PATHIAN NIH A THLARAU IN A KAN HRUAI KOPathian fale cu Pathian thlarau
nih a kan hruai. “Pathian thlarau i a hruai mi cu Pathian fale an si” a ti
(Rom 8:14 ah). Mah hi cu ruah cio a herh hrimhrim mi biatak a si. Thilcang
i a kan hruai ahcun, kan lungchung-ummi i a kan hruai ahcun, Pathian thlarau
le Pathian Bia i a kan hruai lo ahcun, kan raal tu nih hrawh awk le thah
awk ah khua thup ah a kan hruai ko lai. Krifa tam tuk an lungduh nih a hruai
cang hna: “Ka zuam lo” kan ti men. Pathian i tuah a kan fial mi cu kan itimh
ah cun Amah Pathian lila nih a kan bawmh lai i kan tuah khawh ko lai. “Kri
bawmhnak thawng in zeizongte hi ka tuah khawh ko lai” (Fil 4:13) a ti kho ding kan si. Pathian nih amah duhnak
atuah kho ding in thazang le huham a kan pek ko lai.
Kri fale hi kan lungtem (feeling)
ning in kan kal sual ttheu. Mah cu Thiangthlarau lamhruainak ah rel sual
a fawite. Cu bantuk krifale i an ruahning ah cun iduh tehna hi tthatlonak
um dawh in an hmu lo. Cuti i, lungduhnak le pumsaduhnak men i khuasak cu phungbuar
khuasak a si. Pathian duhning nih cun Pathian Bia leng in pehter a kan duh
bal lo. Kan lungtem hi Pathian duhning a si le si lo, Pathian chanh hmasa
lengmang a hau.
Pathian thlarau nih kan lungtem
le kan lungduh cu a uk awk a si; a lettalam a si awk a si lo. Kan hal ahcun,
Pathian nih duhning hmaan le lungtem ttha a kan pek lai i, aa dawhcah lo
mi lungtem kan ngeih cia mi zong a kan thianh piak lai.
Krifa cheukhat cu pawngkam
thilcang nih a hruai hna. Pawngkam thil zoh lo in khuasak awk ttha hlah hmanh
seh law, kan nun lam a kan hruaitu ding cu an si lo. Pawngkam thil i a kan
hruai ahcun, caw hmai i leng chiah bantuk a si cang. Pathian duhmi tuah nakding
ah thilri ttha le mawttaw ttha tehna kan hal hmasa tawn. Adongtakuaih ah cun
kan ral Sehtan tu nih caan ttha aa laak i, kan duh mi cu a kan pek i, kanmah
rawh nak lila a si tawn.
Cubantuk i aping kan ithim
sual tik ah hin, Pathian nih a kan zaangfah tthiamtthiam ko. A aw ngaih kan
hngalh rih lo ruang le a bia ngaih kan thiam rih lo ruang a sii a hngalh ko.
Asinain, a kan duhpiak mi cu, kanmah i kan duhning Pathian chimh lei si lo
in, amah i a kan chimh ning i nun tu hi a si. Kan thlarau nih Pathian aw
ngaih a hngalh nakhnga a kan duhpiak. Kan thlarau i amah lamhruainak a hngalhthiam
hnu ah cun, thil cu a tluang niahmah ko lai. Amah lila nih kan herh mi cu
a kan daidoh dih ko lai.
Biana ah, a rian thiang attuan
ding in khoimawka ah a kan auh tiah kan hei iruah hnga. Mah cu kan thlarau
nih a hngalh i, tuah ding in a kan timhlamh. Inka honpiak ding i thla kan
cam ah cun Pathian nih a hon ko lai. Voi tampi cu krifa mi nih hin alettalam
in kan fuh tawn. Lam hon piak ding i thla cam lo in, lam na hon ah cun ka
kal lai ti lei tu in thla kan cam. Inka aa hong cia mi cu Sehtan i a hon
mi a si tawn ca ah, cu lam aa hong mi ah cun Pathian nih kalter a kan duh
lo. Kan ralpa nih cun miping sin le lamping ah a kan kuat khawh mi a si.
Ka ca i lam aa hong mi hi Pathian i a ka honpiak mi maw a si, Sehtan i a
ka hon piak mi dah ti hi ruah setset hmasa a hau. Vawlei nih cun minung cu
kan lung a kan cawtter i Pathian fimnak ngei kho lo tiang in a kan tuah. Kannih
nih zei caan poh ah Pathian fimnak cu hal zungzal kan hau.
---------
Lungtthawng le ralttha in
um ko. Ther in phaang hrimrhim hlah. Bawipa cu nangmah sin ah a um. Anih
nih cun a’n deuh lai lo. A’n hlaw pek lai lo.
Deu 31:6 -------------
A chim tu: Aho dek
A let tu: Ceu Hlun
|