|
Rungcin Zingbiak
2008 Zohrawh 2
Aziah dah Pathian hi kan biak lengmang? Kan biak lo zong ah Pathian cu a zei a ti ttung lo. Kan biak zong ah anih ca ah zei aa chap ttung lo. Pathian cu a tlin cia ko cuta.
Kanmah kan tlin lo ruang ah Pathian kan biak hi a si, kanmah i kan herh ruang ah. Kan tluk hnu khan Pathian sin in kan itthen. Pathian kan biak nih hin Pathian he a kan naihter. Pathian kan biak tik ah hin, hmunsang cung i Pathian thlakung a zual mi vanmi le mithiang bantuk ah kan irel. Hi vawlei hin kan hei itthen chung i van nun kan von tep ta. Civui tehna bantuk krifa puai kan tuah khi nuamhnak sawhsawh kan tuah a si lo; vancung nuamh bantuk hi-vawleicung ah kan hei tuah ve khi a si.
Cuca ah, u le nau hna Pathian biak hi ngol hlah usi. Atu zong nanmah le nan umnak hmun cio in Pathian thlarau rak ko-au u law rak ihawikom u. Pathian cu nan tthuthmun cio khan rak bia u, rak chawn u.
Atu tan Rungcin Zingbiak ah hin, hla fung 4, phungchim tawi pa khat, phungchim sau pa khat le ttukmattak an um lai. Hla hi miphun dang hla an si ngawt i Lai holh in an sullam kan chim pah. Atu tan a phungchim kan ngaih ding mi cu Evan. Billy Graham a si. 1963 i Los Angeles i mipuum 90000 sin i a rak chim mi a si. Mirang holh a hliah lo mi ca ah ca phungchim a um. Iredi cia u. Atu cu, hla ngaih pah in, Baibal caang von rel ta usi.
Salm 103:1-5
Maw ka nunnak, Bawipa cu thangtthat tuah! Ka sining vialte, a min thiang cu thangtthat tuah u! Maw ka nunnak, Bawipa cu thangtthat law zeitluk in dah zaangfahnak a ngeih kha philh hlah. Ka sualnak vialte kha a ka ngaihthiam i ka zawtnak vialte kha a ka damter; thlan chungin a ka khamh i dawtnak le zaangfahnak he thluachuah a ka pek; ka nunnak cu thil ttha in a khahter i cucaah ka no peng i mupi bantukin ka tthawng.
Salm 30
Nannih a mithiang hna, Bawipa cu thangtthat u; a thiangmi Pathian nih a tuahmi kha philh hlah u law amah cu lawm u. A thinhun cu caan tawite chung lawng a si; a tthatnak tu nih cun chantlung a nguh. Zan ah mitthli tlak nak um hmanh seh law zinglei ah cun lawmhnak a ra tthan ve.
Him tein ka um kha ka hngalh i 'Aho hmanh nih an ka tei bal lai lo' ka ti. Bawipa, ka cungah na ttha ko; tlang cungah a ummi ralhruang a him bantukin him tein na ka umter. Sihmanhsehlaw na ka thuhtak tikah ttihnak in ka khat.
Bawipa, nangmah cu kan auh, a bawm ko sawh, tiah ka'n nawl. Ka thihnak cun zei tthatnak dah a chuak lai? Thlan i ka va kalnak cun zei miaknak dah a chuak lai? Mithi nih an in thangtthat khawh maw? A dong lomi na tthatnak cu an chim khawh maw?
Ka ngaihchiatnak cu lunglawmh lamnak ah na ka thlenpiak cang, ka mithi ngaihnak puan cu na ka lakpiak i lunglawmhnak puan na ka pek. Cucaah dai tein ka um lai lo; nangmah cu kan thang?hat ko lai. Bawipa, nangmah cu ka Pathian na si, a zungzal in kan thangtthat lai.
Ezekiel 36:25-27
Nan cungah ti thiang kan theh hna lai i nannih a'n thurhnawmter tu thil vialte khan kan thianh hna lai; nan siasal biak nak thurhnawmnak vialte khan ka'n thianh dih hna lai. Lungthin thar ka'n pek hna lai i thlarau thar nan chungah ka khumh lai. Nan pum chungin lung bantuk i a hakmi nan lung kha ka lak lai i titsa bantuki a nemmi lung kha ka'n pek hna lai. Ka thlarau cu nan chungah ka khumh lai i ka nawlbia he aa tlak in kan umter hna lai i ka phunglam zulh in nan nung lai... a ti.
Salm 139:23
Maw Pathian, ka pur cikcek law ka lungthin hi hngal ko; ka hneksak law ka ruahnak hi hmu ko. Ka chungah hlenthawinak a um sual hnga maw? A um sual ahcun ka hmuhpiak law zungzal hmunmi lam ah khan ka hruai ko.
|
NAN HERH AMAH AH CHIA U
1 Piter 5:7Amah nih a’n zohkhenh hna caah nan lungretheih vialte cu amah cungah chia dih ko u.
Lamkal Piter nih mah Baibal caang hi AD 63-64 hrawng i a teem taktak mi krifabu hna sin i a ttial mi a si. Faaklakte i a teem-ing mi cu Judah mi a si ttung i krifa i a cang mi ko an si. An hrem hna, can lo an canh hna. Zei an sual ruang ah a si lo. Toidor le dinfel an itlaih i an zumhnak an nunpi ruang ah a si. Mah lio ah cun Piter nih heh tiah thazang a pek hna i, tlaang nun cio i nung lo ding in le Kri lawhnak lungput langhter hi a forh hna. Lungretheih awk thil tampi an ton ko zong ah, Piter nih cun, nan ttihphaannak cu Amah cung ah chuang u law, anih nih cun a hnakkar ah a’n tenh hna e tiah a ti lengmang hna.
A dihlak in maw? Tukvelh, thongthlak le thah tiang hmanh a ing cuahmah mi nih lungretheih lo in an um kho lai ti cu Piter zong nih a ruat tuk ve lo. Asina’n, um u law a ti hna cu a si. Greek text i aa ttial ning hawihna ah cun, Piter i a forh hna mi hi, an lungretheih vialte pakhat hnu pakhat Pathian chanh lawng hmanh a si lo; an hmailei thil poh Pathian ah “a ngalh” hrimhrim in kan ngalh lai tiah itiam hna seh law, a ra lai mi thil kong ah an lungre thei ti hna hlah seh ti a duh. Amplified Bible hawihna nih cun tthawng deuh in a chim i: “Na herh mi dihlak—na ttihphaanmi vialte, na lungretheih vialte, na hnasaan vialte—a dihlak in voi khat ngalh ah amah cung ah ngal; nangmah cu [Pathian nih] siaherh taktak in a’n ruah i, mit-tthep lo in a lunghrap ah a’n sanh” a ti.
David zong nih Salm 55:22 ah mah bantuk cun thazang pek nak a chim ve. “Na thilrit cu Bawipa ah tthum, law amah nih a’n zohkhenh lai. Anih nih cun miding thlaphaan lai a siang lo” a ti. [Atu hla i a sak mi zong hi a si.]
Hnulei caan i lungfahnak le lungrawhnak tehna nih dawtu Pathian na zumhthlep nak a donhkhanh ah cun, vancung na Pa cu a sining taktakte hngalh izuam. Baibal bia hlathlai nak asilo ah, krifa lei i cawnpiak mi counseling tehna zong kai—midang aho nak hmanh i a’n daw deuh tu na hngalh in a zumh na thiam khawh nakhnga. Zumh lo ruang i thinphaan na ton sual lo nakhnga ikilveng.
Hiti hin thla cam:
Bawipa, zumh na tlak nak ka hngalh khawh chin nakhnga le kaa hngatchan khawh nakhnga ka bawm. Zeitik hmanh i na ka kaltak lai lo nak le, ka herhbau vialte na tlinter lai nak hi ka philh sual lo nakhnga ka theih tthan ter lengmang. Mah cun, ka hmailei caan vialte le cu caan i a ngeih lai mi zeizong vialte na kut chung ah himte in ka chiah khawh lai.
By Ann Shorb
http://www.ccesonline.com/dev/castyourcaresonhim.htm
|
Zisuh Ngeih Ka Duh Deuh
Zisuh ngeih ka duh deuh, sui le ngun nakin,
Amah ta si ka duh, zeizong te ngeih nakin;
Zisuh ngeih ka duh deuh inn le lo nakin,
An khenh nak a kut i hruai tu ka duh deuh.
Ram kaupi ah siangpahrang si hmanh ning,
Sual nawl zul ka si ah cun,
Zisuh ngeih ka duh deuh, zeidang nakin,
Vawleipi nak zong hin.
Zisuh ngeih ka duh deuh, thangtthat co nakin,
Amah ca zumhtlak i nun ka duh deuh;
Zisuh ngeih ka duh deuh minthan nak zong in,
A min thiang ca i mi dik si ka duh.
Dimttial par dawh bik nakin aa dawh deuh,
Lungkua chung khuaihliti nak zong in a thlum deuh;
Ka thlarau rawlttam ca’h rawl ttha bik a si,
Zisuh ngeih ka duh deuh, a ka hruai tu ah.
Sermon 1:
"Tuu Tlau"
Billy Graham (1963)
Sermon 2:
|
Zeitin Dah Naa Ruah?
Ceu Hlun
Johan 8:33, 39 Annih nih, “Kannih cu Abraham tefa kan si i aho sal hmanh kan si bal lo...” tiah an ti. Jesuh nih cun, “Abraham tefa nan si taktak ahcun, amah tuahmi pei nan tuah ve hnga cu...tiah a leh hna.
Minung cu kan iruah (identify) ning hi kan si. Mifel ka si ti i aa ruat mi cu felte’n an nung i mifel an si. Mimenlo ka si ti i aa ruat mi zong mimenlo zuam in an izuam i an menlo taktak. Milawdor ka si ti i aa ruat mi cu lawdorh ah an iza i milawdor an si taktak ko. Midawh ka si ti i aa ruat mi zong dawhte’n an um i an idawh taktak. Zuding-lo ka si ti i aa ruat mi cu zu din inautat in an ding lo i zuding-lo an si taktak ko. Pathian fa ka si ti i aa ruat mi zong an si taktak ko lai.
Minung hi forh a nuam lo te kan um lo. ‘Anih cu mi-ttha a si’ an von kan ti kan theih te hmanh ah tthat kan chuah lawlaw. ‘Anih cu mithinsau a si’ an ka ti ah cun kan thin kan isum deuh i kan thin a sau deuh taktak ko. ‘Anih cu mi-ttihnung a si’ an kan ti zong ah ttihnung nawn i iumter kan hmang deuh ko. Kanmah le kanmah kan iruah (identify) ning nih si seh, mi i an kan ruah ning (kan theih ning) nih si seh a kan siter deuh taktak ko.
Miphun kong zong ah cikawr le tivun lawng nih phun a dang lo; iruahning le lungput nih a rel. “Ka nu cu Lai, ka pa cu Lai, kei cu Kawl” a ti mi hna zong Kawl ka si ti i an iruah ah cun Kawl holh in an holh, Kawl nun in an nung i Lai an sinak a lo i Kawl an si ko. Vun hlaam India mi zong Lai Ram ah khua an sa i Lai ah an ichia i midang zong nih Lai ah kan chiah ko hna; i Lai an si taktak ko. Hualngo pa zong Falam i aa chiah ah cun Falam holh lawngte i a holh le Falam um i aum ah cun anmah lei mi zong nih anmah lei mi ah an rel ti lo, Falam ah an chiah lawlaw i Falam ah a cang ko. Thantlang i a chuak i a tthang mi pa zong na pale thawhkehnak cu Bawipa tlang lei dahkaw a si e, nang zong e an ti lengmang ah cun Bawipa tlang lei mi ah aa chia i mahka lei holh cun a holh, mahka lei mi he aa kom i, Thantlang a hawile cia zong nih an kom ngam ti lo i Bawipa tlang lei minung a si lawlaw ko.  Nu-khat pa-khat unau hmanh an i-identify ning aa dan ah cun khuaram dang mi ah an cang ko. Biana ah, unau pahnih hna cu, Halkha ah an chuak, Halkha ah an tthang. An pa cu Thantlang peng mi a si ca ah, mi nih Thantlang nan si e tiah an tuuk hna. Pakhat lung a zuang i Thantlang ah aa rel, aa chia. Thantlang holh in a holh, Thantlang um in a um. Pakhat cu a lung a zuang lo i Halkha holh in a holh, Halkha ah aa chia. An sinak taktak ah khuazei set zong an si lo nain, anmah le anmah an identify ning aa dan ca ah an khua zong aa dang ah a cang. Mah tluk cun mah le mah iruah ning nih hin kan sinak hi a thlen khawh.
Sinak pakhat hi kan i-identify nak lo ah cun kan sinak taktak kho deuh lai lo. Miphun tling lak i khua kan sak tik zong ah, kei cu Laimi ka si ti i kan i-identify lo ah cun miphun dang nih sining kan la chin lai i anmah phun ah kan icang ko lai. . Laimi ka si ti i kan iruah zungzal lawnglawng ah Laimi lungput le ziaza in kan nung lai i mah nih cun Laimi a kan siter lai.
Krifami zong 'kei cu Pathian fa ka si' ti i ka iruah taktak lo ah cun krifa-lo bantuk i um ve sual a fawite. ‘Kei cu krifa ka si’ ti ngam hi a biapi ngaingai. Mah cu kan Bawipa i a duh tuk mi le a uar tuk mi a si. Zisuh nih, “Mi hmai i a ka ttanh mi cu vancung ka Pa hmai ah ka ttanh ve hna lai” a ti. Rian ttuan nak ah, siangin kai nakah, party tuah nak zong ah, hmurka hrimhrim in si seh, umtu hoiher in si seh, “krifa ka si” ti a langhter lengamang ding kan si. Mahti i iti (i-identify) cu hmual a ngei. Pathian fa ka si ti i kan iruah i kan thanh cang ah cun Pathian fale nun in kan nung lai i Pathian fale kan si taktak ko lai. Vancung ro co tu ding cu roco ding in iruah le itimh ding a si.
|
Pathian hi thlacam zong in, hlasak zong in, biachim le biangaih zong in biak a si i thilpek zong in biak a si. Atu zong Pathian sin i aa lawm nan um ah cun, atu te hin Pathian hi zei dah ka pek ve khawh lai ti rak iruat cia u. Pathian sin i thil kan pek mi hi alak ah a kal lo; Pathian fale dang sin ah thluachuah ah a va cang zungzal. Mi mithmai i ni a tlaanter tu, mi lungthin i lawmhnak a phor tu, Pathian thluachuah a langhter tu an si i, na thilpek thawng hin mi nih Zisuh an ngeih phah e ti in Lalbiaksanga zong nih hla in a kan ti.
Ramlak i a khomi lili pangpar khi zoh tuah hna ngat u: rian an ttuan lo, hnipuan zong zeihmanh an i tah lo. 29Sihmanhsehlaw hihi kan chimh hna: Siangpahrang Solomon hmanh kha, kha tluk khan a rum ko nain hi pangpar hna lak i pakhat tluk hmanh hin aa dawhmi hnipuan a ngei lo.30Ramlak ramkung, nihin ah a hring i thaizing ah meichung i an paihmi ramkung hna, a thuamhtu cu Pathian a si. Nannih chinchin cu thuamh loin a'n um hna hnga maw? --Mathai 6:28-30
Pathian nih thlua kan chuah ko seh.
Cinte Rungcin
|
