Kal zing cu Chin Center ah iton a si. Hawi phanh ah kei ka phaan lo.

Zei le zei dek an rak ei cang rua, hawi cu.

Pu Mang Chawn nih video thla ding in redi.

Jeanny nih Lai hni he lengmang. Saza Bawi Kian nih hmai panh lo ni ngei hlah.Vl. Ceu Thawng nih mi kilhkamh.

Pu Thawng Mang, Nunphung & Zatlang, zong a kal.

Chin Center cu Chin Community of Indiana zung le hmunhma, Laimi ca i an hlaan mi a si. A ngan tuk lo, nain san a tlai ngaite. Zeizong kim ah kan hman. Mahka ah cun iton a si. Bawipa ca i aa timlaam mi ngaknu le tlangval cu hmaipanh in an um. Kan dawt dih mi Zaiku nih le a lung a tluang zungzal rua ti awk in a kan umpiak. Kan awttha a si.

Vaal no nih an no an i seihchiah' tuk. An mawh lo. Kan rak si cio.
Baibal nih, "Chiandeih tuum no hmanh a rawl a ttaam ko hnga, si hmanh seh Bawipa minung cu.... " a ti.
Bawipa i a kan dawt ca'h a si.

Hla zong an rak hrual leen cang.

Ka va phanh cu an chuah he kaa tong.
Ka hngawngngerh sen hi ka u Ni Cia nu i laksawng a si. 

Mawttaw ah kai colh a si. Vaal ttha Ceu Thawng nih, "U Hlun, nang cu mino bus pakhatkhat ah kan kaipiak ve" a ka ti. Umhar in a um sual lai a ti bia. Zawnruah a si. Bus pa khat ah cun  ka hong lut. Hlahruai Hrang Cung he kan tthu, ngaknu he tthut lo in. Kanhnulei ah cun mino tlangval pawl, an hmai ah ngaknu tling pawl.

Mt. Pleasant Christian Church nih gas le bus 2 le a mongtu an kan rin dih. ICBC nih bus hnih.

Krifa upa pawl zong an kal. Capo lawng an sai ko.

Iang Iang nih, "Kan kal nakding cu Kentucky ah a si, a khua cu Lexington" a ti.
Ni Iang Zi hi ICBC cawlcanghnak ah aa tel dih mi, "the most participating member" a si. Sunday School thilti in Mino sin zong.
Mino ah amah hi Nubu thlacam a kal lengmang mi a si. Laam pohpoh a laam dih. High School tukum a dih lai. 

"MawMawi le Aapi, hmun nan tin ti ttung ri lo, kanmah bus ah ra ko kun u, dawtnak in kan in don hna."

A kal mi minung 82 kan si an ti rua. Kan si taktak pei dek. Bus ngan bus thum le bus hme pa khat in kan kal. 'Anih le anih vial cuu bus ah kai u' ti um lo in kai a si i lungduh pawng tthut ting lo le aa nuam lo kan um pah lai dah. Krifa cu ingaihthiam kan hau.

Rual-nau pawl bus cu hmai-no lawngte tan an si ko. "Leengmi cu e, an hmul corh siap ah lung lian hna" an rak ti i icbc ngaknu za ka pawl hi tlangval za saling pawl sin ah an lung a lian maw lian lo dek. Kan Mino hotu zong atu tan cu lawmhnak thlam a lung chung ah leen dawh a si ko. A kiang i mah tluk biang no le hmur no khi zeitin dah.... an ti. Mino hruaitu si an von duh tuk cio.

A-hm, kan hawihawi!

Nice smiles and sweet faces.

Kei cu zei ei lo, zei din lo in pok ing kaw kaa panh lo. Saymour ah coffee kaa cawk i ka ding. Mah hnu tu cun kaa panh tuk ve cang. Hmurka ka ngei kho cang. Ka pawng mi ka chawnh dih hna.

Hmai thlum aNgun ka kehlei ah a tthu. Kan ichawn i interview bantuk ka von tuah colh.

"Na holh te hi, Halkha tthang na lo. Khoika'h dah na tthan?"
"Halkha ah ka tthang. Leisen ah kan um."
"Nan khua tah khuazei?"
"Phaizawng."
"Siangin taang zeizat tiang dah na kai?"
"Taang hra tiang."
"Na awng maw?"
"Ka awng ve."
"Zeitik kum ah?"
"2003 ah."
"Mah cun....
"Mah hnu cun college kai lo in sau nawn ka vaivuan i Malaysia ah ka kal."
"Malay ah kum zeizat dah na um?"
"Kum li."
"Cah mi maw na si cah lo mi?"
"Cah mi ka si ah zeitin dah mahka hi ka phanh khawh lai i?"
"An phanh cio ko hita. Va ngeih hrulh ngawt pei an si ko hi."
"Kei cu cah lo mi te ka si ko."
"Zat-laan tawi tah na ngei pah maw?"
"Ngaknu cu kan si i,,,,"
"Si pah lo cun zei he. Kei zong zat-laan ttu cu tampi ka ngei."
"Dawrthar lei le Pyidawta khi kan holh aa dang deuh tiah na ruat maw?"
"Khuathar le Khuachung khi cu an idang. Dawrthluan khi cu kan ikhat dih ko."
"Nangmah holh bantuk ka theih ah hin dahkaw Halkha ka ngaih tuk cu."

A hmun kan phanh in hmaan kan ithla i kan lut.

Mino hruaitu Vl. Uk Hmung nih a kan tlaangtlaak i kan thil kan ithleng.

Vei: Hlaremh tthutdir ning kan va cawng ta i thil thlen nak khaan i kan ra kir ah inka an rak hong rih lo. Kan idil  Mah lio ah cun paran le saki he Mangbik Sangcem kan von tthuat i, atang i kan fanaule hi lekmalak an laam tetmat colh i mah ko cu kaa lawm in kaa nuam. Ka duh tuk.

Kei rawlttam i ka uai dih le ka hmur zong a caar dih ah cun dahkaw ngaknu no pawl cu an ipanh tuk rih cu.

Paran tlai Ceu Hlun & saki tlai Hrang Cung Hnin.

An nule zong nih kalpi ve hna. Ngaknu zaa ka cu an Lai thil hruk an nule i an zohpiak hna ah aa rem bik.
  Hla cu kan remh taktak hlan ah kan va cinh ta, mi umlokar ah.

"Zeitluk in dek na lianhngan ko" ti hla kan va sak lio. Pumh hlan ah a si.

Pumh ah cun kan pok, saar laam a laam lai bang zei bang.

Kanmah an kan thokter.

A kan ko tu Steve nih bia a chim hmasa.

Mi mah zat lak ah cun pasator Lal Cung Awi nih pumh thok thla a cam. A cung i khi screen chung i an cuanter mi a si.

Hla hi fung thum kan remh.

A hall a ngan tuk i kan mui an kan hliah lo. Screen ah nganpi'n an kan cuanter.

Paran ka tum lio cu a si, ka kal hnawhchan cu.

Mah civuipi ah hin ram kip i missionary a ttuan mi minung thong nga/ruk an ra lai e tiah an ti nain hla kan remh lio ah hin cun mah zat nemmam an si lo. Khua a ka ruahter ngaingai. Vawleicung ah krifa ram cu Setan ram nih a en chin lengmang. Kri ral a do taktak mi ralkap an tlawm tuk cang. Atu i kan hmuh mi ko hi Kri ram ca i raldo hmaikal cuan si. An tlawm tuk. Si hmanh seh, "Hrehawm tinreng tuar mahse la, Lalpa ah chuan an lawm reng fo" an ti bang an zei a poi lo. An sin ah cun kannih hna cu ningzak kan si. Mah zan phungchim cu a ttha tuk. Lebanon ram i missionary a ttuan mi a si (a min Pu Thlasui Tluangneh hal te u).

A phungchim dongh nak ah rammui ca rian ttuan ding ah a pum aa pe mi hmai ah chuak u tiah a ti i, kan phu in Hrang Chum Ling le a naunu Tha Hlei Sung (angki nak lucung zawn i te hi) hmai ah an chuak ve. Kan ningzah an khan pheen ruahmah.

Kan hlaremh cu an kan sunhsakpiak ngaite i, kan remh dih ah cun sunhsak nak ah mipuum a dir dih. Kut an beeng dih. An mit ah zei khi dek kan hei lawh hnga. Bawipa mit ah tah? Ahnu i kan theih mi cu, "They are the highlight of the convention" ti a si. Bawipa nih a sunparnak tlawmte a kan cheuh kan ti lai. Mah te hmanh cu kannih ca'h a sunglawi tuk. ICBC sin khual ka tlawn hi atu oi khat te lawng a si; kan sunlawi bik ttum a si ve, kei dau tthat cu!

Pumh dih cun acheu tual ah an laam. Acheu hman an ithla.

Lupawng ponh hi pasator. Luchin sen hi secretary.

Zan 9:40 hrawng in tlun kan ithawh. 

Kannih mawttaw cu tlangval ttha le ngaknu ttha lawngte kan si i hlanuam sa in kan inuam tuk. Kan ithawh sin in Pathian hla lawngte kan sa i, kan mawttaw mong (Mirang) pa sin zong ah ka hmai a hngal ngaite. Pathian aa tlaih mi mino hi aho nih an zawmtai kho hna hnga maw ti ka ruat.

McDonald ah zanriah kan hon ei pah.

Mah hnu zong cun tlangval pawl nih cun lamthlochuak hla cun cat lo in an kan awih. Kum no deuh pawl cu hla bia an thiam lo i upa deuh nih kan aupiak pah hna.  Krifa hlabu le  zuun hla hlun cu kei nih  ka rin hna. Krifa solo hla phun cu Zaiku nih a kan rin. Pathian hla lawng kan sa cawk lo i zuun hla zong kan sa pah ko. Zuun hla thar cu aMen nih. Achel ah kan zawnh ve hna. Kan hlasak cu a nuam in lung a leng ngaite:

"Cung van sang ah khin a ceu thlapa a vang,
Deirel arfi hna lawm in an lengtti...."

Kei cu "hatianrem" naih ah ka tthu. Zan khuamaw a si na'n thla a vang i a mui tuk lo. Tlangval pawl hlasak ngaih pah cun bia kan iruah. Pumpak kong cu an si lo. Lai tuanbia a ka chim. Tla ciahmah te khin. Halkha khua holh bakte. A ni pah. Ka philh dih cang mi hlanlio Lai tuanbia ttha ttha: Mikei tuanbia, Khuang Thlor Liit tuanbia, Ngunnu tuanbia, Lian Do le Tual Sial tuanbia, tehna. Fung tamlakte a ka chimh. Mah bantuk tuanbia ka theih lo nak hi kum 30 ringlo pi a si cang. Ka hmet lio ka nu hnu ah aho hmanh nih tuanbia an ka chim bal ti lo. Atu hi a si. A nuam tuk in ka thei. Kaa miak tuk. Kaa lawm tuk.

Aizawl i siangcachim a rak ttuan lio ah ka class ah "hatianrem" iang hlei cuang cu a rak um i, cachimh lio ah a rak ka hawh tawn i hiti hin ka rak ti (Lusei a si i a thei lai lo nain):

"Hatianrem aw, baang rih law mitsir thli veen cu,
Zan khuamawt ah kan khirh lai duh zai rel cu,
Ttuan rel rih 'si caparsang rian ah."

Keimah tawn ve lo bang, hawi he khual nuam ka tlawn lo nak a sau. Mino le lenglio he nih sung kan ihrawm lo nak zong a sau tuk cang. Zan khua tlai thlavang tang i zuun hla sak le lenglio he bia nuam iruah lo nak zong khua a sau ngaingai cang. Hlan ah khan cun mu... ka ti. Inuamh khawh lio caan kha a sung tuk in ka thei hna.

"Inuam usi, leng le vaal no mi hna,
Seem cawi hnu tiang kan nun ngaih leen awk in;
Par ttha bang par caan hi a sau lai lo,
Kan zuun hi caam leen seh, leng nolh chan tiang." ka rak ti.

Kan tuanbia chimh a dih tlawmpal ah cun kan khua Indianapolis kan phaan. Zinglei 2:30 hrawng a si. Ar a khuang rih lo.  Kan thil kan ilaak cio i tual ah cun kan dir. Kan ttian riangmang cang lai. Zeitik ah mah bantuk caan sung kan hmangtti tthan kho ti hnga maw? Lungkham in kan um cio. Kan ttian lai i kan ttin lai. Kan it lai, mang ttha he. Thaizing kan tho tthan lai, Bawipa ca ah.

Pa Hlun