KRISMAS KA NGAI COLH
2003 Krismas ni sung cu kan phaan. Mah ni ah hin suimilam 24 a um ve ko nain suimilam 7 chung lawng Krismas ca'h kan hman hnek. Zanlei suimilam pa thum in thok a si, tuan deuh zong i thok lo in. Ni tawite cu kan tawiter chin. Ni sung cu kan sunter chin ve. Kan lung aa lawm. Kan herha a zaang. Pu Sang Maung nih pumh a uk. A awdang a ttha ngaingai. Rev. Dr. Van Ni nih phung a chim. Christmas message a chim mi cu, American system ah Laimi kan luh ve a hau ti a si, a fawinak cun. Intellectual ca deuh ah chim dawh a si. A phungchim lio ah rawl-um a thiar mi an lut an chuak pah nain lungtte lo te'n a chim khawh. Dallas Area cu Fort Worth le Lewisville le Irving le Dallas ti in an um i Dallas pawl nih hla an remh. An hlaremh a ttha tuk i, 'Mah hna hlaremh hnu i kannih remh ve lai cu' ti in ka ral a chia nawn. Asina'n patling ngalcangcang cu kan si i kan tthuat ve ko. Aho nih an ngai hnga maw tiah ka ngiat pah ziar hna i tthate'n an kan ngaihpiak ko.
Zamawt, an pasator nih laksawng phawt rian a ka khinh ttung i henta, a duh mi isawm hna seh ti ko lo in a ka bawm tu ding cu amah nih a thim dih hna. Rual-u deuh mi-smart lawngte a thim hna. Elaw khah, mi biapi a hrelh ttung tiah keimah te nih leng no ka va iruaih. Hmai piano kam ah laksawng cu kan sersiam. Hawi i laksawng an fun kar ah kannih nih an nambar kan ttial hna. Minute cu nambar a ttial ah, keimah bang in, fiangko fiangko in a ttial hna. Kan ttial dih in nambar cu zaapi kan va phawt hna, chung in. Mah dih cun, rawl isuah ah kan ithawh i henta, Salai Ni Thang fa-torhchuaklo ttheu nih mic in a kan au leen--rawlsuah ah an ithawh cang e ti tehna in. Saktattettawt mi-hmu ko a lo. Mah mi hi zei dah a au lengmang hnga ka ti. 'Na mic kha pit seh' hei ti ka duh. Zan i a dawtnak a ngan ka ti mi a ka dawt chung tawi dawh in a um. Rev. Chum Awi nih le thawng a thanh fatin minute he cun a kan hnor vuk lengmang. Tikir celh an chuak lo. Nu si ning law 'aisi-a' ka ti cang hnga, hi hi (nu nih in).
Dallas pawl an si a fah ning cu, Krismas ni chuah awk Krismas hlaphel koko hmanh dahkaw an ngeih lo cu! Lai sak mi ah, Jenny hlaphel zong, Siangpahrang Bawi zong cawk awk an um ko, Krismas hla veve. Mirang hla zong cawk awk a tor. Hlaphel phel khat koko hmanh icawk khawh hna lo cu zeitin dek an sifah an celh (anmah chim hna hlah u, nan ka hloh lai). Kawl hla sawhsawh an chuah. Kei nih, "Phit zokzok u" ka ti hna. Mah cun Za Zi hla an chuah, love song. "Mah zong cu Krismas ni he aa tlak lo" ka ti hoi hna. Vansan ah Hniarlawn Hlaremh an chuah. Aa tlak pek lo. Kumvoi cu Krismas hlaphel nan icawk khawh nakhnga nan fongvoithu zong zuar u law ti ding an si. Rawl ei dih cun laksawng phawt a si. Hmai in Chanchan nih nambar a au i nu pa hnih nih a laksawng tonghtham an bawmh hna. Laksawng i nambar aa benh mi poh rat i laak i kheh taak a si. Awngbali zuh bantuk. Indianapolis i CEBC ah khin laksawng thlen hi upa ca ah cun a hau lem lo ti in, voikhat cu, kum 15 tang lawng ithlen an rak tuah. Khuakhan an thiam tuk ka rak ti. Phawt tik ah nambar pa khat minung pa hnih an pek hna. Mah hna cu an thlenter hna. Mah cu a rian a rang. Biana ah, voi sawm nga ah akhuah in minung za khat auh a si i suimilam pa khat hrawng a rau hnga. Apakpak i auh ah cun voi 100 auh a si i suimilam pa hnih tal a hau cang. Kannih cu anuar phun in kan tuah. Minung 116 hrawng nih apakpak in ra laak a si i caan a rau pah. Kei tu cu "ka tthut nak a ttha" i zei can hmanh rau seh law ka zei a poi lo. Caan a liam tuan lai ti hmanh ka phaang leh. "Lunglawmh nak ni tawite, liam lai ka'n siang lo, Kan tthutnak cu hmai piano pheen ah a si. Mic pa khat an ka hmanh ve; rak holh lengmang ve law tiah. Leng sung pawng tthu kan ti cu tlangval dang nih an ka helhum pah, a "sermon" sual lai ti maw an phaan zei dek. Kei nih ka rem ziar hna lo. An ka but tuk tiah ka ruah. Maradonna bawlung tin ah maw an ka rel hnga ka ti. Ka si a vang e tiah Chanchan ka chimh i mic in zaapi theihte'n atthawl in a ka tthawlpiak hna (rian zong ifialter tal lo in). Mahti hin capo in kaa laa i mi laksawng laak poh ah ka rak holh lengmang ve. Laksawng ah kei cu single use camera ka ting. Nunu ka tthenh. Laksawng phawt a dih lai te ah khin Chanchan nih, cabawm te aa chuah i, Rev. Ngun Awi nih Bethlehem Arfi hla bia a ttial tu lawmh nak ah laksawng a chuah i ra hlam seh" a ti. Ka pawng i minute he cun kan va laak. Minute nih cun cabawm cu a hon i, $20ca pa hnih a pharh. $40 a si e tiah kan thanh nain $100 a si tthan. Kan ilawm ngaingai. Kan tthut in Chanchan nih cun, "Tangka za khat hmanh rel khawh hna lo" a kan ti. Mah tan i an ka capo mi vial lak ah mah capo cu kaa lawmh bik a si. Zan ah pumh a si tthan. Zan pumh sak awk ah hla zong iring hna hlah, drama le skit te zong aho nih cawng kho hna hlah. A rocar pah. Krismas a dong tu khom hmaikhah te an si lo. Cu hlei ah Krismas hla kan sak a tlawm tuk i ka lungkhan a si lo. Krismas nuamhter nakding ah cun ahlankan in Krismas hla tampi sak ah a ttha. Sak setsai lo ah cun Krismas thlam a leng kho zokzok lo i zeikarlo ah a ni a liam. Pumh dih in hla nuam kan sa hna lai e, krifa hla he, ram hla he, leen hla le zuun hla he kan sa hna lai e, Pa Hlun nih a kan hruai lai e, biakin compound inn chung ah mah hla sakpi nak nawl kan pek e, tiah Rev. Dr. Chum Awi nih tthalakte'n thawng a thanh cia. Reverendpa cu mi hlawp a tloter tuk. Bethlehem Arfi hla kan cawn zong ah cun tel ve a duh tuk nain caan aa ngei lo an ti. Kan remh hmadung ah, "Hlathiam nangmah bantuk nih mah hla thiam lo va um hlah, ra ve, ra remh ve" kan ti i Dr. Van Ni he an kan remhpi. Dr. Ceu Lian Thang nih tingtang a tum. Doctor pa thum he hla remh cu a nuam bak. Dr. Duh Kam tho ve seh law pa li an si leh hnga. Dr. Duh Kam cu phungchim a si. A phung chim a ttha ngaingai. Kei cu phungchim ngaih pah in, pumh dih sak awk hla cu hnawnam in ka ttial pah, bulletin sheet ka khawmh i. Fung ruk ka ttial manh. Awttha nih mic in an au lai tiah. Ram hla fung hnih, zuun hla fung nih, krifa hla fung hnih. Mangbik Sangcem zong aa tel, laam nak ah tiah. Asina'n pumh a dih cu zan suimilam 10:00 hrawng ti cang kaw thil sim le ttin mit lawng an au i mi kan tlai kho ti hna lo. Marilyn te inn tu ah itthial ko usi kan ti i ttin zai kan rel. Krifa lungrualte i lentti a nuam hringhran Note: Mah hi relnuam ah ti i ka ttial mi a si. Leng no kong ka ttial chih mi zong hi zeiti lei i ttial a si lo; a reltu thanuam nak ah ti i ka ttial chih mi a si i amah zong nih midang zong nih lungthiangte'n rak ruat sawh u. Mi thang ka tthumh sual ah a um ah cun kaa tinh ning lo pi a si lai. [Mah hi 2003 dongh ah tial i, http://ceu.00freehost.com/Dallas/Krismas.htm i aa chia mi a si.]
|