. 38 Ka Pa sinin ka hmuhmi kha ka chim. Nannih zong nih nan pa sinin nan theihmi kha nan tuah," a ti hna.

Nan Pa Cu Satan A Si

39 Annih nih, "Abraham cu kan Pa a si," tiah an leh. Jesuh nih, "Abraham fale nan si ahcun Abraham tuahmi kha nan tuah awk a si. 40 Asinain Pathian sinin ka theihmi biatak a chimtu pa keimah kha atu ah thah nan ka zalh; Abraham nih cun Cuti cun a rak tuah lo. 41 Nan pa nih a rak tuahmi kha nan tuah," a ti hna. An thawh :than i, "Lakfa kan si lo; Pa pakhat lawng kan ngei, Cu cu Pathian a si," tiah an ti. 42 Jesuh nih, "Pathian cu nan Pa rak si sehlaw cu nan ka dawt awk a si, zeitin tiah Pathian sinin a chuak i a rami ka si; keimah nawl in ka ra lo, amah thlahmi ka si. 43 Zeicaahdah ka chimmi hi nan hngalh khawh lo. Ka bia nan ngaih duh lo caah a si. 44 Nan pa khuachia hrin ciammam nan si caah nan pa duhnak tuah kha nan duhmi a si. A hramthawk tein lainawng a si i biatak ah a dir bal lo, zeitin tiah a chungah biatak a um lo. Lih a chim tikah amah kotho khan a chim, zeitin tiah mi lihchim a si i lih vialte pa a si. 45 Sihmanhsehlaw a hmanmi ka chim i nan ka zum lo. 46 Nanmah lakah aho nih dah misual na si, nan ka ti? Biatak ka chim ko :tung ahcun zeicaahdah nan ka zumh lo? 47 Pathian mi a simi hna nih cun Pathian bia an ngaih tawn, nan ngaih lonak hi Pathian mi nan si lo caah a si," a ti hna.

Jesuh le Abraham

48 Judah mi nih cun, "Samaria mi na si i khuachia naa hrolh kan in ti hi a hman ko lo maw?" an ti. 49 Jesuh nih, "Khuachia kaa hrolh lo, sihmanhsehlaw ka Pa cu ka upat i nannih tu nih cun nan ka thlanglamh. 50 Asinain keimah sunlawinak ka kawl lo; sunlawih a kawlmi Pa a um i amah cu biacaihtu a si lai. 51 Biangaite kan chimh hna, ka bia a zummi paoh cu an thi bal lai lo," a ti. 52 Judah mi nih cun, "Atu cu khuachia naa hrolh taktak ti kan hngalh cang. Abraham cu a thi, profet zong an thi ve; cun nang nih naa thawh i 'Ka bia a zummi paoh cu an thi bal lai lo' na ti. 53 A thimi kan pa Abraham nakin maw na ngan deuh? Profet zong an thi! Aho ah dah naa rel?" an ti. 54 Jesuh nih, "Keimah le keimah kaa sunlawih ahcun ka sunlawinak cu pakpalawng a si; a ka sunlawihtu cu ka Pa a si, Cu cu kan Pathian a si, nan ti. 55 Asinain amah cu nan rak hngal lo, kei nih cun ka hngalh. Ka hngal lo ti ninglaw nanmah bantuk lihchimmi ka si hnga; sihmanhsehlaw amah cu ka hngalh i a bia zong ka ngaih. 56 Nan Pa Abraham kha ka rat lainak a hmuh lai kha a rak i lawm, a hmuh i a tha a nuam," tiah a leh hna. 57 Cun Judah mi nih cun, "Kum sawm nga hmanh na ti deuh rih lo i Abraham maw na hmuh?" an ti. 58 Jesuh nih, "Biangaite kan chimh hna, Abraham hlan in ka rak um cang," a ti hna. 59 Cuca ah lung an i char i cheh an timh; asinain Jesuh cu a thup i temple cun a chuak diam.