Bawipa nih a
tthawngmi le a liannganmi ah a ka ser,
amah cu a ka khamhtu kha a si.
Amah cu ka Pathian a si i ka
thangtthat lai,
ka pupa hna Pathian a si i
a lianhngannak cu hla in ka sak lai.
Exodus 15:2
Zei ruang bik ah dah Pathian hi na biak? Sualpalh
iphuhrun ruang ah maw, rian i ruah ruang ah maw, pawngkam hmaizah ah
maw, thluachuah hmuh duh ah maw, zei ruang ah? Cathiang nih cun, ilawmh ruang i Pathian a
bia mi kan si awk a si nak a kan chimh. Pathian biak nak hmun ah hin aho poh
lawmhnak he kan kal kho, aziah tiah Pathian thluachuah a co mi lawngte kan si.
Izarel mi mahtluk i Pathian i a chanhchuah hna le a
humzual hna bu i Pathian sin ilawmh an philh lemgmang khawh kha cu
khuaruahhar bak a si ve. Exodus ah khin Pathian nih Izarel mi vial zuah in
Izip mi vial a thah dih hna nak a um. A mi hna cu sal in a chuah hna
i, mah na cun ilawmh lo in an phun an zai, sal i kir hmanh an tamh rih. Kamh
mi ram ah a luh hna i amah biak lo in siasal an bia hoi. Ilawmh awk tampi an
hmutong ko nain, ilawmh cu an hnahnilh duak i zai le rol in an chang.
Kannih zong kan sin i Pathian veel mahtluk a thuk le a
san bu ah aa lawm mi maw kan si, a tlokciar mi dah ti hi ihliah kan hau ve.
Pathian i kan ca i a tuah mi vialte ruah cikcek hnu ah a tlokciar lengmang
ding maw kan si, aa lawm zungzal ding dah ti hi ruat ta usi.
Atu cu Bawipa kha kan naih ah a um caah
amah leiah cun i mer u law amah sinah cun thla cam u.
Isaiah 55:6
Atu tan Rungcin Zingbiak ah hin, voidang i bang, bia le
hla le zuk kan ihrawm hna lai. Hla nan ngaih pah in a ca tete hi rel ding an
si lai. Nan rel dih tiang i hla a dongh rih lo ah cun thla cam chung khawh,
nan carel mi sullam tehna ruah chung khawh zong a si. Atutan hla hi
nai hrawng ka ngaih bik le ka thinlung i a caam mi deuhdeuh an si, rak ka
ngaihpi ve u tiah. Phungchim hi
Mirang holh in a si i a hliah lo mi ca ah phungchim (tiawk) tawite a um ve.
Atu cu hla fung khat (a zumte hi click ding):
Duet
Krifami nih hin Zisuh dawtnak kong chim le
a thangtthat hla sak tluk i a nuam mi hi a
um lo e an ti.
Atu i hi, Zisuh dawtnak kong chim lawng hi ka lung a lawmhter tu a si
ti hla ZBC 415 khi a si.
Robert Duval le Emmylou Harris an si, khua
tthat lio minung veve.
Robert Duval hi actor zong a si na'n Pathian hla te a sak ve hi a si.
Emmylou tehna tu cu Country songs ah cun "nule" ti awk khi an si.
Jeremiah 32:17
Maw Bawipa
Pathian, Na
tthawnnak a nganmi le samhmi na ban in van le vawlei hi na ser hna;
nangmah caah a si kho lomi thil zeihmanh a um lo.
1 Chanrelnak
10 A
min thiang cu sunparnak ah hmang u, Bawipa a kawlmi hna lung kha i
lawm hna seh! Bawipa le a tthawnnak kha kawl
tuah u, A hmai kha kawl lengmang tuah u! A
tuahmi khuaruahhar rian le khuaruahharnak a tuahmi hna le Biakhiahnak a
chimmi hna cu philh hlah u.
2 Korin 1
3 Kan Bawipa Jesuh
Khrih i a Pa le a Pathian, zaangfahnak in a khatmi kan Pa, zeizong
vialte ah a kan bawmtu Pathian cu lawm usih! 4Harnak kan innak kip ah a
kan hnemh caah kannih zong nih harnak a phunphun in a ingmi kha kan
hnemh khawh ve hna i kan hnemh hnanak ah cun Pathian sinin hnemhnak kan
hmuhmi kha kan hman. 5Khrih nih a inmi temhinnak tampi cu kannih zong
kan i hrawm ve bantukin Khrih hnangamnak zong cu kan i hrawm ve.
6 Temhnak kan in ahcun nanmah hnangamnak le khamhnak caah a si; cun
hnangamnak kan hmuh ahcun nannih zong nih nan hmuh ve i kan inmi temhnak
kha lungsau in nan in khawh ve nakhnga thazang pek nan si. 7Cucaah nan
cung i ruahchannak kan ngeihmi cu zeitikhmanh ah aa hnin bal lo. Temhnak
kan inmi nan kan inpi bantukte khan hnangamnak kan hmuhmi cu annih zong
nih nan hmuh ve.
8 U le nau hna, Asia peng chung i harnak kan tonmi kha hngalhter tthan
kan in duh hna. Kan cung i an kan khinhmi thil kha rak rit tuk, rak ngan
tuk kaw, nun lai hmanh kan i ruah lo. 9Kannih cu thi dingin biakhiah kan
si ko cang tiin kan i ruah. Asinain hi ti thil a rak um cu kanmah le
kanmah kha i bochan loin, mithi a thawhtertu Pathian kha kan i bochan
deuhnak hnga caah a rak si. 10Cu tlukin ttih a nungmi thihnak chungin a
kan khamh i hmailei zongah a kan khamh ko lai. 11Nannih nih nan
thlacamnak in nan kan bawmh caah, a kan khamh ṭhan ko lai ti zong kha
kan i ruahchan. Cucaah cun kan ca i thla tampi nan cammi cu Pathian nih
an leh hna lai i thluachuahnak a kan pek lai; cun kanmah ruangah mi
tampi nih Pathian cu lawmhnak in an thangtthat lai.
Rom 8
35 Aho nih dah
Khrih dawtnak he cun a kan tthen khawh lai? Harnak nih maw, temhinnak nih
maw, hremnak nih maw, rawlttamnak nih maw, pamnak nih maw thil ttihnung
nih maw, thihnak nih maw, zeital nih an kan then kho hnga maw?
36Cathiang nih, “Nangmah ruangah chun nitlak thah hrulh lengmang in kan
um;
thah awk i kalpimi tuu bantukin an kan tuah,” a ti bantuk khan a si.
37Zeihmanh nih an kan ṭhen kho lai lo, hi thil vialte hna chung hin a
kan dawtu thawngin kannih cu teitu hna nakin teitu kan si deuh.
38Zeicahtiah a kan dawtnak he cun zeihmanh nih a kan tthen kho lo ti kha
fiang tein ka hngalh: thihnak nih siseh, nunnak nih siseh, vancung i a
ummi vanmi nih si hna seh, uktu le ṭhawnnak nih si hna seh, atu caan nih
siseh, hmailei caan nih siseh, 39cunglei vawlei nih siseh, tanglei
vawlei nih hin siseh, an kan ṭhen kho lai lo — kan Bawipa Khrih Jesuh
thawngin kan ta a simi Pathian dawtnak he a kan ṭhen khotu ding cu sermi
thil dihlak ah hin zeihmanh a um lo.
