Khuaza-um Laimi krifabu nih nan thawhlawm chung in zeimawzat te cio kha nanmah bu member siangkailio bawmh nak ah rak hlem u law scholarship program rak tuah cio u tiah forh kan in duh hna.

Tangka tuh nak ah hin Life Insurance i tangka tuh hi a miak lo bik i, education i tangka tuh hi san a tlai bik e an ti. Education i tangka tuh cu a let zeizat ah aa chuah lai ti hi tuak khawh hmanh a si lo. Biana ah, sibawi cawn nak i tangka a dih mi khi micheu chan khat ei khim tiawk a si; a tam tuk. Asinain mah vialte cu sibawi rian an von tlaih tik ah kum hnih cham hrawng lawng a si. A taang mi kum sawm thum le pensen hnu tiang i an hmuh mi cu million tam a si. Mah tluk cun thiam cawnnak i tangka tuh cu a voi.

Cu ruang ah thiam cawnnak ca i tangka hman cu, a hman awk a um leh ah cun, pumpak nih si seh, chungkhar nih si seh, mibu nih si seh, duh ding a si. Laimi zong sifah bu in nu le pa acheu cu heh tiah an ttang i an fale cu cataang an ngeihter hna--ro ttha bik. Acheu cu chungkhat in an ttang. Acheu cu akhua zong in an ttang. Har tuk i an ttan nak theitlai cu ahnu ah lawh cawk lo a si.

Baibal siangin kai a rak har tuk lio ah krifa bu bawmhnak in Baibal siangin an rak kaiter hna. Siangkai an lim in krifabu ca le khua le tlang ca ah bochan mi ah an chuak. Krifabu i an rak bawmh hna nak cu an philh lo i zatlang mibu ttihzah zong an ngei. Nun zia zong an thiam. Tlaang ca rianttuan zong an tha a tho. Mibu zong nih mah minung zoh in zoh i dawt deuh a si. Mibu le scholar karlak pehtlaihnak a ttha. Mibu le mifim pehtlaih nak a tthat i zaang an fun cu zatlang ca ah a ttha tuk mi a si. Cozah kip nih a duh mi a si.

Laimi chung ah Foundation a tuah mi an um pah i siangin kai bawmh nak zong tuah an itim ko. Thil ttha ngaingai a si i, tangka khawmhsuat chom cun zeitluk in dek hma a kal te hnga. Hram ttha le management ttha ngeih a hau. Mah pa hnih cu krifabu nih a ngeih. Krifabu cu tangka ngeih cia ngei hlah hmanh seh, tipuut bantuk a si; a chuak chom lengmang lai. Cun rian a ttuan ning ah zumh a kai. Cu ruang ah foundations pawl nakin krifabu ah ruahchannak ka ngei deuh. Krifabu i aa timh ah cun a cang lai.

Atu cu Lai krifabu hi thazang an ngei deuh cang. Tangka zong tam deuh a lut cang i rian pipa ttuan nak zong a um deuh cang. Bu chung zong ah hmaicuan khuahmu an tam deuh cang. Hi lio ah a ttha tuk mi thil tuah kan hngal lo sual lai, kan hmuh kho lo sual lai, ti hi phaan a um. Zei dah tuah usi ti ah cun: krifabu nih thiam cawn nak ca ah chaw tuh seh ti hi a si. Chim deuh ko ah cun krifabu tangka in sianghlei thiamcawn nak bawm usi, sianghlei a kai mi bawm hna usi ti hi a si. Zeitin dah kan tuah hnga ti kong ah, ruahnak ttha ttha deuh midang nih an chuah te lai i, zoh chun chung awk ah ICBC i kan ton cang mi pakhat ka ttial lai.

Indiana Chin Baptist Church nih hin Scholarship Program cu a tuah. ICBC chungtel, High School lim hnu i thiamsang deuh a dawi mi hna ca ah a si. Thazaang ngeih deuh ah cun pawcawm nak ca i a herh ding mi certification laak khawh nak ca zong a si te ve ko lai nain atu ah cun college le university a kai mi hna ca tiang a si bik rih. Thluakttha le cathiam cu kaadang in bawmhnak an hmu kho i, kannih i an zawn kan ruah mi cu kaadang in bawmhnak tangka a hmu kho lo mi pawl ko hi an si. Ca le thiam tuk lo, tangka le ngeih lo, bawmhnak sok zong ah ruahchannak um lo, in an tha a chia lai i warehouse rianttuan ah an lung a zuang sual lai; bawmhnak kan tuah ah cun siangkai peh an ngamh deuh lai ti hi kan ruah mi a si. Cuca ah, an GPA zoh lo in, an cawn mi subject zong zoh lo in, an chamhbau nak tu zoh in, hi bawmhnak hi ser a si--zawnruah nak in. A min hi 'stiphen' ti awk zong a si ko hnga nain 'scholarship' hi a min a ttha deuh tiah kan ruah i "ICBC Scholarship" tiah a min cu kan sak.

ICBC Scholarship aa tuah hi 2012 kum khan a si cang. Kan krifabupi thawhlawm hmuitinh i 1% hman si seh law ahnu ah a herh ning in chap si te seh tiah ti a si i, 2012 kum ah khan $5,500, 2013 kum ah $7,500, hman a si. Mah nih cun siangngakchia cu thazaang a pek ngaingai hna ti an hmurka le cattial ah a lang. 2014 kum ah cun $15,000 kan hman cang. Pehzulh ding in kan ruah.

Mahti i fanau thiam cawn nak ah chaw kan tuh tik ah, an siangkai nak ah an tum a tling te lai i aa lawm tu ah kanmah lila kan si te lai, mi tampi thawhbur mi tangka in mi ah kaa chuah ti tehna an philh te lai lo. Kan kut le kan ke cu anmah an si te lai. An naule ca zong ah thil ttha tuah an hngal te lai. Kan miphun ca le kan zatlang ca ah an tthahnem te lai ti tehna kan ruat.

Krifa thawhlawm hi minhngallo ah tampi a kal. Zei huaha lo zong ah a kal. Zeiti i an hman kan hngalh lo nak hmun zong ah a kal. A zu-va mi zong tampi a um lai. Mah lak ah 1% hrawng te hlem i, kan bochan te ding mi fanaule thiam cawn nak ah kan tuh ah cun a let tampi ah a chuah mi tangka kengtu biana bia Bawi Zisuh i a chim mi bantuk kha kan si kho. Tuanbia thar ttial tu zong kan si kho.

<>< <><

Note: Cattialtu hi ICBC Scholarship Board chairman a si i, mah kong an ti ning le an ton mi hngalh a duh mi nih ceuhlun@yahoo.com ah hal khawh a si lai.