MY 2020 HIGHLIGHTS
Kumthar Ni
Mahti hin 2020 kum thar ka lut, chong le chong lo in. Kumthar ni pumh ah suit te zong ihruk lo in, angki laap khat he ka vaak aisawh, tangkhawng ah. Khuasik tikik in kaa kholh kho rih ko.
[Nan phone kha aphei in zoh u.]
CYO Caan Serh
January 5: CYO Indiana nih Advisor na kan ttuanpiak i kan ilawm te tiah roca an ka pek. Caan le zanriah an kan serh. Kaa lawm ngaite. Central CYONA ah advisor cu term hnih ka rak si bal. Ka term a dongh ah zei recognition um hlah, 'thank you" te hmanh um hlah. CYO Indiana cu khua an hngal.
Tukum cu Lai Phunpi Ni zong ah chuak hlah, paih zong zoh hlah, hnianghrawm zong kal hlah ing, ka um ko, chizawh tuum bang in.
Pulpit Ka Kai
ICBC minung 3,000 chung i caan tin a har bu in pulpit caan oi hnih ka ting. Phung cu ka chim lo, tukum cu.
January. Mah ni cu Venus Par Tin Mawi he hmaan kan ithla. Kan ttial bak lo mei u? :) Mah suit hi keimah lungduh bakte a si. Plain suit lawngte ihruk a si i a ttial mi hrimhrim ka duh cang. Mah lio ah cun ka tunu nih a ka phorh. Kaa teet nawn na'n "tuchan" a si e an ka ti. Ka necktie khi X'mas laksawng ka hmuh mi.
July. Kei cu Malakhi zumtu si hlah ing kaw Luka 12:33-35 ka rel i thla zong hawi cam tawn lo in ka cam, Bawi Zisuh bia ning in. Ka suit hi navy blue a si.
Ruak Vui
Mah Tha (Par Hluan Tial nu) a u fa (a lung a hmaan deuh lo mi) nih thinchuakhruak ah thir tleng in a tuk i, si-in i ni 10 a um hnu ah a thi, Feb 13 ah. A ruak kan vui. A nu le ka nu cousin an si.
Texas Ah Ka Kal
February. Ka tupa nih nupi hal a ka fial i vanlawng in Amarillo ah ka kal. Thlaan ka zoh pah.
Dallas ah ka kal. CBCUSA Board of Directors metting a um i mah cu ka kai. Chin Evangelical Baptist Church ah a si. Rev. Tial Lian necktie sen aa khih lo tan a si. :)
CBCUSA hi kan miphun i kan ngeih mi institution sang bik pa khat a si. A tawlrel tu bik cu BD hi a si.
Metting dih in ka caam fual i Mie Baptist Church ah kaa puum. An biakin cawk thar i an ipumh hmasat bik zarh a si. Mie sin ah cun mising bantuk ka si. Mie nakin Zophei nih an ka komhngamh deuh.
Ka tu Zing Hniang nih ttha tuk in a ka zohkhenh. Kedan thar anak mi ka duh lio te ah a ka cawkpiak (Banana brand). March 2 ah ka tlung. Hmaan kan ithlak nak hi Reunion Tower a si.
Mawttaw dir lio ka pah
Inn pawng te ah lam kam ah mawttaw an toh i henta ka pah ko! Lam lei ah a fong zong a si lo. Ka orhlei mit si kaa chunhka a si i, orhlei kam te in chunh si kaw, ka hmu deuh lo a si rua (maw keimah daithlan dek). Ka mawttaw calki a kuai dih. Kum 13 chung zei tong lo te in mawttaw ka mong i atu cu record ka ngei ai.
Lock down
March 10 in Covid-19 lockdown a si, inn erh. Facebook ah ca ka taar pah. Ka cataar an lanhtak lo nakhnga, hmanthlak ka taar chih lengmang. Mui dawhdawh ka taar hna; mi taar cia zong.
Biaknak Lawngte Ka Ruat
Inn erh aa thok in aziah dek a sii hnga, biaknak kong lawngte ka ruat. Biaknak phunphun ka dothlat hna i, ka ruah mi cu: (1) Biaknak hi lai ruahnak (superstition) fai deuh ceo a si; (2) Biaknak hi rak um hlah seh law, asiloah, khua zumh hi rak um hlah seh law, hna a thiang tuk hnga; (3) Biaknak hi rak um hlah seh law minung hi kan nun a sual tuk hnga, ti tehna.
ICBC Mino Cawnpiaknak
April le May: Lockdown chung ah Zoom video in zarh tlawmpal chung cawnpiaknak an tuah i chimh an ka fial. Lai Nunphung ka chimh hna.
Kaa Puum
Lockdown chung cu biakin pumh khar a si; nain kaa puum lengmang ko. Rianngei le keimah lawng kan si tawn.
Ipumh man ah hmanthlak ka ngei kho. Tukum cu hmanthlak ngeih a har. Facebook a tthing.
Hlasa pawl he kan si. Coronavirus nih thla thum chung a kan uam i kan hmin hrulh.
Wedding Kal A Um Lo
Tukum cu aa um hnihkhat hmanh mah paraivet in ium a si i wedding kal a um lo. Chuah-langh a um lo tuk i style te i hmaan ithlak le taar zong um hlah, Kanmah hi a style pawl kan si. :)
June: Hlaphel chuah nak video clip an ithla hnek i, an ka sawm ve i, daithlang in va kal nalak ah an rak style dih i ka dir ngam menmen. Ka ttaw bak!
Ka Cauk Rel Mi
Cauk chia taktak ka rel. Ka rel duh tuk phun a si i lungpek tuk in ka rel. Krifa zumhnak a hrawk ngaingai kho ding a si ca ah a cauk min zong, a ttial tu min zong, aho hmanh ka chim hna lai lo ka ti. Midang nih cun arel i rel lo ding. Keimah zong cu ralringte in ka rel. Asinain zumhnak hrawk phun (conspiracy) cu tam pah ka rel cang i ka lung an ka tei ruk lem lo, lungngan man. Mah cauk nih cun ka khuacuanh a kauhter deuh ngaingai (ka zumh tuk lo bu ah).
Ruak 4 Humh
1. Par Hluan Tial nu
2. Pu Than Kio
3. Pu Kep Ling
4. Pi Tial Tlem (Rev. Za Bik nupi)
Ka ni Ral Uk nu (ka pa first cousin) August thla ah a thi. Ka pale generation ah pakhat lawng a taang cang.
Ka hmanthlak Hlun Ka Hmuh
1999 kum Krismas Washington DC ah ka va hmang (Illinois in). Mah hmanthlak cu Sailo nu nih a ken i a ka kuat. Kaa lawm ngaite.
Ka Ngandamnak
Tukum hi si-in ka kal set lo. February 14 ah ka mit ah thi tam a lut. Thla hnih ah a thiang. Adang cu keimah keel ka si ko rua. Ka khing 150 lbs fai a si. Kum cheu tiang ka bombaan a um ngaite. Mah hnu cun a zor.Ka paw bel ka zorter kho lo. Kaa umpi er-or ko. :)
DC Kal
Washington D.C. i Lai Baptist Church nih an ngakchia Lai linguistics chimh ah an ka ruaih i ka kal, July 21-25. Bu hme an si nain an itimhning a ttha i ngakchia 42 an chuak. Puulrai ralrin bu in nuamte in kan tuah.
Ka Facebook Ka Thah
Ka Robawm
Robawm.com page acheu hi 8.2 million hits ringlo an ngei. Laimi hi website an rak zoh ngai ko.
Tar hmanthlak ka taar a tam i tar zong ah an ka rel lai tiah ngaknu ttha hmanthlak ka taar, July ah.
Ka Hla Ngaih Lungtaang Bik Pakhat
Video Ka Uar Mi
Mah video series hi nihchuak ah ka zoh tawn. (Zeiti i an thih poh ah laam thluahmah a si, an luat lo.)
Hmanthlak Ka Duh Mi
Grace Suiuk Facebook i ka hmuh mi a si. Kan khuaram le leng no iang.
Ka Baibal Caang
Facebook ah a play ning an ka chimh i Baibal caang zuh ka tuah i, Joshua 1:5 nih a ka chuah. Tha a ka pek ngaite. Kumthar lio i an ka zuhpiak mi ka hngal ti lo i mah hi kaa rinh.
Publication:
Tukum cu Covid-19 puulrai ruang i inn erh cu si kaw ca ka ttial deuh. E-mail ka ttial mi cu a tam. ICBC Group ah zarh khat oi khat hmaante in e-mail ka thlah. Ka cattial minhngal deuhdeuh:
1. Khuazei Dah Na Si; Muko mekazine 2020 March
2. Zumh Lo Ding: Muko mekazin, 2020 June
3. Rangoon Sianghleirun Kai Cu: Chokhlei mekazin, Yangon University
4. Saya Thawng Nawn Bia: Mie mekazin
5. Nupi Hal Ning: Robawm.com
6. Holh Dang A Um Maw: Robawm.com
7. Zu Phunphun Kong: Rungcin Yahoo Group
8. Pastorte Baibal Rel Forhnak: CBCUSA
9. Kir Ti Lo Ding: ICBC
10. Malakhi Zumtu le Macedonia Zumtu: CBCUSA
11. Baibal Hi Aa Kalh Maw, Kalh Lo: CBCUSA
12. A Ruah Ko video: Youtube
13. Ka Thlarau Ca'h A Tha video: Youtube
14. A Minung In Zoh Ding: Facebook (Muko nih an hnon i)
15. Muko Kong Ah (Muko mekazin, December chuak)
16. Kan Ram Nih A Kan Kil, Kan Kil Ve A Hau (Hakha University Magazine)
Rian Thar Ka Tlai 
Chin Baptist Churches USA ah Office Secretary rian ka tlai. September 1 in ka domh. Major change pa khat a si. Tuan deuh lio pi ah siangin ah rian an ka pek. Ka ttuan lo. Sushi rian tu ka ttuan. Mah hnu ah holh leh rian tehna ka ttuan. 2017 ah khan Chin Center Co-ordinator rian an ka pek. Ka ttuan lo. Freelance Translator ka ttuan. Tukum ah mah Office Secretary rian hi a lawng i ka sok mi a si.
Ka Keng A Bo Hoi
Ka huahcham ah hnaibo (abcess) a um hoi. Kanhnulei kum 12 hrawng ah ka pai ah a rak um cang. Hnai a pawi, a tthang (apel hmanh a faak lo). Mi ka fial hna i belet in zuak tiah an ah i a hnai an chuah dih. Ahnu kum 5 ah a um tthan. Kan ah i a dam. Aa ser tthan i hlai hau in a um. Sibawi ka chimh hna ah mah bantuk kha cu lai hlai in hlai a si ko e an ka ti men. A keh deng hnu ah kan dih. [Hmanthlak hi ka hnenghter mi a si lo, keimah ka tawi hrimhrim bia a si.]
Ka hmai a ngo pah ko rua ka ti, ka keng sin ah cun chife pei a lawh hi!
September 2, 2020
Yahoo Groups An Dong
1999 kum in tukum tiang kum 20 chung Yahoo Groups maivan biaruahnak kan hmang i, bia zaza kan iruah. Thawng kan ithanh. A rak nuam ngaingai. Keimah zong Rungcin Group ka ngei. Group dang tam nawn zong ah moderator ka si. Mah Yahoo Groups cu 2020 December 15 ah an donghter hna. Kan bia le hla vialte an lo dih. Ngaih a chia pah.
Tukum cu inn erh rumro a si i hmanthlak taar awk ngeih a har ka ti na'n ka ngei pah ai lak.
Krismas Ka Hmang
Tukum cu Covid-19 nih mibu cawlcangh dawn dih kaw, ka um nak krifabu (ICBC) ah pumh aa tuah lo (December chung). Chin Evangelical Baptist Church ah cun an tuah. Mahka ah cun ka va ipum. Krismas zong mahka ah cun ka hmang. (Leng no pawl hi cu keimah he an ipehtlai lo. Duh te an nung ai tiah ka taar hna.)
Krismas ca'h blazer kaa cawk nain zinglei in khua a kik tuk (15°F + thli a si) i angki fual tu kaa cuh tthan. Waist coat hmanh kaa danh leh (aa fashion lo taktak). Bullet proof aa hruk tiah ka ruat u. :)
Tukum hi January in December tiang Venus Par Tin Mawi he hmaan kan ithla.
Kum ka chuak, Hallelujah!
Tukum cu puulpi tlung kaw USA lawng hmanh ah 340,000 ringlo an thi. Nun le dam a sunglawi khun.
Mahti hin 2021 kum ka lut lai.