"Ni thla e, caan sung vialte lak ah,
Sung cem ko Zisuh chuah ni cam,
Kan lawm lai ni leen chun ni tla."

"Ngai Hmanh Vanmi Authawng Cu" ti hla an sa, Krismas hla taktak; hlasa dang cu zuun hla dok.

Mah hi ICBC chungtel 2350 hrawng kan si lio a si. Krismas ah kan chuak dih nawn rua ka ti; mi kan sawp. Khual kan ngei lo tiawk a si. Ar ar 70, voksa 200 lbs, cawsa 260 lbs, mahehsa 100 lbs, facang tun 5, mehkiau, khohsuai le ciazan zeizat dek kan chuan. Rawl kan iza bakte a si. Rawl ei lo i a ttin mi an tampi i, a ei mi minung 1772 tiang kan rel khawh hna, mah hnu ah tlawmpal an ei rih rua. 1800 kan ti men lai.

Mahhna duet sak ko kan ingaih cio. Par Tin Mawi le Ngun Hlei Tial an si. An hla thim mi a chia pah.

Ukpi le a naule. Mahhna hi an leklak ngai nain hla nuar sak an hmang. Atu zong hi hla duardaar an remh rua ka ti (an remh ah kei ka um lo).

Van Lal Mang, ICBC i a ra itthial kum a si i X'mas Committee nih lungtlingte in solo a thiah.

Sayamah Par Tin Mawi hi Phillippines ah music siangin a kai an tiin ka thei. Hlasak a thiam ngaingai. Amah aa tel hnu in kan P&W zong aa dang tuk. Atu hi hlaremhbu pi hla a vaih hna. Mah an hlaremh ko nih cun Krismas pumh a nuamhter bik rua tiah an ti.

Uniform an ihruk lo i aa dawh ning hi! Mahle thilduh an ihruk, mahle duhning te in an ittamh, an ra chuah tik ah iang dang cio an ngei. Zeitik hmanh ah uniform ihruk ti hlah u. Keimah duh belte ah cun, X'mas cu party a si ko ca ah, hni ching le thil hot zong um seh law ka duh hnga. Hot ka phuanh e ti zong ka thanh cang ko. Asinain anmah thil duh an ihruk hi ka duhpiak ko hna.

Tin Thiam Zi. Mah hlaremh ah hin solo aa tenh pah. An remh mi cu Krismas hla vialte tawi tete cio i aa peh mi an si an ti.

Mahhna sin ah hin dahkaw kherol ka vah. Hmaidir khi minung 20 hrawng an si i thap ruk in an dir si kaw minung pa zeizat dek an sii hnga.

Phungchimtu tehna hmanthlak kan taar lo hi kan ngeih lo ca ah a si. Hmaan thla tu nih an thla rua hna lo. Kei nih le hmaan ka thla lo.

ICBC Krismas ka lungkhan in a nuam tawn lo. Rawl lawng nan khang e tiah ka zai lengmang. Tukum cu a nuam, Kawmitti i kaa tel kum celngel te ah. Kei cu haar-hngak ka si i chungttuan nak lei ah ka um. Pumh zong kaa pum lo ti awk a si. Thawngthanh ah ka va lut ta i duet kan ngaih dih in nutung pawl he rawl timh ah kan chuak. Asinain rawl kan ser colh lo. Hmaan tehna kan ithla ta leen. Kan inuam taktak ve, kan dang in. Tukum Krismas "vuanci" cu Pu Lian Cin [angki raang] a si. Kei nih Suprintendant le chief inspector le manager le a um kho mi "title" dang vialte ka kemh dih. Retheih tu cu midang nih an laak--Pu Siang Herh tehna nih. Kan nutung pawl hi a za mi lawngte an si i dawh taktak in an rak ittamh nain hair net le kuthruk hruk awder ka chuah ciammam i mah khi an si ko. Mahti i an itthumh ruang ah cun rawlpek kongkau ah tlam a tling tuk ve. Thingthei chiah nak kam ah ngakchia nih theithu an thlawh i ka char hlan ah mi nih an lamh manh; zelttung zung hnih kauh hrawng a cin. Mah cu kan tlamtlin lo nak chim awk kan ngeih mi a si, ichimthiam zong ah kan rel hlah u law. :)

Rawl suah nak hi hmun thum a um. Atu i hmaan aa thla mi khi phu khat an si. An dang in an rak ithla cio. Ka thlakpi hna i an ka kua bal lo [ka laan tuk hna i a si lai]. Iang ngei lo i an ka laan ding nak cun iang ngei i an ka laan ah tuarh a nem deuh lai tiah Mangku kaa sawm i rawl suah lai ah kan von i phaws ta.

Tukum cu inn ttamh nak ah tangka ka siang lo; kan ngeih cia le a tam pah i mah vial khin kan ttamh. Ka tunu nih a ttamh hna.

Caan zeitluk dah a kal cang ti hi ngakchia tthan in aa thei. Caan tah nak ah ka taar hna.

Mah hi cu Krismas hmanthlak a si lo; a hmaizarh Thawhlawmpi Zarh i Winchester veng hla kan remh lio a si. Kan thawhlawm khi aa ttial mi chap ah mah ni ah hin $55,000 hrawng a chuak rih. 2015 kum chung dihlak i kan thawhlawm hi $1258,000 fai a si. Mah hlei ah biakin sak nak $102,000, Missions ca ah $15,000 fai, Nubu in $10,000 fai, Lai Ram zuanhnawh nak ah $38,000 tluk, Carol vah nak in $13,000 fai. Kan pek sena ka fonh ah $14,35,000 hrawng ah ka chuah. Tipil ing cia minung 1200 iphaw usi law $1200 dengmang cio in kan ting hnga. Kum khat ah $1200 cio a thawh tluk, asilole thla khat ah $100 cio a thawh tluk, asilole zarh khat ah $25 cio a thawh tluk hrawng kan si. Athawh law nih an thawh rua belte.

Atu tan Krismas cu chun a nuamh kan iza cang i zan cu a hau ti lo tiah kan ti pah cio nain, parawkrem rak isuai cang kaw zan zong kan nolh rih. Pumh si lo in, nunnuam tuah in suimilam pa thum chung caan hmang ding in. Mah zan ko ah hin Krismas hla vuaite'n kan sa.

Sayamah Sui Tin Tial le Saya Van Za Mang nih an kan hruai. Thadam tuk ttung, nuam tuk ttung, in an kan hruai. Mah ding cu, mah ding cu!

Ka mit an ka chinhter i, mah kar ah cun catlang pa khat an taar, zaapi hmuh in. "Kan hrikpi khual kaa tlawnpi" ti a si. Mah cu ka hnulei i a dir mi Cungcung nih hin kutke in cawn ding, a cawn mi zoh in kei nih a sullam leh ding, a si. A cawn i ka tuak kho lo. "Mari nih a fa aa cawi" ti ah ka chuah, X'mas cu si kaw. Zual lakin an ni. A cawn tthan. Zulei ah ka chuah hoi. An ni tuk hoi. Mari le zulei--mah tluk aa dang mi.

Pu Tin Tawng hi capo a thiam ngaingai mi a rak si. Kanmahhna kan ngakchiat lio in a kan nuamh cang. Atutan hi capo saih cu an fial.

Pu Tluang Pum zong hi capo a rak thiam tuk mi a si e an ti. Tar hnu ah cun capo chuak ti hlah kaw capo pah, bia siaherh pah a kan chimh.

Lip dance an ti rua, media i hlasak an hmuh mi ah an ithim i cawn a si. Long coat aa hruk mi khi a thiam bik. Miru umtu a thiam ning, laam a thiam ning le lip dance a thiam niung cu capo zong a lo lo. Kehlei bik khi Pu Siang Herh a si. Lai love song cu zeiti hlei laam awk um hlah kaw tuak chom in a laam i mah zong cu nih a chuak pah. Hmai i hi Za Uk Thang nu, Uppa Kangnam Style a laam hnek lio, a si.

Charades an ti i, "Zei pei, zei pei" le "Ho pei, ho pei" ti kan tuah lio a si, atang i he hin. A kan tuahter tu nih a ti ning a kan chimh i henta, "Nan mit chin u" a ti i, "nan min chim u" ti in kan itheih dih i, orhlei bik nih khin, "Lian Cin" tiah thangpi'n a ti. An ni dih. Lai Holh a si bak ko mi mahtluk i kan itheihpalh khawh cu "nuamh thlarau" a um ti a lang. Mah a tuah mi hi department head pawl le krifa upa le pasator an si. Mahhna an ibawmh lawng ah thil a cang ti an langhter nak a si. A tthu mi: Nubu chairman, Missions chairman, pastor, krifa upa, a lu te a lang mi khi Sunday School. A dir mi angki raang in: pastor, Mino aiawh, Church Chairman, le Nunphung & Zatlang chairman, an si.

Mah kum ICBC Krismas hi cu a nuam tuk tiah an ti cio. A ruang ah mahhna hi an itel lai tiah ka zumh:

• Church Choir hlaremh: Krismas hla taktak remh ding ah Minobu ka fial hna i an tlinh lo; ataktak ah cun atu i hi a rak si.
• Rawl ei lio hla: fung 14 kan thim i, an ttha tuk i, mah nih cun a nuamhter tuk. Micheu cu pumh lo in mah cu an ngai.
  
• Rawl thaw: Kan rawl an thaw bak e tiah ripawt a ra pah lengmang. Kei an ka barh mi kaa khat lawng ka ei.
  
• Nikhua: Tukum Krismas cu ruah zong sur hlah, vuar zong sur hlah. Lai Ram khuasik ni te khi a si ko. Kan duh tuk.
  
• Zan sosial: Rawl ei a dih sin i Krismas a dih ah hin ka lung bak a rawk tawn. Tukum cu nuam tuk in an kan hruai.

Sosial pumh a dih in ngaknu-tlangval laksawng thlen a si, cungdot ah. An ka sawm pah lengmang ve i kaa telpi hna, mino cawlcangh hmuh pah nak ah. An kam in ka tthu lai i an inuamh ka zoh lai ka ti cu, zawnruah in an ka paih ve. Leng no pawng tthut zong an ka tinter ve (atang i hni sen pawng ah hin, vaal no hmanh i an tin set lo mi). Ngaknu-tlangval lawngte 138 kan si. Vawleicung ah a tam bik pawl kan si men lai. A nuam phun in laksawng kan ithleng. Kei cu Aa Pi nih ka laksawng a ka thlen i khuprep bawm (hmursensi tehna chiah nak) ka ting. Mino ka lung an si deuh lo nak cu, leng le vaal tthut-tti pah le isenghtlaih pah a um lo tuk deuh. Mah bantuk caan ah hin cun ngiat zong ingiat pah, tthut zong tthut-tti pah, kuh zong ikuh pah, awk an si. Pakhat ah, nu le pa 1:2 si hna kaw, u-ting nau-zo in tiah pa karceh in nu an tthut-ter hna i lungduh pawng zong ah tthu kho hna hlah. Zei vanchiat dek an ton!

Kan krifabu chung i rinhchanh tawn mi ngaknu le tlangval lungfim nih tukum cu khual ah Krismas an kan hmantaak i kan hlam hna. Krismas a nuamh kum lehtuk i an um lo cu kan sia zong an herh. Krismas a hmangtti keel kan hmantti lo ah hin zei khi dek a bau. [Atu i hla a remh mi ah khin an itel, pa pawl an lang lo. An tlun hnu pi i an remh mi hmanthlak a si].

Kei, tukum Krismas cu full in ka hmang: Inn ka ttamh (ka hnulei i tung khi ka ngerh). Carol ka vaak. Thla ka cam. Metting ka tuah. Lai laam ka laam. Ar ka hreem. Laksawng ka hmu. Hla ka thim. Program ka suai. Chung ka ttuan. Dawr ka kal. Bia- hla ka thlah. Zu thaw ka ding. Hmaan kaa thla. Laksawng kaa thleng. Pathian ka bia. Rawl thaw ka ei. Ngaknu ka kilh. Hla ka sa. Sosial ka tuah. Mi kut ka tlai. Ka ni. Mah hlei tuah awk a um ti lo, oi kul tuah zong ah.

Thlapa oi 12 a chuah ah kan tuah tthan te lai.