Zu Phunphun Kong
Kanmah chung hi ni ni khat te i zu pu 105 a daap mi chung kan si. Asinain kei hi ka nu le ka pa krifa an si hnu ah ka chuak i, zudinglo te in ka ṭhang. Thangṭhat zong ka rak hlawh ngaite ve. Guam in U.S ah Laimi an hong phaan i mawṭaw an izalh kho rih lo i inn ah an ierh. Umhar biaruahnak ah beer an ihunh tawn. Indianapolis ka tlawn ah hawi nih mahhna sin ah cun an ka leenpi tawn. Kan vong luh bak in beer cu chinhoncia in kan ṭhutdan hram ah rak chiah colh a si, ti hunh in. Hawi zawng in kan hei din ve. Indianapolis ah kaa ṭhial i arsa zu tehna, khual ṭhutpi nak zu tehna, din pah lengmang a si. An hmuhhngan i din bal cang hnu ah cun ‘zu ka ding lo’ e ti i al awk a ṭha ti lo, i hawi sin ah din pah lengmang a si. Kum hnihthum hmanh ah zu oi zeizat ka ding ti ka rel kho ti lai lo. Zu phunphun ka din/teh bal cang hna, Laimi din mi cu. Neek tuk ding ka si ti lo. Mah i ka ton mi le ka hngalh mi hlei ah, ca ah tam nawn ka rel i mah chung cun atu i hi ka ṭial. Ca i an ṭial mi cu a tampi nain kan ca ah san an tlai tuk lo. Cuca’h Laimi ca i theih ṭhahnem deuh lawng ka ṭial lai. Zu hi zu neem le zu hrang in an um; 1-4 hi zu neem, 5-9 hi zu hrang (zu reu) an si--pasal zu.
1. Wine
Thingthei phunphun in wine ser khawh a si (chokhleipar hmanh in). Wine cu rawl sin din ah a thaw bik. Sa he aa tlak. A sa phun he aa tlak mi wine phun an um. Cawsa cu merlot phun (ma.lou tiah rel) imeh (just sip), rawl oi khat ei ah hrai tan idinh, a taang mi hrai tan cu rawl khim hnu ah din, ah a ṭha. Mirang upa cu zanriah ei hnu ah wine an ding, a thlim hna i, an it. Wine hi a thlum mi le a ro mi in an um. Zu thlum pohpoh cu an thaw e kan ti nain a mawn an nuam lo; mitkuh hnattam in mi an la. Uai nak a si. Thlum a hua mi (diabetes a ngei mi) ca ah cun dry wine a ttha deuh. Duh zong dry wine ka duh deuh, kei cu. Wine hi a hrai in tlaih a si lo; a hrai ke in tlaih asilole a taw in domh a si. Khat ko in tlen a si lo; hrai 1/3 tiang tlen i her hmasa a si. USA ah California i Napa Valley in wine thaw thaw an chuak. Europe le Australia in wine phunphun an lut fawn. Indiana State (Indianapolis in suimilam 1 mong) ah wine an tuah ve. Oliver Wine an ti i an thlum. An neek sual tawn. Alcohol 12% hrawng an um. Mirang ngaknu te Britney Spears bantuk nih wine din awk a ka chimh i wine hi cholesterol kil nak ca’h kum li chung ṭhate’n ka din. 2012 kum dongh ah ka ngol. Aziah dah ka ngol ti ah cun: (1) Hna a hnok deuh; (2) A ka simh tuk cang. (3) Wine ka din bu in ka dawt tuk mi ka tupa te ka raak i ka lung a ṭha lo. Ka ngol in kum li ah si-in ka phaan ve, cholesterol si ka ding. Ka ngol leisang ah a ṭhat nak an chim chin lengmang; nain ka ding hlei ti lo (ka din tawn mi wine te zong an chuah ve ti lo).
2. Beer
Beer cu hop le barley le ti in an ser. Alcohol 5% hrawng aa tel tawn. Beer cu tihaal le thabaat a damh tuk. Tihaal lo le thabaat lo ah cun a thaw ve lo. Beer a ṭhat nak hi tam nawn an ṭial. Keimah i ka hngalh mi cu: (1) Beer cu ke ah a kal (tai tang ah). Mah ca’h cun chunnitlak ke kal le dir rian ṭuan tik i kan taitang tha a baat tik ah beer kik kan din ah cun bangh a dam ruahmah. Zu dang cu ke ah an kal lo. (2) Pumfah a damh: Kan pum i rawl a herh zat kan eipiak lo tik ah khin zan kan ih ah kan pum a faak dih. Kan idok, kan isaan. Beer kik kan dinpiak ah cun a dam dih. (3) Rawl a bawm. Pawṭaam a hneem (calorie a um ve cumu).
Beer hi 12 oz. (Pepsi dur tia) dur 2 din a za. Tam deuh din ah aa hlei ti lo; cun, ti a haal ṭhan. Ruhseh (gout) ngeih ah cun beer din lo ding (aa raal tuk). Hawi cu ṭhaal khualin ah beer an duh. Kei cu khuasik sihpit i tikik i kaa kholhka (ka pum a kih saling) ah khin a thaw bik in ka thei (ka tha a baat ah cun). Beer cu a kih lawng ah a thaw (a kih lawng ah rian zong a ṭuan rua ka ti). A man benh an palh mi beer 'case' khat February ah kaa cawk i July tiang a ka nguh. Kei cu beer kham (Heineken tehna) ka duh lo. American tlangval zong hi import beer an ding lo. Beer fil (light beer) an ding. Beer fil cu beer a si ve ṭung, nain riit a si lo i hna a thiang. Thau nak a si lo fawn. Beer fil din hnu ah cun beer kham aa duh ti lo.
3. Martini & Champagne
4. Zufa
Rawl hmin cia ah thilnu an phulh i an uam i a tho. A rauh deuh in a hang a chuak. Mah cu zufa a si. Zufa cu glucose haang ti awk a si ko. Cuca’h thazaang a pe. Titsa ah a kal. Riit belte ah sau tuk riit a si (a thaizing tiang a caam; a riit zong a nuam rua lo ka ti). Glucose a tam tuk ca ah thi thlum zawtnak (diabetes) a ngei mi nih cun din ngam ding a si lo. Hmanthlak i hi muum a si. Lai kan pipu nih muum hi an ciin i zu ah an thlak tawn. Atu cu zu hraang (alcohol 35% le acung). Zu hrang an ṭhat nak cu chung a kal khawh set lo chel ah zu hraang dinpiak ah cun a thaizing zunput kal a nuam.
5. Rum
Rum cu fu in an ser. Cuca’h a thlum nawn. Alcohol 35-50% an umter ṭheu. Rum hi “tlangval zu” ka sak. Thisa ṭhat lio i din phun a si. Ngaknu ngamh nak. Rum cu lu ah a kai. A khul a rang. Din lecangka in aa thawh colh. Emotion ah a kal i Rum din cu lung a nuam, ral a ṭha, tha a por. Thin ai zong a thawh ca ah hraan a fawi. Zu-ai puan zong a fawi. Cuca’h rum din hi iralrin a hau. Thanuam tuk sual le puarthau sual a fawi ca ah ṭihzah awk tlak lo in um sual nak a si. Zohchiat a fawi. Biachim zong luan khawh a si.
Vawleicung pumpaluk i a man bik mi rum cu Bacardi a si, Puerto Rica ser. Rum lawng lo, zureu phun vialte ah an manh bik mi a si. USA ah cun Bacardi cu Laimi nih an neek i din an duh lo. Captain Morgan ti mi rum a um i a thaw deuh i mah ko cu an ding. USA pumpaluk i an din bik mi zu a si. Mah rum nih cun Laimi tamlak a thahhrulh hna. Thawl nganpi (miang ngei, 1.75 liters) an ser mi a um i mi rual chungṭuan nak tehna i dah awk phun a si. Mah miangngei cu lu i a kai ning a bon lo. Din lo ah a ṭha. 1.75 liters (thawl 2 le atan tluk) ah cun $23 hrawng lawng a si ve. Rum cu ti cawh ah a kha.
6. Whisky
Whisky cu fongvoi, barley, rye, le wheat tehna in an ser. Barley an keuhter i a keuh khap ah an caar. Mah cun zu ah an thlak i an reu. Kuhthing ṭengki ah an rawn. Kum a hlunh. Johnnie Walker Black Label le Glenmorangie tehna khi kum 12 hlun an si. Alcohol 40% in an ser hna. Zu hi alcohol 35% a si ah a thaw bik e an ti i, 35% si lakin ti an cawh i an din, zu or a ngei mi nih.
Whisky cu “upa zu” ka sak. Upa le upa (kum 50+) ileen i bia iruah nak phun a si. Din zokzok phun a si lo. Kum no mi cu an takpum nih whisky a celh deuh lo, ca ah upat hnu (40+) lawng ah whisky cu din ding a si. Tlawmtete in duhsahte’n din ah a ṭhat nak a lang. Iberh phun a si lo. Whisky tam nawn din ah cun a thaizing chunhnu tiang zei ei/din a hau lo; tha a um. Kan mui zong aa dawh. Whisky hi thithau ṭha (HDL) tha a pek tuk ti a si. Ṭhawn nak a si kan ti lai. Cun thlum aa tel lo ca ah thi thlum a kaiter lo, thau a karhter lo. Ellagic acid aa tel i mah nih cun insulin ser a bawmh an ti. Whisky hi Europe in a ra bik. Europe whisky minthang cu Johnnie Walker, Jameson, Chivas Regal, tehna an si. Canada in Crown Royal, Canadian Club, le Fireball nakzik zu tehna. USA i whisky an ser mi cu "bourbon whisky" an ti hna. Fongvoi zu ti awk a si. Rye le rawlfang dang cawh in an chuan hna, nain 51% tal fongvoi a si lo ah cun bourbon a si ti lo. Bourbon whisky hi an kum a no (kum 2 zong an um). Buffalo Track, Maker's Mark, le Jim Beam tehna an si. Mirang i an duh bik mi cu Tennessy Whisky an ti mi Jack Daniel’s a si. "Mirang zu" ka sak. Whisky lak ah Jack Daniel’s ka duh bik. A haw a nam deuhvak, nain feels good. Dang a caar deuh belte. USA ah cun ramchung chuak si kaw a man a tlawm ($21-25) i Laimi nih an neek.
7. Brandy (le Cognac) Brandy cu wine reu a si. Alcohol 30-60% in an ser bik. Mitsur thilchuak a si ca ah thingthei haw a taang pah. Mitsurzu he an rianṭuan ning aa khat menlai. Ka din bal le din bal lo ka hngal lo. Brandy phun a si ṭung i Brandy ah an rel deuh lo mi a um. Wine raang oi hnih an reu mi a si. Cognac an ti (France ram Cognac khua in a chuah ca ah). Laimi i Cognac an din ngaingai mi cu Hennessy a si.
A thaw maw ti ah cun, a thaw e, a din a fawi e an ti (kei kaa tel lo). Laimi nih an cawk ngaingai. Luklak in an din ṭung i a paam pah. Kei cu Hennessy ka duh theng lo. Upat nak in ka leen nak ah an ka dah tawn i din cu ka din ko na'n ka din ah kaa nuamh ka thei rih lo (nan tangka lam a heu e ka ti hna). Hennessy phun special quality a um. Remy Martin an ti i $45 hrawng a si. Kaa ziak hlei lo. Europe zu pohpoh cu kaa ziak hna lo, kei cu. Amerikan zu ka duh deuh hna. USA cozah nih zu ngunkhuai tam tuk a laak hna ca ah ramdang zu cu an man a tam i Laimi nih zu ṭha tuk tuk ah an rel hna.
8. Vodka
Russia zureu a si. Zu vialte lak ah a thiang bik (ethanol le ti bakbak) a si. Rawlfang zei poh in, aalu zong in, an ser ko. Alcohol 40% a si bik. 37.5% tal a si lo ah cun vodka a si ti lo. Vodka cu a lin tuk i daihkuang ah chiah a si. Khuasik i tak ilumh nak phun a si. Russia ah cun rawl sin ah din a si an ti. US nih vodka cu “zeitin hmanh a um lo mi zu” an ti, a haw zong a thawtnak zong zei hmanh an um lo an ti. USA ah vodka hi an din ngaite ve. Smirnoff timi vodka cu Captain Morgan rum tluk in an manh. Vodka hi minthang bik phun, a thawl aa dawh tuk i ti chiah nak ah ka hman te lai tiah, ka cawk bal ve. Akik in din a sii ka hngal lo i, zeiti i din ah dah vodka hi a thawt hnga ka rak ti. Gin khi vodka an ṭamh mi a si. Akhut in a khu ve. Juniper berries in an ser.
9. Tequila
Mexican zu a si. Tequila hi zu reu vialte lak i zu ṭha bik ah an chiah. Pum a hrawk lo bik (thin a daw bik) a si an ti. Thi thlum a kaiter lo, a thaizing lu a thiang an ti. Thau lo nak zong a si an ti. The Eagles rock band i mihlun mithi Glen Frey cu Tequila a ding i zinglei ni nih a kahpuat i, a nuam tuk in a theih. Tequila Sunrise ti hla khi a ṭial. "Take another shot of courage" (ralṭhat von itlenh chap) ti tehna in a ti. Zei zu dah a thaw bik? Midang hal hna u; kei cu zu or ka ngei lo. Micheu nih "Lai zu reu ti thum thah" a thaw bik an ti. USA sibawi nih, ‘Zei zu dah na din tawn?’ tiah Laipa a hal. “Captain Morgan” tiah a leh. Sibawi nih cun, “Captain Morgan cu a thaw tuk i thi lak hmanh naa din khawh lai” a ti. Thi lak in an idin lengmang khe. A thawt ka theih ve mi cu Captain Morgan Private Stock a si. A thlum i a ṭhawng; nain mawn a nuam lo. Zu thaw nakin zu din har hi mawn an nuam deuh. A thaw mi din duh ah cun Coca-Cola tehna, lakphakti tehna din ding a si ko. Ranker.com i The Best Alcohol Brands an tining, vote an hmuh zat he;
Anmah le an phun cio ah an cawk bik mi cu mah hi an si: Scotch Whisky, Vodka, Brandy, Rum, Bourbon Whisky
Atawinak In: Thabangh ah beer. Lung nuamh nak ah rum. Biaruah nak ah whisky. Ngandam nak ah wine sen. Zu ngol lo ca'h Tequila. 2020/7/3 |