|
‘Long Road Out Of Eden’ Ceu Hlun Aug 19, 2007. Zarhpi ni a si nain mawttaw cung ah Eagles hlaphel ka chuah, Love Will Keep Us Alive tehna. Ka chuah lo nak a sau i ka lung zong te a leeng thar. ‘Album thar chuah rih hna seh law ka duh tuk hnga’ ka ti. Cu taktak ah, a thaizan ah, album thar an chuah lai e ti in fung khat te Yahoo Music in an rak thlah, How Long ti hla. Mah tluk ka duh! A album cu Long Road Out Of Eden ti a si. October 30 ah a chuak lai e an ti. Ni 70 aa ba rih. Hngah a har. Recording an ituah lo nak hi kum 28 a ti cang. A chuak! CD phel hnih in hla fung 20, kum 6 chung an rianh mi. Anmah kel te; an kutzung zong, an aw zong, an style zong. Vawleicung khuaza an ilawm. Radio biachim pa khat nih cun, “Atu cang hnu i hla an sak khawh rih hi cu ilawmh awk ngaingai a si” a ti. Annih nih, “Hla ttha a um, kan aw a um i Joe Walsh i tingtang a tum pohpoh ah cun a ttha ko lai” an ti ve. An bualkaunak hla, No More Walks In The Wood cu ‘Thing Sang Lak I Ichawh Um Ti Lo’ ti, thing le ram an pamh nak le ram a peet an ngaihchiat nak hla a si. “Thing vialte an hau dih cang hna/An um tawn nak ah an um ti lo/Lam kam zong ah burbuk tete lawng an um cang” an ti. Quartet in an sak. Mahtluk hlasak thiam le aw dawh hna cu. Tim Schmit aw hrimhrim. A album min pu tu, Don Henley hla Long Road Out Of Eden hi 9/11 thilcang le Iraq doh i a tho mi hla a si.
Moon shining down through the palms, ti in a hla cu a thok i, atu vawlei le USA chung nun duh a nun lo ning tehna aa chim. “Thlapa zong ah kan kai, maivan zong kan ser ko; nain Amerikan kan nunning kan izoh ah a si te kan si lo. Athiam cu kan thiam i kan lung a fim lo. Ram zaw chung i chuah khawh nak lam hi a sau ngaingai rih” tinak a si. Minit 10-sa a si. A hla bia ah hin Mandalay zong aa tel ve. Mah hla i lungretheihnak vialte a kan chawng tu ding ah tingtang lawng in I Dream There Was No War ti hla aa tum, aa dawh tuk. A tawi. Frail Grasp On The Big Picture hi Henley hla a si. "Amerikan i politics le bianak kan ruahning hi kan ruahpalh. Media nih sualpang le thilcang biapi lo lawngte an zaar; thil biapi tu an biapitter lo. Nunphung cu kan namhchuk” a ti. "It's about America's delusions when it comes to religion and politics. The media report horrible tragedies and ridiculous events side by side, giving them equal weight. It trivializes what's important. We're dumbing down the culture, and there's no reasoned debate anymore. You have to bury those who disagree with you." Business As Usual ti hla ah cun Henley nih kan vawlei hi minung khorcawh chung i tlak khawh nak "soul-sucking world" ah a chiah. Fanaule nih khua ruah setset a hau. Zei poh cang te kun ka zei poi hlah a ti mi an si lo ding ka duh e a ti. Do Something ti hlah hi ngaih a nuam taktak ve mi a si. Henley nih mah hla ah hin, “Zei poi lo hi a fawite. Pakhatkhat tuah a hau” a ti. Zawtlak a tong i lung a dong mi hna, mah hi ka sii cang vekvek zei poh cang cang ko seh ti a ruat mi hna ca ah, “Ngawi ko hlah. Tho law pakhatkhat tuah” ti nak hla a si. Lungtak ngaite in a sak. Busy Being Fabulous ti hla zong a um. Style na thoh nak le naa zumh nak ah inn rian zong na ruat ti lo, hawi/tlangval he ileengthleer na ah inn mi zong na kan ruat ti lo e tinak hla a si. A luan a ttha taktak. You Are Not Alone hi Frey i a fanute (ngaknu deng) thapeknak ca i a ti mi a si. A fanute cu a zoh ah a zaang a faak. Tuchan ngakchia mino tampi hi hramhkhiat lo i aa ruat mi le an pah ding an hmailei a ttih mi an tam rua ka ti e ti le tthut ciammam i bia ichimh nakin mahti i hla i sak hi a rem deuh ka ti e a ti. Eagles band hi 1971 hrawng i rak dirh mi a si. 1980 in kum 14 chung an itthen i 1994 kum ah an ifon tthan. Anmah nih cun, “For the record, we never broke up. We just took a 14-year vacation” an ti. An hlaphel hi phel 120 million an zuar cang, kum khat ah 1.5 million lengmang. Hotel California lawng hmanh kha phel 16 million an zuar. "Tangka zong a za tawk nan ngei cang, nan min zong a thang tuk cang ko i hla hi aziah nan phan le nan sak duh ti theng" tiah an hal hna i, “A kan noter deuh ve cuh” an ti. Don Henley hi kum 60, Glenn Frey hi kum 58, an ti cang i atu an album hi an thihthlak a si cang ko lai. ------- MSN nih stream khawh awk in an chiah i ngaih khawh an si. Eagles hla ttha dang: Tequila Sunrise An official website: http://www.eaglesband.com
|
