A THO CANG!
A THO CANG!




Click

A THO CANG EEI!




Zarh a hmasa bik ni, khua a dei hlan deuh ah Magdala khuami Mary cu tuante ah thlaan ah a kal i thlaankhar a rak i thawn kha a hmuh. Cuca ah a tli i Simon Peter le a hnuzul dang pakhat, Jesuh nih a dawtmi sinah, "Bawipa cu thlaan in an laak diam i khuazei i an chiah ka hngal lo," a va ti. Peter cu a hnuzul dang he an va chuak i thlaan leiah cun an kal. An pahnih cun an tli i a hnuzul dang pakhat nih Peter cu a lonh i thlaan cu a phaan hmasa; kun in a hei bih i ruak zualnak puan a rak um ko khi a hmu nain a chung ah cun a lut lo. Cun Simon Peter cu a hnu deuh ah a hung phaan ve i a va lut, ruak zualnak puan zong a um ko kha a hmuh; a lu an rak khuhmi puan cu ruak zualnak puan sinah um loin a dangte in aa bil i a um. Thlaan i a phaan hmasami hnuzul dang zong a va lut ve. Cu cu a hmuh caah a zumh. Cathiang i 'thihnak in thawhter a si lai' a timi an hngalthiam rih lo. Cun a hnuzul cu an inn ah an ttin.[Johan 20:1-10]




If we have been united with him like this in his death, we will certainly also be united with him in his resurrection.

A thih nak kan ihrawm ah, a camhthawh nak zong kan ihrawm ve hnga lo maw?
Rom 6:5





Sermon




"Some bright morning when this life is over
I'll fly away
To that home on Gods celestial shore
I'll fly away"



AZIAH DAH KRIFA KAN SI?


Vawleicung ah hin biaknak phun zeizat dah a um hnga ti hi chim awk ah a har. Biaknak pipa an ti mi hi 11 a um i, minung thong 500 cung a um mi biaknak hi 22 a um rua. Mah hlei ah cun biaknak a ngei lo mi hi vawleicung milu i 16% hrawng an si in an chim. Cu, biaknak-ngei-lo minung mah zat lak le biaknak dang mah zat lak ah krifa hi atam bik, vawleipi milu i thum-chuah khat (33%) tluk, kan si. Minung mah vialte hi aziah dah krifa an si, kannih hna zong aziah dah krifa kan si ve?

A ruang 5.

1. Vancungkhua kai kan duh ca ah
Zisuh thawng ttha an theihka ah Laimi nih aziah dah tuante le fawite in an rak zumh colh hnga ti ruah tik ah, ruang dang a um men ko lai nain, "Ni nakin a ceu khua a um ko, Bawi Kri a zum mi nih an co lai" ti hla bia ruang ah a si ngaingai ti cu Lai krifa hmasa chanbia nih a chim. Zisuh thawng ttha an theih hlan zong hin, Laimi nih thihhnu nun le mithi khua tehna cu rak zumh cia a si ko. Asinain, mithikhua cu zei ah rak rel a si theng lo, aho poh i phanh cio ding a si ko i. "A nuam tuk mi thlarau nuncang hmunh nak khua a um ko" ti an von theih hnu ah cun an lung a laak tuk hna. Zeiti tal in mahcu khua cu phanh khawh nak lam a um hnga maw ti an ruah tik ah, 'Bawi Kri a zum mi nih an co lai' ti cu a rak si.
     Cu thlarau nuncang hmunh nak khua cu va um hlah seh, Bawi Kri kan zumh nakding le krifa kan si nakding zei hmanh a um lo. Kan lung i vancung khua a tinh ruang ah krifa kan si cu a si. Cun Bawi Kri a zum mi nih an co lai ti a si i, cu khua phanh ve nakding ah cun Bawi Kri zumh a hau tiah ruah a si. A zum lo mi zong nih an co ko lai ti hi zumtu hna ruahnak ah a um lo.
     Chin Christian College i cachim a ttuan mi sazate chung ah pakhat kaa in, "krifa kan si cu vancung kai nak ah a si ttung lo" ti a rak chuak, i, vancung khua zong um lo dawh in aa chim rua. Naite ah pakhat sin in "Bawi Kri a zum lo mi zong Pa sin an phaan cio ko lai" ti bia a chuak ve. Cu an chim mi cu va hmaan seh law krifa si a herh nak a um hnga lo. Si hmanh seh law, vancungkhua a um i Zisuh a zum mi lawng nih an co lai ti kan zumh ca ah krifa kan si hi a si.


2. Baibal kan zumh ca ah
Krifa nih Baibal chung bia cu an hmaan tiah kan zumh. Cu zumh lo ah cun krifa si lo a si. Krifa nih cun Baibal cu Cathiang ah kan chiah i, Tipil krifa hawihna nih cun kan zumhnak tlaihtung hrimhrim ah Baibal bia cu bia vialte lak i nawlngei bik ding ah kan chiah. Vawleicung mi nawlngei si hna seh, mifim si hna seh, thiam sang si hna seh, theologian min thang zong si hna seh, aho bia hmanh nakin Baibal bia a biapi deuh lai; nawlngei bik cu Baibal hi a si lai tiah kan itlaih. Baibal chung bia sirchiah in, theologian le philosopher bia tu kan itlaih ah cun krifa kan si lo bia a si hnga. Krifa nih cun mifim bia nakin Biabal kan zumh deuh. Baibal i Johan 14:6 kan zumh ruang ah krifa kan si hi a si.


3. Bawi Zisuh nuncan le ziaza kan zumh ca ah
Krifa ti cu Kri hnu a zul mi hna tinak a si. Aziah dah krifami nih Kri cu kan zulh ti ah cun kan zumhngiat ca ah a si. Bawi Zisuh nuncan le ziaza kan zoh tik ah zumhtlak a si tiah kan ruah. Lih a chim nak kan thei bal lo, sual a tuah kan thei bal lo. Cuca ah, anih i a chim mi cu an dik in an hmaan lai ti hi kan zumh bak. A lih le a hrokhrol pi cu a kan chim bal lai lo, mah tluk miding nih hin tiah kan ti.
     Zisuh nih cun, lam le atak le nunnak ka si e a ti (Jn 14:6 ah). Mah cu kan zumh. Lam ti cu Pa sin kal nak lam tinak ah kan ruah. "the way" a ti ca ah, lam cu lam khat lawng a um tinak a si; Pa sin kal nak lam dang a um lo tinak. Cuca ah, mah lam zawh lo cun Pa Pathian sin phanh khawh nak a um lo tiah kan ruah. A chap i, "Keimah in dah lo cun aho hmanh Pa sin an phaan lai lo" tiah a fianter rih. Cu ruang ah Bawi Zisuh lawnglawng hi zawh awk tlak a si i, amah lawng hi Pa Pathian sin phanh nak a si, lam dang um lo tiah kan zumh.
     Bawi Zisuh lo zong in Khamhnak hmuh khawh, Pa Pathian sin phanh khawh, Pathian pennak co khawh a si ko ti a zum cu va si usi law, Zisuh zumh le krifa si a hau hnga lo. Gautama tehna, Mohamet tehna, aho poh kan zumh hna hnga i krifa si lo in Bahai kan si hnga.


4. Bawi Zisuh a thawh ca ah
Gautama tehna, Mohamet tehna zumh lo in krifami nih aziah dah Bawi Zisuh theng kan zumh ti ah cun, anih cu a thi ko nain a thih lon lo ca, a nun tthan ca ah a si. Thi lon seh, lo ko seh law kan zum ve hlei hnga lo. Gautama tehna bantuk, Pathian i an iserh mi, Pathian biak i an biak mi, hi an tampi ko. Asinain an thi i an nung tthan ti a um lo. A nung tthan i a nung rih mi cu Bawi Zisuh pa khat lawng lawng hi a si. Cuca'h amah lawng hi zumh santlai ah kan ruah. Misawhsawh bang a thi i a lo ve ko mi cu zumh awk an um lo. A nung mi lawng zumh awk a um.


5. Bawi Zisuh aa langh rih ca ah
Bawi Zisuh hi a thi bal ti cu al awk a um lo. A nung tthan ti zong al khawh lo mi a si. A nung rih ti cu aphunphun in aa hngal. Mi mang ah a lang. Mi cang ah a lang. Mi nun ah a lang. Mah cu chan tampi chung vawleicung khuaza minung zeimaw zat nih mithmuh kuttongh in hngalh a si. An sin ah a lang i an nun a thlen hna. Tehte an khaan, mi relcawklo nih. "Pathian" dang aho hmanh mahti i mi nun i a lang tthan mi an um lo. Cuca'h Zisuh cu a nung ti kan hngalh. A nung mi Pathian a si ti kan hngalh. Mah ca'h cun kan zumh i krifa kan si.
--Ceu Hlun

3/21/08




Goldnote moving


Because He Lives







He Lives