2009 Krismas Dairi

Pa Hlun

Tukum Krismas cu Dallas ah ka hmang. Ka tufale le kan khua mi terual nawn an um thar i ka tlawng kho bal hna lo. Ka tu Zing Hniang zong a fa kum 5 deng a ti cang, inn an cawk nak zong a sau cang i hmuh ka sia an herh nak a sau cang. Hawikom le theihhngalh dang ka hmuhton lo nak a sau cang mi zong an um. Dangkhat in, ka um nak ah Krismas nuamh lo tuk dawh a si. I, 'tukum cu Dallas tlawng tuah la'ng, khual ka tlawn lo nak zong a sau' ka ti.

Tuanpi in kaa tim cang na'n herhpang a tam ikaa ruahnawl karlak ah vanlawng man a kai tuk i ka ttul. Mah ka ttulh cu Nunu Zing Hniang chim nalak ah zing rian ka ttuan nak ah a hon ka chawnh i, ka lung tluang lak in biaza a ka ruah. Lungtho lak in a ka leem. A ka forh. Mah tluk mi leem le miforh thiam cu! Ka lung a ka laak dih. Mah hnu ah cun, "Ka pu, na pawngkam ah khan internet a ngah nak a um ko lai. Va chuak ta law air ticket cu va zohta ko" a ka ti. Mah cun ka lung a tho thar i "$300 tang i ticket ka hmuh ah cun kaa rel tthan kun lai" ka ti. Rian ka ttin pah ah pakhat nih a hon ka chawnh ve i, "Kum khat ah voi hnih na kan tlawng in voi thum na kan tlawng lo. Mah voi khat tlawn i vanlawng man a tam kong hawihna chim cu! Na chim ding hrimhrim a si lo; a si ning te'n pei cawk ding a si ko cu!" a ka ti ve. Ka lungthli in, 'nangmah zong cu $400 leng liam cun na kan tlawng ve bal hnga lo cuh!' ka hei ti. Inn ka phanh in air ticket cu eet sawhsawh hna nalak ah $200 in ka hmuh vantthat i ka cawk colh. [Hmanthlak: 1995 kum hrawng i nih lawng a rak riantti mi pathum kan si. Atu zong kan nihchuah aa khat rih ko. "Bongte" hi hmaanthlak ah a ha langh a siang tuk lo i a si.]

Zan sml 11 ah ka phaan lai i nan ka hngak kho hnga dekmaw e tiah ka ti hna. An zeite a poi lo. '11:00 tham tham cu' an ti. Vuar tla tuk kaw vanlawng zuan cu an thawn lengmang. Ttim deng ah Dallas khua cu kan heel. Zan van thiang i Dallas aa dawh ning cu, "sui khuapi" von ti awk. Sui ceu in a ceu taktak ko. Ttim hnu deuh ah kan ttum. Kan ttum hnu zong ah sau tuk kan dir i, zinglei 1:00 hnu ah lawngbual in ka chuak. Senri pa le ka tu Duh Ceu nih an ka don, mah khuasik zantlai ah cun. Vuar a tla mi cu khal ciammam kaw lam ah aa dar i mawttaw mongh a har taktak.

Krismas Zing

Ka thawh hlan in Senri aw ka theih cia. Hmuh lai kaa ngaih tuk. Kum 4 fai a ti cang i ka hmu bal rih lo. Atu ka tlawn hna cu amah hmuh ah a si pah. Senri cu USA i hrin mi ah Lai Holh a thiam bik a si lai. Halkha khua i a um mi he an itluk ko ti nakin a thiam deuh leh lai. Bia a hngalh ning hmanh. Ka lung a ka ton tuk. Ka thawh lecangka amah lawng cu ka helh.

Tha Leen Sung le Hniang Hniang an ra, kut tlaih ah. Kan ihmuhton lo kar ah anmah ning te an rak si. Mahle ning te i hmunh khawh hi kan ilawmh nak a si cang. Zahan an ka hngah kong le an ka chawnh khawh ti lo kong an chim (ka phone rawl lo in thi kaw). Zan parawkrem kan suai colh. Tuan ah an ttin i kannih chungkhat pawl Krismas zing rawl ihrawm ah chung nga kan ikhawm. aSil (Silverin) zong har lengmang i USA a phanh hnu in kan kaa hmanh aa tong bal lo i ton lai kaa ngaih. Pasator Chan Mawng te chung, Tawk Tial te chung, Tha Len Sung te chung, Tluang Sung te chung, le Zing Hniang (Senri nu) te chung cu kan si. Senri te inn ah rawl cu an rak chuahpi cio. Hla kan cawng pah lai kan ti. Rev. Dr. Chum Awi nih ka phanh lai a theih in, "A tlun ah cun Bethlehem Arfi kha remh ding a si a ti e, an veng zong a cawnpi hna e an ti. 'Mahti a si ah cun kanmah chung zong nih rak cinh ve usi law an remh sin ah kan tho ve te lai i kan bawmh hna lai' kan ti. A hla cu ka ttial namchan i voi hnih kan saktaak. Rawl cu kan ihrawm. Kum tampi aa hmu kho ti lo mi le ka hmuh bal lo mi ka tule he Krismas zing i rawl ihrawm a si. A sunglawi. Rawl ei dih cun an va iserh cio.

Pumh kal ah an ra ka sawm pah hnek i ka hngak hna. An ra ti hnek rua lo ka ti hnu ah khin an ra, mawttaw ah an sawp. Driver Tha Leen Sung, an u Sui Fam, midawh Dawt Hlei Hniang, Silverin Sui Tum Par le a cousin Marilyn an si. An idawh ning cu, lasi lak ah ka um ttung ka ti pah, a si tthan lo, vanmi lak ah ka um, Bethlehem Arfi a ceu nak ah vanmi an um i a si ka ti pah. Tha Leen Sung cu Dawt Hlei Hniang he hman an ithlak mi ah 'aho he aa dawh deuh' ti kan ihal leen mi a si. A fa a ngaknu deng cang na'n a ziam tuk rih lo. Marilyn hmai cu duh a nung tuk ve. aSil nih le a u Hniang a chei deuh bang a ti, no deuh kaw. Marilyn nih capo a kan saihpiak pah i nuamsup in kan kal.

A ha a lang lo mi hi a phaan thar an si. Kawlram sa-ttal an thlau kho rih lo. :)

 

Krismas cu

Khua a piang in van a thiang. Krismas ni nitlang ka sunh ning. Mah nitlang ka hmuh lawng hmanh kal man ka ngei cang. Khua belte cu a kik tuk i mawttaw le biakin kar hmanh ah kan chet nawn. Kan vong luh cu mi an khat. An itlum lo i inleng tiang an dir. Minung 1300 ringlo an si an ti. Tthutnak kan tin ttung lai lo ka ti. Upa pa hnih nih an kan hruai i hmai ah va tthu u law, seat an in reserve piak hna e an kan ti. Mi ka chawn pah. "Vong lut zokzok, na min an au leen cang khah, pulpit ah khin va kai colh ko" an ka ti. 'Pulpit ah cun zei dah ka ti lai' tiah kaa hal. Hmai ah cun ka va chuak. Sui Hlei Cuai pa nih, hika ah hin ra tthu law a ka ti. Khua a ka ruahter. A chuah kan lawmh mi Bawi Zisuh ca hmanh i hmun um ta lo ah, zeitin dah kei hawihna ca ah hmun a um hnga! Ka ca i hmun a tim tu an um i a si lai mu, maw lawmhnak, ka ti. Vancung ah khin kei ca'h hmun a um ve hnga maw ti ka ruat.

Zoh lo pin hnulei thlak in ka hei thlak i tinh bu thlak tluk a si ko.

Mah lak ah cun hong kai cang law an ka ti i pulpit ah cun ka kai, zei ka tuah lai ti hngal lo in. Rev. Dr. Chum Awi nih theihternak a ka tuah i, mic a ka pek. Aan pau nak ka hei chim ko, tawite. Rev. Chum Awi mah tluk hma faak a iin hnu i dam cikcek i ka hmuh nih a ka lawmhter tuk.

Hnulei kaa her i khuazaza ka zoh. Ka theihhngalh tthing an bau hnga maw tiah. Mi tampi an bau. Hlahruai tawn Pu Sang Mawng, Kevin Thang te chung, Emily-nu, Bawi Cung Nung te chung, tehna. 2003 kum i Krismas ka rak hrawn hna lio ah bu an rak itthen rih lo i, mi zong an rak tlawm deuh i a rak nuam tuk. Atu cu mah lio i muisung tete zong bu dang ah an um cang, acheu chungkhar an dirh cang i thil aa dang dih cang. Hlanlio ka mitthlam ah an cuang pah.


2003

.

.

 

"Houston Ngaleng" zong a ra ve i solo a sa ve na'n kan tanh lo. Luh pah ah a kut ka tlaih i, 'Kan iton nak hmun tthing te Dallas ttheu ah kan iton tthan tawn hita' ka ti. Lung a leng pah, amah zong ka pin te ah a tthu ve ko nain.

Pumh cu aa peh. Thla aa cam. Hla aa sa. Solo hmanh fung li a um. Hlaremh fung tam.

Hall sawhsawh man lo i an hlanh hna mi si kaw anmahte nih sound system an itawlrel i an sound system a ttha kho lo. Hlasak zong phungchim zong hnulei mi nih kan thei lo e an ti. An stage zong a bi tuk. Sathaar hmanh a lan sual deng lai. [A tthu mi hi church chairman Pu No Kham le pasator Ceu Lian Thang, hlasa a dir mi hi Betty Zing a si, an uar ngaite; a nu Chuncung. Atang i angki ttial hi Hriphi Chinchin a si.  Fim pah dawh a si, a mit-au ah. Alang lawng in ka hmuh. Vaal no nih an zual.]

......

CBC hi a milu cun 1300 ringlo an si rua. Pasator tor 7 a ngei. USA Lai krifabu ah mi a tam bik an si. Mah na cun aa pum mi an tlawm tuk tawn an ti. An biakin a hlaat tuk i mah ruang zong ah cun a si pah lai. Bu hnih ah itthen hna seh law biakin hme deuh zong ah an itlum hnga i lamnai deuh ah an ipum hnga i mipuum an tam deuh men hnga. An izohkhenh kho deuh fawn hnga. Mah ruahnak cu pasatorte nih an chuahpi cang rua na in bupi nih an duh lo an ti. Mihrut thong khat an lung aa khah cang ah zei nih dah a ti khawh ti hna?

Mahhna hnu ah hin kan hla cu kan remh ve, Bethlehem Arfi cu. 'A duh mi poh tho u' kan ti hna i an senior pastor pahnih cu hawi hlan bik ah an tho. Midang pa thum an tho ve sual i kan remh mi cu an cawn mi a si lo ciammam i, tthut tthan le an ngamh ti hna hlah kaw an dir ve sawhsawh i a ningzah in an thi deng an ti, ka zaang an fah ning cu. Mah hnu ah Lewisville veng hlaremh a si i a thiam mi poh tho u an ti ve i ka hlathiammi a si i ka tho ve. Xmas zing i phanh i hla fung hnih remh manh cu ka taang rih tiah kaa ruat.

CBC cu ngaknu cang an tlawm e ka ti i, ngaknu no lawng na zoh hna ca'h a si e an ka ti. Tlangval an za deuh rua ka ti.[Hmaan ka thla setsai lo i ka thlaak chun ka taar mi an si.]

Dr. Ceu Lian Thang nih phung a chim. A ttha bak. Ngakchia cu pakhat hmanh an ngai lo.

Ngakchia pawl cu ttuang ah an tthut ter hna. Aa dawh te ding an um set lo. ICBC nih an thahhrulh te hna lai, mui cun.

Rawl ei nak khaan nih a kan zawi lo i nu le ngak ei hmasa a si. Mah kar ah cun nunnuam rak tuahpi a si. Kan hruaitu Cung Bawi a thiam tuk i mi mah vialte cu a tuah mi nih kan lung a kan laak dih, a kan nihter dih. Phun tam nawn aa tuah manh.

Rawl pek an thiam ning cu, to-go box ah an rawn cia dih hna i, bawm cu an on hna i, ilaak cio i duh nak poh ah ei, dirpathluang zong in ivahpi khawh tehna a si. Ihngah le itian leen a hau lo. A rian a rang taktak. Icawn cio awk a si.

Rawl ei dih zong cun luh tthan a si i hlasak tehna a si. Love song zong, zei hla zong, mah duh mi poh sak khawh a si e tiah Dr. Awi nih a thanh i hla ttha ttha an sak ko. Duh Ceu le Marilyn zong an sa ve.

Ziamh leisang hmanh va si seh law, mah tluk hmuhsung tonhar, Krismas i hmaan ithlak lo cu kan ti i kan ithla, thih lai si din in.
Dir i lonh le laan ihuah nak cun, hngawng cei nawnte i tthut hmanh ka duh deuh.

Krismas cu a dih ko.

 

Zan ah na birthday kan tuah lai e an ka ti i, nuamh kan tuah lai kan ti cu, aa tthial hnek mi Ngunngun thlah zan si kaw hawi vialte mahka ah cun an kal dih i kanmah vial lawng dok kan taang, Simon te chung he. Hlasak tehna in kan inuam. Kan itimh ning aa filfok deuh i nu pawl cu an ilungsi lo. Kei tu cu, Nunu le Hnianghniang duet tluk i ngaih ka duh mi a um lo i anmah pahnih hla an itthuanh ah cun zei vaan hmanh ka hai ti  lo. "Zanmang Tal Ah" ti hla tehna. Rebecca nih video a rak kan thlak ziar i, a thaizan i kan izoh ah cun, kan inuamh ngaite ko hen kha an ti. Mah tluk kha cu a za tuk ko e ka ti cia ko, kei cu.

Nuamh cu athaizan kan peh rih ko lai ti a si. Peh dahhe, peh lai dahhe! Tha Leen Sung (ttuang i a tthu mi hi) nih eidin ka khaan lai i kan inn ah hawi he nuamh ka'n serpiak lai e a ka ti. Nunu Zing Hniang (ka orhlei tthu) nih Sukiyaki ka chuan lai i kan inn ah nuamh ka'n serpiak lai e a ka ti ve (an nule unau an si). 'Nanmah unau icaih kun u' ka ti hna. Sukiyaki chuan tu ah cun an tla. Zarhte zan. Chan Hnin Htwe nih khuazei in dek ngaknu dawhdawh aa chuahpi hna. 'Maw, ka naupa, zei bia hen!' ka ti. Pa rual an dang in an ra. A umcia kan si. Dallas i anih anih ti mi an tling dih, awttha Ngun Thawng Cin in paih tthawng Thang Lian Mang tiang. "Ka pu Hlun, kamah kamah aa ti mi poh cu an ra dih ko hih!" a ka ti. Mah tluk cun maw an ka dawt ka ti. Sukiyaki a rak ei na, hla a sa na, capo a sai na, a laam na, a cheep na. Senri-pa ko aa lungsi (misawmtu a si i). Pastor Za Thawng Cin le Marilyn capo an itthuan ciammam i dai lo in ka ni. Mah tluk capo thiam hna cu! Mah zan tluk i ka nih bal lo nak a sau tuk cang. Kaa lawmh tuk nak cu capo an saih zong ah, hla an sak zong ah keimah hoih te bakin in an chim, an sak. A ra mi poh nih an ka 'Hi'. Mah hi pei keimah leen le sunh taktak a si hi ka ti. Vui thah nak in kaa lawm deuh. Zinglei 3:00 ah kan ttian.

Zarhpi Ni

Dr. Ceu Lian Thang nih rawl a ka kawh i dawr ah kan ei. Mah dih cun a inn ka zohpiak. Inn nganpi a si, a ttha taktak. Pumh tu cu CEBC ah kaa pum ve lai e ka ti (CBC nih bia tawi chim an ka pe na'n). Nunu nih kan in pumhpi lai e a ka ti. Tha Leen Sung le Hnianghniang kan hei sawm pah hna. Simon te chung zong kanmah sin pumh kan sawm hna. Kan lung aa nge. CEBC ah cun kan va ipum. Zokhua peng le Mie peng mi lawngte. Mi fel an tam. An biakin cu an iza bakte a si. Aa puum mi 199 kan si e tiah slide ca in an taar. Pastor Za Thawng Cin nih phung a chim. A ttha ngaingai. Khual zong cu a kan don in a kan conglawmh. Mi conglawmh a thiam. [Hmaan ka thla lo.]

Pumh chuah ah Ca Kung nu nih, "Pa Hlun..." a ka ti i ttha tuk in a ka chawnh. Aho he a si kha ka ti i kaa ruat nawn. Kan ihmu ti lo i a rak tar ngaite cang i ka palh cang. Amah nih Ca Kung nu ka si e a ka ti. A fapa nupi cu kan nau a si. An inn ah cun kutcaangcan te kan va leng ta hna, Nunu he. Hawi he itiam mi kan ngei i sau kan tthu manh lo. Hnemhnem inn tu ah kan leng. Lg. Tum Hnem cu inn ttha pi a caw i kan va zohpiak pah. Inn $250,000 man cu a man hnarcheu ka pek cang e, hihnu kum 8 ah cham dih kaa zuam e a ti. A maw Nunu nih, "Nang, Pathian i thlua a'n chuah nak cu chawva lei in a si" e a ti. Kawfi kan ding ta i hawi caan upat in tuan ah kan chuak.

Dallas cu an inn an ttha ngaingai. Pakhathna hawihna cu Kawlram in $100,000 an rak kuat hna i inn $280,000 man an caw an ti. Ka tlun-inn Pu Jerry Tial Peng te inn zong cu inn ttha pi a si, 2000 sq. ft. hrawng (nuamh nak center). Ka hmuh mi inn poh inn ttha lawngte an si. Dallas pawl cu an mawttaw hrimhrim an ttha tuk. Thong nga nga le thong ruk ruk man an icawk hna. Pakhat hna mawttaw hawihna cu thong hra deng man a si an ti.


Zanlei cu ttian lai zan a si cang. Dawr ah rawl kan in dangh lai e an ka ti. Bawi Cung Nung te inn i zanriah ei ding ka si na'n dawtnak a paam hnga lo mei ka ti i ka zulh hna. Zan thum mitkuh cim lo si cang kaw a uai in ka uai. Zoh awk ka tlak ti lo. Aa panh lo mi tlonleenpi cu a nuam lo tuk ai e, beer tal ding tuah ning law ka ti i dawr hme te ah beer dur khat kaa cawk. Texas bak cu zarhpini ah dahkaw beer an zuar cu! Indiana ah cun a ngah hnga lo. Khua a kik tuk i beer cu a ding ngam taktak hnga maw an ka ti nawn (shirt laap khat te he ka si hngehnge i). Kei nih khuakik i beer kik din ko cu pei ka duh tuk cu ka ti. Kaa rawnh dih colh. Mah cun, khacer bing peek an chim bang khin kaa panh ruahmah i ka hmai zong akel a si cang. Dawr ah cun sau tuk tthut lo in ttian kan ser. Bawi Cung Nung te inn ah cun rawl ka hrawng. Bawi Cung Nung nih duh a nung tuk. An rawl nih a thaw tuk. Hawikom hlun sin phanh nih a nuam tuk.

Zan ah kan khua mi rak ipumkhawm u law bia ka'n ruah hna lai e ka ti i an ra ka laak. Zarhte zanlei CEBC church chairman Pu Tial Hre te nih rawl an ka kawh i, Lai Ram nga car bakte le voksa tehna, rawl lak i rawl thaw bik von ti awk an ka chuanh. Maw lawmh! Mi fel tuk an si i an inn ttamh hawihna cu Dallas Laimi inn ttamh vialte ah a ciammam bik rua ka ti. Dallas cu X'mas thaizing cun an innttamh an hmih dih (kei cu Kumthar tiang ka vaan tawn).  Khua mi ah cun ka min lawng a thei i a ka hmu bal lo an tam. Ka tule zong an tam. Suimilam pa khat hrawng an sin ah caan ka hmang. Mah cun ka tlun inn ah an ka chiah. Zan khua a tlai cang. Mah hnu zong cun tlawn sunghar tiah kan tthu rih i khua let lei tthiamtthiam tiang duh bia kan phai.

Kei cu ka kal cang lai e,
Ka khua lam hlaat riangmaang...

Zing 4:30 ah ka phone voi thum a ring. Ka hrut dih. Tlai hlah, zei hlah, ka it ko. Tlun ni pei a si tak kha ka ti. Hnupi ah ka tho i Senri he bia kan iruah. Ka lung a ka tong lo. Ka tule dang vialte cu an ka tlaihchan ning ah ka tak ah abah in an ibat. Senri le a tta cu ni thum ka caam ah an ka kom set rih lo. Cu celngel cu! A nu nih thaithawh a kan serh i ei dih in lawngbual ah a ra ka thlah. Ka zuang ruangmaang, ka mitchachin in. Voi dang Dallas ka tlawn ah cun ka tlunlei ah hawi zuun ka ngai. Atu tan cu a si lo; Indianapolis phanh zokzok ka duh tuk. Camping crusade a um hnek i luh ve colh ka duh. Crusade tuah a tamh bik tu keimah ka si i a hramthok in a dongh tiang va umpi ka duh hna. Vanchiat ah kaa cit ding mi vanlawng a rawk i an remh kho set lo i, lawng dang in kan zuang i, Indianapolis cu zan 8:00 ah ka phaan. Camp luh manh nak a si ti lo. Ka celh pek hnga lo, zan li chung mitkuh cim lo hnu ah cun. "Thaizing tu in ka dawi te hna lai."

 ♫ Kum Hlun