MY 2019 DIARY IN PHOTOS Mahti hin 2019 kum ka lut. Mona Lisa bantuk kan celebrity pakhat nih hmaan a ka thlakpi i Kumthar luh ka tha a nuam. (Nan phone kha aphei in zoh u law a ttha deuh lai.)
LBC (Yangon) Church Chairman le ICBC Church Chairman he bia kan iruah.
PAIH KA ZOH North America Paih Committee nih paih bual an ser i ka va zoh ve.
Ka tule an pattha.
Lai Phunpi Ni zong ka kal ve. RUAK KA VUI February 24: Kap Cung ruak
|
PUMH LENGMANG, PUMH LENGMANG Ka ngakchiat lio i a ball chuih le a pheitan ka rak uar tuk mi Pu Sui Luai he kan itong, ICBC ah.
KA PA THLAAN KA HMU Ka pa hi 2008 ah a thi. A thlaan ka hmu rih lo. A hmanthlak hmanh ka kua bal hna hlah, maw kannih chung! Ka tule USA in an tlung i mah nih cun hmanthlak hi an ka kuat. Orhlei i thlaan rop hi ka nau Tial Nawn 1973 i a thi mi kan tualkam i kan vui mi thlaan a si. A thlaan ah khin "So then death worketh in us, but life in you" tiah ka pu nih a ttial, 2 Korin 4:12 khi. Ka thlalangawng in vate nih luh a ka hauh tawn, thla hnih/thum chung. Bongte bantuk in ka ruah i mithi aho dah a ka leng hnga ka ti, Lai phung in. Mirang phung ah cun mah bantuk i va rat cu a chia mi a si. Asinain Pathian nih a kan humzual i kum kan chuak. Lai Ram an tlunkar ah an dawt mi phunkhat an pa ruak kan rak vui. A thlaan te lawng an zoh.
ZAN KHAT NUAMH March 30: Leng le vaal rual-u pawl nih party an ra ka tuahpi.
WEDDING KA KAL Ka chuah ni ah hmaan kaa thla. Ka hawi Duh Lian Mang le Hnianghniang wedding ah a si. An iduhka in a wedding a ka kawh cang. An hal lai zong a ka chimh. A ka kawh. An rian lai ni zong ah a ka kawh lengmang. Hlawptlote in ka kal, a dongh tiang. EKSEKSAI CU TUAH BAK HLAH Israel ram Kana khua i Bawi Zisuh i a rak dah mi zu hlei kha Rev. Hrang Cung Hnin nih a ka phorh. "Maw ka Bawipa thlumte, zu thaw dahmu na kan dah!" ka ti. Pasatorpa zong cu ka lawmh. Tukum ka pawpuar cu! Ka chanchung ah ka paw a puar bik a si lai. Thathut pawpuar, dawhceo pawpuar.
Saya Salai Pa Hmun (ka orhlei i) he kan ihmu, kum tampi hnu ah. RC 2 rak ti mi in kan kai aa khat. Anih le Saya Peng Thang cu Rangoon University ah saya a ron ttuan (kei cu ka sok duh lo). Hmanthlak i hi RASU alumni pawl kan si. Ka tu tete he kan tlon tawn nak tiva kam park.
KA U HE KAN IHMU Kawrlram in ka u No Al a ra kan tlawng i kan va don, Chicago ah. Kum 17 chung aa hmu ti lo mi kan si. Anih hi ka pa a lo, kei ka nu ka lo i kan mui aa lo lo, kan khuaruahning zong.
KA U KA TLONLEENPI Abraham Lincoln thlaan hmai a si. Mah dih hin a museum kan zoh. Mah dih cun a inn. Ngakchiapa te nih hin, Lincoln thlaan kan zoh lai kan ti ah cun, "Ka nu, na ttap ti lai lo" a ti (a nu cu Lai Ram an tlun lio i chungkhat thlaan an zoh ah ttap lengmang rua kaw). Taang cheu a kai cang. Kan tta-far le pu-tu rual kan itong. Sa kap ning law mah ka u nih hin nifar upa bik sa a co hnga.
Nashville Tennessee i Country Music Hall of Fame le Nasville khua kan vong tlawng ta. A nuam ngaingai.
SA KA THAH HNA U te ra tlawn i vok thah lo cu ka sia a rong herh sual lai tiah Lai phung in vok ka thah i zan ah kanmah tta-far le pu-tu rual kan inuam. Caan sung caan khat.
Illinois in ka tule, New York State in ka u fale an ra, an fale he an si i vok vok khat veve ka thah hna, Lai phung in (tukum cu vok ka that pah, keimah lo bang). Tukum hi nikum le kumhmasa he tahchunh ah ka titsa a ttha deuh (150 lbs hrawng ka si). Khuasik ti kik zong in kaa kholh kho rih. Ka mit zong a dam deuh cang. Si-in i appointment ka kal zong a tlawm deuh ngaingai. Ka ttehttuh tuk belte. Damlonak har ka ton mi bel a um. China Slim Tea khi zei hngalh lo in ka din i ka chung kal a ttha tuk. Asinain ka din lo tik ah ka zunpi ka zung kho ti lo. Dinpiak lengmang ah cun ka pum nih a leem ding a si. Din lo te i zunpi zun khawh nak ka kawl. Ka chung a ka tlik tawn mi ka din hna. Ka zung kho hlei lo. Sibawi ka ton. Zei chim awk a hngal set lo. Vansang in saulak ka um. Hnupi ah ka dam. A har taktak. Senna (pwe:gaing:) cu iralrin ding a si ti ka hngalh thar. Dam a sunlawining zong ka hngalh chap.
Chin Evangelical Baptist Church ah ka u ka pumhpi i pumh dih ah hmaan an kan thlakpi, upa tonharhar he. Sunhlawi ah kaa ruah.
Video ka uar mi.
CYO PUAI KA ZOH Saya Lian Hre he aa lo mi lawngte. :) (A fanu le a va an si.) CYONA Convention lio a si. CYONA Convention ah Meriam Lilly Sunday hi hman ngai mi a rak si. Kei zong CYONA Advisor ka rak si tawn. Atu cu local advisor ka si. Convention tu ah cun an ka hmang ti lo. Pu Kepling Khengmual, keimah, Rev. Dr. Thlaawr Bawihrin, ka u Al, Esther Van Hnem Sung, Rev. Dr. Shu Maung, Rev. Dr Van Thawng Lian, Pu Van Ceu Uk. CBCUSA zung rian ttuan ding ah Esther hi kan laak i rawl kan eipi lio a si. HNIANGHRAWM AH KA KAL Hniarlawn pawl sin Racoon Lakes ah a si. Hmaan kan ithla nain ka sin an phaan lo. Acung i hi mit a hlaang deuh lai, keimah hmanthlak nak cun, tiah ka taar.
CBCUSA BD MEETING KA KAI September 7&8: CBCUSA Board of Directors Meeting Dallas Texas, ECBC. Upa he kan hmanthlak ka sin an phaan lo. Krifabu chung ah sinak le rianvo ka ngei ti lo, tukum cu. Church Council ah kaa tel i a si ko.
Facebook ah mah nu hmanthlak hi ka hmuh i aa dawh tuk ai tiah kaa fim. Pangpar zong hi.
NASA SPACE CENTER KA KAL Houston TX i NASA Space Center khi kal ka sia a herh tuk tawn i tukum ah ka kal. Pu Phir Mawng te he kan si. Space zoh khawh nak telescope an um rua tiah ka rak ruah. Kaa ngaih bantuk nemmam a si lo.
PUMH LENGMANG A SI KO
THLAAN LUNG KAN PHUN November thla thawh ah kan phun. Wedding ka kal pah lengmang, ka zuam set lo nain.
Publication: Tukum hi cabia ka ttial setsai lo, e-mail cun ka ttial pah nain. Publication ti awk a tlak mi pa hnih te ka tuah. 1. Sunday School Hi. Robawm.com December poh ah CEBC ah oi khat lengmang kaa puum. Tutan zong hi ka mang ah Rev. Thawngling M. hi ka manh i ka va ipuum. Khua an hngal i hmaan an ka thlakpi tthan (midang zong an dir nain an kan lonh tuk i ka choih hna.) KAA LUNGSI MI Tukum chung ka thil tuah mi lak i kaa lungsi bik mi cu: ka rak thongh sual mi pa tangka ka kuat khawh ah a si. Tlanval kan ihrawhka ah thintawi in ka rak thongh cu a si i, a mit ah aa tongsual i, zankhuadoi a ttam, ka mit a kek rua ti i a thinphaan si, a thinhon si, a lungfah a si. Keimah ka si tiah bia ka thlah i, keimah ka si a theih lecangka a ka ngaihthiam colh. Asinain keimah tu ka ngaihchiat a dam bal lo. Atu ah anih cu ruhseh zawtnak (gout) nih a tlunh i a cawlcang kho setsai ti lo an ti. Facang tun khat cawk nak men te khi ka kuat mi cu a si. A si ko hmanh ah kaa lungsak cang. DAWTMI CHUAH LAWMH Ka tu Kap Hnin Thang kum 10 a tling. Vawleicung X'mas tree sang bik tang ah kan vahpi.
NGAIHCHIAT KA TONG HOI December 21 Hakha ah ka u nupi a thi i X'mas lai ah mitthli he kan um.
KA TULE HE McDonald kan ei. Khua dang ah Krismas hmang ding ka si i, mah cu kan Krismas rawl-hrawm ah a cang.
WASHINGTON DC AH X'MAS KA HMANG
Hawikom le dawtu sin X'mas hman a nuam. Pu Van Thawng Cung le Pu Lal Bat he.
NGAKNU KA LENG Awttha Van Hlei Sung hlasak vuai khim in ka ngai. Ngaknu love song sakter i tingtang tumh tehna kha cu a um ti bal lai lo ti ka ruah cang mi a si i a um tthan, ka khuaruah a har (atu hi nohsung a si cang lai dah).
NEW YORK AH KA TLONG. United Nations zungpi hmai tualpaar.
New York hi 1999 kum dongh ah khan ka rak kal. Kum 20 bak a rauh ah atu ka kal tthan hi a si. Kumhmasa ah khan kal kaa tim i kan kal laite ah ka tu (pa Siang) a thi i ka ttuul. Atu kaa timh ah ka u Dawt a thi hoi. Ka kal chih. Acung i hmanthlak hi Empire State Building dot 86-nak a si. Hmasa ka kal lio ah World Trade Center ah ka rak kai nain mah inn sang hi ka rak kai lo. Atu ka kai. Empire State Building kai le Time Square vah hi New York phanh a si. World Trade Center thar cu ka kai lo (a sang tuk i a cung ka kai ngam lo, tangka lam a heu hnga).
LAI BAPTIST CHURCH AH Kumdongh zarhpi cu Washington DC i Lai Baptist Church ah kaa pum. Ahlan i Pyidawtha pawl le Priscilla pa he hman kan ithla. Hlanlio Pyidawtha mi kan ttiau dih i kan ihmuh ah ka lung a leng.
Thluachuah thar he kum thar ah kan lut lai.
|