RIAMH HNGAL LO TIHAAL
Dennis Brown

Maw Pathian, nangmah cu ka Pathian na si, nangmah cu ka'n ngai. Ka nunnak nih hin an hlam i ka thlarau nih ti haal in a'n hal; vawlei ro i ti a duh bantuk khin a'n duh.
Salm 63:1

Ka patar kong hi ka lung a rak fiang lo ngaingai. A tar hlan in tuante ah a tha a baang lengmang. A tha a dih hin a ti a haal i a din leen zong ah riam kho hlah. A dongh nak ah cun malhma in a um. Sizung ah kan tlikpi i an zoh tik ah zunthlum a ngei ti a si. Kan hngalh a hnu tuk cang. A pumsa chung a rawk i zarh hnihthum hmanh a nung ti lo.

Aziah dah ti a din leen zong ah a tihal a riamh khawh hnga lo ti ah cun, a pumsa ah ti a chamhbau si lo in insulin a chamh ruang ah a si.

Salm 63 nih, "Ka thlarau cu nangmah a'n ngai i kan pumsa cu nangmah a'n hlam" a ti. Aho poh mah cu kan haal dih. Asinain kan haal mi hi zei dang si lo in Pathian a si ti belte kan hngal tawn lo.

Ka patar bang in, zei dek kan haal ti cu kan hngalh. Cu kan haal mi cu zeidang in riamhter kan itim tawn i a riam taktak kho bal lo. A ruang le kan hngal lo ttheu. Acaan ah kan um a har i khuazaza kan ruat. Saduh za kan that. "Hawikom tam deuh rak ngei ning law" kan ti, 'nupi/va ngei ning law" kan ti, "tlangval/ngaknu lungduhte ngei ning law.." kan ti, "san tlai zinpan deuh ninglaw" kan ti, "tangka cuzat ngei ning law" kan ti, "..ning law", "..ning law" ti lawngte a si.

Kan saduhthah a tlin ah le kan ilungsi hlei hoi lo. Kan ngeih deuh ah tam deuh kan duh. Kan tihaal a riam kho taktak lo. Ka patar insulin a chamh ruang i a tihaal a riamh khawh lo bantuk in, herh thuk deuh kan ngei. Mit hmuh khawh thil le kut tongh khawh thil i an riamhter khawh lo mi thlarau tihaal kan ngei.

Ka thlarau nih nangmah cu an haal i, ka pumsa nih nangmah cu an hlam, hi vawlei zonzai nak rak ah hin. Aziah tiah na dawtnak cu nunnak nakin a sung deuh. Ka thlarau cu rawl thaw bik a ei mi nakin a khim deuh (Salm 63).

Kan thlarau le kan pumsa i an hlam bik mi cu Pathian a si; nan, mah cu kan hngal lengmang lo. Cu, kan nun i Pathian a hlam nak cu a thuk tuk ttheu i, a ruah awk kan hngalh lo tiang deng in a thuk ttheu. Cu ruang ah, kan nun nih Pathian a hlam ti hngal lo in, minung le thilri a hlam bantuk ah kan irel ttheu.

Mah bantuk i hlam mi le haal mi kan ngeih tik ah hin con rih i bia ihal kan hau. "Lungdiriamh nak hi khuadang ah maw ka kawl rih ko lai? Pathian tu ka fuh awk a si lo maw?" ti in lung ithlet kan hau.

Adongtakuaih ah cun kan thlarau ilungsinak le idinhnak cu Zisuh ah kan hmuh lai. Zei a kan ti dah tiah, "Phorh a rit mi le re a thei mi hna, keimah hi ka fuk u. Thadam ka'n pek hna lai" a kan ti (Mt 11:28).