CHIN NATIONAL DAY 2017
INDIANAPOLIS, U.S.A.

Lai Phunpi Ni a ra ding mi sunhsaknak puai kan tuah, Indianapolis ah. Chin Community of Indiana (CCI) ti mi zatlangbu nih a tuah.

Sophia Tial Tin Par le David Nun Tho nih panh ngai le sarh ngai in caan an tlaih.

Kan peem nak ram ah hi ni sunglawi lawm kho ding in zalonnak kan ngei ko nain a kiangkam zarhte lengmang ah kan tuah. Kawlram ralkap miuk nih khan mahti hin, a kiangkam zarhte ni asiloah zarhpi ni ah tuah u law tiah kan ti hna sehlaw zeitluk in dek kan fahsak hnga.

USA ah cun February 20 hi President's Day zungkhar a si ttheu i mah ni ah hin tuah usi law siangngakchia cu an chuak kho dih hnga. Upa belte cu zarhte ni i kan tuah zong ah an chuak hlei lo. Atu ah cun ni sawhsawh i ruak vui zong ah biakin khat in kan chuak cang, zarhte theng iseel a hau ti lo.

Indiana Laimi le CCI a bawm mi khual tampi an ra. Cozah bawi zong an ra.

Bia tawi tete an chim mi nih kan kong an hngalh ngaingai cang ti le an hnakkar ah an kan tenh ti a lang ngaingai.

An kan hngalh chinchin nakding le an kan ttanh khawh nakding ah kan kong le CCI rianttuan ning tehna chimrel nak caan rem a um. Thil santlai ngaite ah a cang. Mah bantuk kan tuah chel dah lo ah cun mahti i kan kong ichimrel nak hi a har. Atu hi CCI upa Pu Peter Lalsui Thawnghmung nih mah cu a tuah.

Zing Hlei Sung hlasak an thiah. Mah hla hi a sak. Puai hlasak i sak lo in pulpit solo sak in a sak. Vanlalsailo zong fung hnih a sa, fung khat a za na'n. Pathian hla an si. Hlasa minthang pi nih ram le miphun hla fung khat hmanh sak khawh mi a ngei rua lo.

Pu Ro Ding nih CCI CND statement a rel i bia ttha ttha a kan chimh. Kan miphun nih political awareness ngeih ding, kan miphun dawtnak langhter deuh ding, mi ralttha, mi zumhthlak le mi lungthiang kan rak si zungzal nak thlau lo ding, tehna a si bik.

Lai Phunpi Ni cu a kotho ah politics thil a si. Nain, atu ah cun a political significance nakin nunphung le identity kilkawinak ah a cang deuh hnek cang.

Kan miphun va i kan thim mi vapual cu lusen a si lo; lu eng (buceros bircornis) a si. Hihnu ah palh ti lo ding.

Hualngo ruakhatlak. Annih cu ruakhatlak i a original music (rua khawn thawng) an rinh i a rhythm he ikiap in an laam i zoh a nuam tuk. Halkha lei ruakhatlak hi an ihlok in an pet tuk deuh tawn.

Kan hmuncia ah bia le hla ttha ttha, laam dawhdawh, thuam dawhdawh, leng no iang dawhdawh kan hmu. Zan ah paih ka zoh rih. Zei dah kan duh rih?

Matu laam a si. A min ka hngal lo. Ngaknu nih tlangval zu an din cio hna i, zaang an cuaiter hna (phaw in). Bochan awk tlak an thim kan ti lai.

Kan thuam langhternak, kan zungmawi langhternak, kan bia le hla langhternak, kan nunziamawi langhternak, kan laam langhternak a si hlei ah, Lai leng le vaal no kan miphun thuam in an chuaklang i, an ihawikom i, kan miphun sinak in caan an hmang. Mah bantuk social significance zong cu kan miak.

Lai thuam cu mah vial hi a si ko, hnittial, kor le puansen hi. Tthihni tehna hi cu chap chom mi an si.

Laksawng kan serh khawh hna mi hi lawmh langhternak menmen te khi an si, minttial ttukttak. Mi sang pi hi Professor aho dek a si kha, Rotary Foundation i Indiana president a si. Mah foundation nih cun CCI hi $250,000 kum nga ca in an bawmh (kum khat ah $50,000).

B.J tehna bantuk pasal hot an um ah hin kei cu ka hmai a hngal bak. Falamlei lengmang hi concert ah cun ka bochan hna.

Mah pelek nu hi mi ttha tuk, Laimi zawn a ruat taktak mi, a si. Pa zong hi safety kong a kan cawnpiak tawn tu a si rua ka ti.

CND a ni taktak i kan tuah lo ca ah anih cu a ra lai lo tiah an ka ruah. Nikum kha a tuah tu pakhat ka si. Hawi thapeknak thawng in nuam taktak le sungsa taktak in aa tuah kho. Tukum tha ka pek ve hna a hau ka ti i chuah ka tenh. Cun ka kehlei i ka u (coat sen hruk) hi ka ratpi pah. Ka ngakchiat lio in a kan daw tu Pu Thio Luai a si. Halkha khua hluum zungzal a si i USA tiang i puai kan zohtti khawh hi a sunglawi taktak. "Halkha CND nakin a nuam deuh" a ti.

Naamlek laam hi laam vialte lak i ka duh bik pawl a si. Kan miphun laam a si cu kaa uar tuk. Mah ni belte hi chuncaw ei kan chuahkar celngel ah a rak laam.

Ruakhatlak hi aphunphun a um. Mah ni i an thlak ning hi a har phun a si. Tha a ba taktak lai. Har taktak in an kan timhpiak i kan sunhlawih ngaingai.

Awttha le hlasa kho an tam cang ning cu!

Aalung Bawi tiah kan auh lengmang i a minpum zong ka philh cang. A aw a ttha taktak. "Pasal aw" a ngei.

Mahhna hi an thiam taktak ve.

North America Paih Committee nih paih bual an ser. Hniarlawn Lal Tawng nih bual a co. Dallas ah an tuah ve i Uk Ling Thang nih a co.

Mirang leng no titsa-ttha duhnung te hi ka hmai bakte ah a tthu. Hnulei aa let i a kan zoh pah, a sam a tuai pah, a biang no a lang pah. Tthutnak ttha ka tin ttung ka ti. Rev. Sai Fung [coat sen] he khin an tthutnak thlenter hna seh law ka duh hnga nain ushers nih khua an khang lo. :) [nutung pheen i lupawng ponh khi ka si]

Miphun dang nih kan nawl icawn an duh zong ah an icawn kho lo; aziahtiah annih cu national day an ngei lo. Laimi lawng national day a ngei mi kan si (ka hngalh tawk ah). Mah kan phunpi ni hi itlaih in kan duh mi thil tampi tuah lengmang khawh kan si. 1948 Falam Conference i rak tuah mi ah thil duh lo awk zong a rak um pah men ko lai: biana ah, mibu zeihngallo nih Lai ramuk nawlngeihnak an chuh hna i Kawl nih an co ti bantuk. Zei a rak si hmanh ah, a cang cia cu zeiti tiawk a ttha ti lo. Hi ni hi zeitluk thil ttha ah dah kan hman lai, zeitluk thil ttha ah dah kan chuahcanh lai ti tu hi kan ruah ding a si cang.