|
Billy Graham Center
June 22, 2013 zarhte ni cu Illinois ka tlawng. Inn thar lut an um i, kaa faak tuk in an kan kawh i kan kal. Kan phanh tlawmpal ah, an inn chung hmanh luh lo in Wheaton College kal kaa rel colh. Krifa collge minngei ngaingai a si, Billy Graham a rak kai nak zong a si, i ka upat ngaite mi siangin a si. Billy Graham Center zong a um i zoh ka duh [ka hnulei i tu khi cu Blanchard Hall a si.] Keimah lawng kal kaa rel na'n inn ngei tu pa nih a ka kalpi. Midang nih an kan zulh.
Billy Graham Center ah hin Museum a um mi mah zoh cu ka sia a herh mi a si. Aziah tiah America i Pathian Thawngttha a karh ning tuanbia a um dih. Ka tule zong zohpi ka duh hna, caan ttha hmuh nolh a har i.
Museum cu Columbus i America a hmuh kong telh ta in, 1776 kum in an thok. Zumhnak tuanbia cu aa chang chang in an langhter hna. An rak ton mi harnak, buainak le lawmhnak tuanbia. Felfai tuk in an taar hna.
D.L. Moody le Billy Graham hi thlarau tlau vailam hram i tam bik a hruai mi an si lai. A nung bal mi ah phungchim thiam bik pawl zong an si lai. D.L. Moody chan cu ke kal chan a rak si. A bia fawi tuk in a rak vaak kho lo; nain a bia cu chanttiamlo an si ca ah atu tiang vawlei ah a hmun i mi thinlung ah a taang. Billy Graham chan cu media a um hnu a si. Cuca ah, anih cu a bia nih vawleipi a cul colh. Sph. David raldoh a tthawn tluk in mahhna pa hnih hi thlarau ral doh an tthawng ve.
Museum luhka ah Billy Graham kong minit 7 video a um. Khoimaw zawn i an chim mi ah, sermon 65 in minung 350,000 bia a chimh hna e an ti, a chan lailing tiang ah. Thlarau tlau zeizat dek Zisuh sin a hruai hna.
President hlun Nixon ruak lio i President Ronald Reagan he an kut an itlaih nak hmanthlak hi hmanthlak roling a si.
Acung orhlei kam i khi September 11, 2001 lio rampi ruak-humh lio i phung a chim lio a si. Live in ka rak zoh ve.
Mah hi Billy Graham pulpit a si. Ka von ihlaan taak, a umlokar ah. Cuaite pa phung ka chimhnak.
Mahka kan phanh ah cun van, vanrang lak i a zuang mi ko kan lo taktak. Cunglei hmanthlak khin ruat u law, zumtu lamthluan kan zawh i, mah dih cun Kalvari kan tan, cu hnu ah "lam bi" in kan lut i vailam veel thawng in cunglei ah laak kan si lai nak a si. Vanrang lak hin cunglei ah kaiter kan si te lai tinak a langhter. Mahka cun museum a dong.
Pastor Chan Thawng Lian (Liandodal) nih thiam ngai in caan a hman. Mahhna krifabu hi United Chin Church ti a si rua. Laimi 300 ringlo an ipumh nak krifabu a si. Biakin $33,000 man an helh lio. Atu i an ipumh nak mirang nih an siang hna lo i biakin thar an cawk ding mi ah zulh ve an timh hna. Biakin man zong hnarcheu kan thawh lai i a ngei tu sinak hnarcheu veve in kan co lai e an ti. Atu hi nubu pawl gospel team kal nak hla an cawn lio a si.
Indianapolis-Wheaton cu highway pa ruk le khua chung lam lam thum zawh hau kaw, azan in 'map' kaa zoh cia. Tlau lo te'n ka phaan. Cuaite pa nih, "GPS lo i mahtluk lam kelkawi i tlaulote i a kal khawh ah cun ka zeidek" ka'n ti e a ka ti. Kei nih, "Leh-hawng ah na ka rel lo maw?" ka ti.
Himte le tluangte in kan tlungkal kho i Pathian veel kan lawm.
|
Thianghlim lawr i ka kai lio a hei si. Ka thiam deuh lo, kai bal lo kan ti cu. 
