Indiana Chin Baptist Church

U.S.A.

Christmas 2014

Tukum ICBC Krismas cu kum dang bang lo in ka duh ningte in kan tuah. Kum fatin te Krismas chawng ah ka zai i, ICBC Krismas cu lungdong a si e ti tiang in ka ti. Zai awk a tlak ca'h ka rak zai mi a si ve. Tukum cu zai awk a um ti lo. Ka lung a tlin nak tu ttial awk a tam. Apakhatnak cu: zan program a um ko kha a si. Kum dang Krismas zan cu um a har tuk, li a leng tuk tawn. Kei hi Krismas zan i aa nuam zungzal mi te ka rak si i, Krismas zan i umhar cu ka faksak tuk tawn. Ahnu cun wine kaa cawk cia cang. Tukum hrawng ICBC thil ti nak i mi kan tlawm tawn ning le, Krismas zan i mi kan tam ning kha ruah ah cun, zeitluk in dah kan rak hawt-haal ti a lang in ka thei. Ngaihchia tete pei an rak si cio hi ka ti. Tukum cu nan kan khamh bak. Khual kal ka rak ruat nawn i rak kal na hmanhhmanh ning law.

Ka lung a si rih nak ka peh lai.

Krismas ni pumh kha inchung a lin lo. Ahnu khan cun thli kik hmanh ka theih nawn. Kaa lawm tuk. Inchung a daih ah cun bawhte zong an ngam, upa zong kan sia a rem, phungchim zong kan ngai kho.

Inchung lin lote i chiah khawh hi nunning saan ah ruah ding a si. Laimi um nak lawng ah inchung linh hethut a um. Mirang sin i kaa tel nak ah khualinh ka thei bal lo. Laimi cu aho poh nih an kan neek deuh ko, Laimi lila zong nih. Biana ah, mirang sin i bia an chim ah sau tuktuk an chim ngam lo; Laimi sin ah cun sau an chim ngam.

Rev. Dr. Edmund Za Bik nih phung a chim lai ah, "Pu Ceu Hlun nih minit 20 lawng chim ding tiah ca ah a ttial ko nain minit 25 chim kaa tim i, cu i ka ti khawh lo sual le minit 30 hrawng ka hman te lai" e a ti. Pumh dih ah, "Minit kui na ka ti le sawmli ka chim rua" a ka ti. "Sawmli-khat na chim, na'n a poi lo, a ttha ko" ka ti.

Ka lungthli cun, 'educational institution pa khat i kum tampi chung cachim a ttuan cang mi i atu tiang time management ti khawh lo cu a si te a si lo' ka ti.

Krismas thla hi kan sunhlawih tuk deuh tawn i, December a thawh in zarh fatin Krismas cu kan tuah. A nicaan a phanh taktak hlan ah kan vuai hrulh i a phanh tik ah a fil cang tawn. Krismas nuamh nak saupi kan tem ti cu a si nain tukum bang a ni taktak tu i sunglawi te i tuah hi a ttha deuh rua ka ti. Lailei ah khan mahti i kan rak tuah ca ah Krismas kan rak ingaih tawn zong kha a si in ka thei.

Mino hlaremh kha tukum cu uniform an ihruk lo. Mah zong cu ka duh tuk. An hla zong ka duh mi te a si. Ran cu a rang deuh; nain tthat cu a ttha ko. Torlak nih a remh rua lai tiah ka rak ruah.

Kan nule kan pale nih pumh chung ah caan an hman. Lung a si ngaite. Thil aa ti ah upa le hmailang i caan an hman ah hin a pipa deuh. Pu Tluang Pum belte 2012 i a phanh in atu tiang vo hlei an serh tuk deuh in ka thei. A hmaan maw hmaan lo dek. Krifabu chung ah hin u-ting nau-zo i caan thiah hi a ttha. Upa lawngte si lo in mino lei deuh zong caan ngei cio hna seh law ka duh, hihnu ah cun. Tar lawngte cu upa nih cun kan duh ko hna nain ngakchia ca'h an boring tuk. Mahti hin cun tthangthar fanaule kan thlau dih khawh hna. An zuam cawk te lai lo.

SS Drama Competion singing Silent Night.

Rosie cu, drama le hlaremh ah telh ve hna kaw Krismas lai zan kha 2:00 am hnu in aa hngelh kho ti lo. An cawn ni cu paw ttaam zong thei hlah. Amah ca'h Krismas hi a ttha bik ko rua. Nikum kha an siangin ah cathiam ah pakhatnak a si. Ca rel ah amah level leng pi a si. Laica kan reltti i a ka lonh. Laica zong cu aho chimh lo in a tuak a tuak i a thiam ko. Mahka i English aa ttial mi le Laica bon lo aa ttial mi hi amah ttial mi an si.

Krismas le Kumthar pumh caan hi 1:00 pm si lo in 2:00 pm si seh law a ttha deuh tiah ka ruah. 1:00 pm cu a tuan tuk. Pumh a dih tuan, rawl kan ei, nehnang kan sim, hnu i ttin kaa zalh ah 4:05 pm lawng a ti rih. Thadampi tu in thok usi law mahle chungkhar cio ah Krismas rawl sunglawite in ihrawm manh le thadam deuh in iserh manh a si hnga. Tuan ah kan thok, tuan ah a dih, kan chuak i zei kan tuah ttung lo. 1:00 pm rumro ngakchia vei tlaih i itlaih hi a ttha bik rua lo ka ti. Rosy: ICBC Sunday School Sayamah le Saya le nghakchia cu Drama a ni zuam ve. "Silent Night" an sa lio.Rosy Translate: ICBC Sunday School Teachers and kids are in Drama and they are singing *Silent Night*.

Drama zuam nak mark pek tthate'n an ka thiah ko nain inn ah zanriah ka ei ta i tuan ah ka ra kho lo--a ka thiah tu nih ka ngaithiam hna seh. Nutung drama zong ka tanh lo. Tanh ning law an hmanthlak ka taarpiak ve hna hnga.

Tutan kan thilti ah ka duh deuh lo mi cu, zan pumh lio ah biakin chung mei an hmih dih lengmang mi a si. Drama kan zoh i puai zoh cu a si ko; nain a herh zawn ah stage tu khi muihter, ceuter awk a si. Mipuum tthut nak cu muihter ding a si lo. Pathian biak pohpoh ah inchung a muih phung a si lo. Krifami cu khuaceu lengmang kan cuh ding a si. Hmailei ah zei bantuk program aa tuah hmanh ah biakin chung i mei hmih dih hi cu ituah ti hlah seh law a ttha tiah ka ruah, PLEASE.

Guesing how to build the house...

Zan khat cu Mino secretary Lg. Za Nei Cin nih a ka chawnh. A panh in a thlum tuk. 'Zei ko dah a duh hnga aw' ka ti. A lung ka laak cang ti a hngalh in, 'Carol na kan vahpi kho hnga maw tiah' a ka ti. Carol ka vah lo nak a sau cang. Metting a um lengmang i a dongh lai zan lawng ka vahpi hna. Meridian naih lei khi kan vaak, inn 19. Kanmah phu kan za bik rua ka ti. Bawi Hnem Sung le Dawt Tha te nih an inn in an kan zulh i mawttaw hmanh ah pheikhaan le apom in ka cuang. Mah bantuk cu a nuam. Mawttaw chung ah an dai tawn i, "Dai hlah ngat u. Aw u, au u, ni u, kheek u. Hla zong sa thluahmah u, zei hla poh. No lio le zaatka ah mahti cun dahkaw um ding" tiah ka hei raak pah tawn hna. Kan vah nak inn pohpoh ah sanpiuh zong chuanh pah lo in metthai hliarhliar an kan pek i Halloween vaak kan lo pah. Kei cu an kan vah ah apple le theithu khengpi khat ka pek hna, pum khat cio ting ding in. Inn aa naih nak ah kan ke in kan kal i, mawttaw cung in mirangpa nih a kan chawnh. A kal. Tlawmpal ah a ra kir i, kannih inn zong kan vaak ve u law a kan ti. Kan va vah ve hna. Kan vah nak hrawng Laimi inn ttamh ah an rak fel ngaite hna i ka lung an ka ton ngaite. [Atang i hi cu keimah ttamh mi a si. Afawilan nakin hri tthing ka von zam hna. Acung ttamh nak zong a um ko na'n a kai ka huam lo.]

Tukum Krismas cu mi kan ithuamh ning belte zei huaha an/kan si cio lo. Ngaknu pawl zong 'mah khi aho dah a si hnga' von ti awk um hna hlah. Krismas hi hni thluang venh ni ah acheu nih an ruah rua. Kei leng no si ning law Krismas ah cun, I'd be red hot. Kum dang ah cun rawl ei nak hrawng ah khin thuam dawhdawh he an ichok. Hmaan zong kan ithla kho pah. Atu cu mi aa khat dih i hmaan ithlak nak hmun rem hmanh a um lo. Biakin chung tu ah mitam an va ithla. Hmanthlak sawm tu rak ngeih pah leen lio nan ngai cio lai.

Rosy: Ni Par Sung (Sungkale) a pa le pastor cu zeitin dah inn cu ser ting a ni ceih.Rosy Translate: Sungkale father and the pastor ar talking how to build the house?

Still Guesing....

Drama a kan piahpiak tu Nutungbu, Patungbu, Minobu, Ngakchiabu, an dihlak cung ah kan ilawm. Anmah thawng in tukum Krismas tuah cu tuah taktak ah kan ruah cio. Nu aa ser mi hi an thiam tuk i pa khom an lo lo. 'Pa an si ko lai, an mui a chia tuk ai' ka ti i a si ko. Chan Za Lian pa cu a dongh lai te lawng ah ruahdamh in amah a sii ka hngalh. Rosy: Inn ser tu pawl hna cu inn ser ting ah and ruah lang mang College pa te a ra ah kan tuah dih a ti ah inn cu a ser ii College pa te cu an hngar. Masapik kha Cowboy a si.2.Sungkale Pa 3.Pator 4.Assistant Pastor 5.Mi ttawng pik 6.Pathian zum tu 7. Pa nu an i ser ter apawng zong. 8. A Rum Pa an si. Rosy Translate: 1.Cowboy 2.Ni Par Sung Father 3.Pastor 4.Assistant Pastor 5:Strongest Man 6.Who trust God 7.Boys acting like girls 8.Rich Guy

Guesing for the party.

Zan program a um lai hngalh ah hla le laam zong rak cawn deuh awk, drama karlak ah hlasak le laam zong tenh pah awk a rak si ka ti. Hihnu ah cun hngal cang usi law ka duh. Mino pawl hrimhrim laam nan cawng bal lo. Khumvoi cu nan cawn cang a hau. Vawlei bawh laam si lo in tungdir laam bakte nan cawn lai (laam i vawlei bawh le van zoh a tam tuk).

Rosy:China nu te le pa khat nu te cu Pu.Farmen sin ah Christmas lawmhnak kawng cu meeting and tuah

Translate to English

Rose: A China girl and a girl are with Pastor Farmen to know what to cook and drink.They are doing meeting.

Tukum December cu Krismas thlaam zong a leng pah ko. Kei, kaa hlerhlau tuk lo nain inn zong ka ttamh, Krismas hla ka ngai, Carol ka vaak, angki thar kaa hruk, laksawng ka hmu, hmaan kaa thla, hawi sin ah ka ni ve. Mah hlei zei dah ka orh ti, ngam in? Family le ngeih lo, lengmi he iziit le um ti lo, ka hawikomle nih laam hlaat pipi lawngte ah an um. Nihpi tu ngeih lo, capo saihpi tu ngeih lo. Kan nih lo tuk ah cun kan tar ko, minung hi. Atu cu nih zong ka thiam ti lo, ka nih ah aciar in ka ciar cang.

Mahhna lawng nih hin hmaan thlak an ka sawm. Hika (2012) lio nakin kan upa deuh cang. Keimah kum an si tik ah zei dek an lawh te hnga.

Kan hmang tthan te lai, Bawipa thawng in.